ហេតុអ្វីក្រុមហ៊ុននីមួយៗ គួរតែមានបុគ្គលិកចម្រុះជាតិសាសន៍ធ្វើការ?
តើចាំបាច់អីដែលក្រុមហ៊ុននីមួយៗ គួរតែជ្រើសរើសបុគ្គលិកចម្រុះជាតិសាសន៍ផ្សេងៗគ្នា មកធ្វើការរួមគ្នានោះ ? តាមពិតទៅការធ្វើការជាមួយមនុស្សចម្រុះជាតិសាសន៍គ្នាគឺនាំមកនូវក្រុមការងារដ៏ខ្លាំងមួយ, រួមគ្នាធ្វើការងារដែលមានប្រសិទ្ធភាពមួយបាន, ជាពិសេសគឺបង្ហាញនូវភាពខ្លាំងក្លារបស់ក្រុមហ៊ុនតែម្ដង។ តើនៅមានចំណុចណាផ្សេងទៀត ទើបក្រុមហ៊ុនចង់បានបុគ្គលិកចម្រុះជាតិសាសន៍នេះ?
១) ទទួលបានគំនិតទូលំទូលាយ៖ មនុស្សជាច្រើនតែងមានការជឿទៅលើអ្វីផ្សេងៗគ្នា។ ដូចនេះវានឹងនាំឲ្យអ្នកទាំងនោះងាយបំបែកគំនិតគិតរៀងៗខ្លួន។ ហើយកាលណាអ្នកបូកផ្សំគំនិតផ្សេងៗនោះ ក្រោមដំបូលបញ្ហាតែមួយ អ្នកនឹងងាយរកដំណោះស្រាយបានឆាប់ជាពិសេសបានដំណោះស្រាយល្អៗ មកទៀតផង។ លើសពីនោះទៀត ពួកគេអាចនាំមកនូវគំនិតច្នៃប្រឌិត បានច្រើនជូនក្រុមហ៊ុនទៀត។
២) មានប្រាក់ចំណេញច្រើនជាងមុន៖ កាលណាអ្នកធ្វើការតែជាមួយបណ្ដុំមនុស្សដដែលៗ អ្នកនឹងមើលឃើញថា គឺមានតែមនុស្សម្នាក់ប៉ុណ្ណោះដែលចាំតែបញ្ចេញមតិ, ដែលចាំតែធ្វើការតែម្នាក់ឯង។ រីឯអ្នកផ្សេងវិញគឺ ដឹងតែលើកការងារឲ្យបុគ្គលម្នាក់នោះធ្វើតែម្នាក់ឯងប៉ុណ្ណោះ។ ចុះបើងាកទៅមើលបុគ្គលិកដែលធ្វើការជម្រុះជាតិសាសន៍វិញ ពួកគេតែងផ្លាស់ប្ដូរមតិគ្នាដើម្បីរកចំណូលមកកាន់ក្រុមហ៊ុន។ បើក្រុមហ៊ុនមានបុគ្គលិករកចំណូលចូលច្រើនហើយនោះ ក្រុមហ៊ុននឹងចាប់ផ្ដើមកើនប្រាក់ចំណេញលើសលប់តែម្ដង។
៣) ពង្រីកការវិវត្តទៅមុខ៖ មានការសិក្សាច្រើនណាស់ ដែលបង្ហាញថា ការធ្វើការចម្រុះគ្នាភាគច្រើននាំការវិវត្តទៅមុខ។ ក្រុមហ៊ុនអាចមានការវិវត្តបាន លុះត្រាតែមានបុគ្គលិកមានគំនិតច្នៃប្រឌិត ប្លែកៗ តែមានប្រយោជន៍។
៤) ទាក់ទាញអ្នកក្រៅឲ្យចាប់អារម្មណ៍ក្រុមហ៊ុនអ្នក៖ កាលណាក្រុមហ៊ុនមានបុគ្គលិក ចេះច្រើនភាសា , ចេះទំនាក់ទំនង, យល់ដឹងគ្រប់វប្បធម៌ , ពួកគេអាចមានសមត្ថភាពទាក់ទាញដៃគូជំនួញបរទេសបានយ៉ាងងាយ។ ជាពិសេសអាចបង្កើនសេចក្ដីទុកចិត្តពី ជនបរទេសបានទៀត ដោយសារតែសមត្ថភាពចម្រុះរបស់ក្រុមហ៊ុននេះផ្ទាល់៕
ប្រែសម្រួល៖ ព្រំ សុវណ្ណកណ្ណិកា ប្រភព៖ hubspot.com
