វិស័យសំខាន់ៗចំនួន ៤នៅកម្ពុជាកំពុងទាក់ទាញការវិនិយោគពីឥណ្ឌា
វិស័យអាទិភាពចំនួន ៤នៅកម្ពុជារួមមាន វិស័យវិទ្យាសាស្រ្តនិងបច្ចេកវិទ្យា វិស័យទេសចរណ៍ ហេដ្ឋារចនាសម្ព័ន្ធ (ផ្លូវថ្នល់ ផ្លូវដែក និងស្ពាន) និងវិស័យកសិឧស្សាហកម្ម បាននិងកំពុងធ្វើឲ្យតំណាងវិស័យឯកជននៃប្រទេសឥណ្ឌាចាប់អារម្មណ៍នៅក្នុងការវិនិយោគ ដើម្បីពង្រឹងនិងពង្រីកកិច្ចសហប្រតិបត្តិការសេដ្ឋកិច្ច និងទំនាក់ទំនងពាណិជ្ជកម្មរវាងប្រទេសទាំងពីរ។
ប្រភពរូបភាព៖ ក្រសួងពាណិជ្ជកម្ម
តាមរយៈប្រភពពីក្រសួងពាណិជ្ជកម្មបានឲ្យដឹងថា នៅក្នុងជំនួបពិភាក្សាកាលពីរសៀលថ្ងៃទី២១ ខែកុម្ភៈ ឆ្នាំ២០១៩ ជាផ្នែកមួយនៃកិច្ចប្រជុំកំពូលអាស៊ានឥណ្ឌាលើកទី៤ នៅក្នុងទីក្រុងញូវដេលី ប្រទេសឥណ្ឌា លោក សាន់ឌិប សូម៉ានី (Sandip Somany) ប្រធានសហព័ន្ធពាណិជ្ជកម្ម និងឧស្សាហកម្មឥណ្ឌា (FICCI) បានជម្រាបជូនឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មកម្ពុជា អំពីទំនាក់ទំនងពាណិជ្ជកម្ម និងវិនិយោគរវាងឥណ្ឌានិងរដ្ឋជាសមាជិកអាស៊ាន ព្រមទាំងបង្ហាញចក្ខុវិស័យរបស់រដ្ឋាភិបាលឥណ្ឌា ក្នុងការពង្រីកកិច្ចសហប្រត្តិបត្តិការសេដ្ឋកិច្ច និងពាណិជ្ជកម្មជាមួយកម្ពុជាដែលបច្ចុប្បន្ននៅមានទំហំតិចតួចនៅឡើយ បើធៀបជាមួយប្រទេសផ្សេងៗនៅក្នុងតំបន់។
ប្រភពរូបភាព៖ ក្រសួងពាណិជ្ជកម្ម
ជាការឆ្លើយតប ឯកឧត្តម ប៉ាន សូរស័ក្ដិ បានសម្ដែងការស្វាគមន៍ចំពោះគម្រោងវិនិយោគខាងលើ និងបានជម្រាបលោក សាន់ឌិប សូម៉ានី អំពីលក្ខណៈអំណោយផលនៃទីតាំងភូមិសាស្រ្តប្រទេសកម្ពុជា គោលនយោបាយបើកចំហរ និងគោលការណ៍លើកទឹកចិត្តវិនិយោគផ្សេងៗរបស់រារដ្ឋាភិបាល ព្រមទាំងយុទ្ធសាស្ត្រអភិវឌ្ឍន៍ឧស្សាហកម្ម (IDP) ឆ្នាំ២០១៥-២០២៥ ដែលមានគោលដៅកែប្រែកម្ពុជាពីប្រទេសពឹងផ្អែកខ្លាំងលើការប្រើកម្លាំងទៅជាប្រើប្រាស់ជំនាញនៅឆ្នាំ២០៣០។
ប្រភពរូបភាព៖ ក្រសួងពាណិជ្ជកម្ម
ក្នុងនោះផងដែរ ឯកឧត្តមរដ្ឋមន្ត្រីបានលើកឡើងពីវិស័យកសិកម្ម និងកសិឧស្សាហកម្មកម្ពុជា និងបានស្នើសុំលោក សាន់ឌិប សូម៉ានី ជួយកៀងគរធុរជនឥណ្ឌាធ្វើការបណ្ដាក់ទុនលើការកែឆ្នៃផលិតផលខ្មែរ សម្រាប់នាំចេញទៅកាន់ប្រទេសឥណ្ឌា ព្រមទាំងផ្គតផ្គង់ទីផ្សារក្នុងតំបន់ និងពិភពលោក។ លើសពីនេះឯកឧត្តមក៏បានសំណូមពរ ឲ្យមានជើងហោះហើរត្រង់ពីឥណ្ឌា មកកម្ពុជាដើម្បីលើកកម្ពស់វិស័យទេសចរណ៍ វប្បធម៌ និងកិច្ចសហប្រតិបត្តិការធុរកិច្ចនៃប្រទេសទាំងពីរថែមទៀត៕
ដោយ៖ ជួប ស្រីរ័ត្ន
