Galaxy S7 និង S7 Edge នឹងត្រូវក្រុមហ៊ុន Samsung ប្រកាសចេញអំឡុងព្រឹត្តិការណ៍ MWC ឆ្នាំ២០១៦ នេះហើយ។ ទន្ទឹមព័ត៌មានហើបចេញព្រោងព្រាតស្ដីពីកំពូលទូរស័ព្ទ Galaxy S ជំនាន់ទី៧ ស្រាប់តែពេលនេះ ថែមទាំងមានសេចក្ដីរាយការណ៍បន្ថែមថា ផេប្លេត Galaxy Note 6 នឹងមាន RAM ទំហំធំ ពោលរហូតដល់ 6GB ខណៈដែលអេក្រង់ ៥,៨អ៊ីញ។
យោងតាមរបាយការណ៍ថ្មីមួយបានពីគេហទំព័រ Sammobile ឱ្យដឹងថា Galaxy Note 6 នឹងមានទំហំអេក្រង់ ៥,៨អ៊ីញ អមជាមួយ RAM ដ៏ធំផងដែរ គឺដល់ទៅ 6GB។ Note 6 អាចត្រូវក្រុមហ៊ុន បំពាក់ឈីបអង្គប្រតិបត្តិ Exynos 8990 ដែលឈីបនេះ នឹងបង្ហាញវត្តមាននៅលើ Galaxy S7 ផងដែរ។ ចំណែក resolution អេក្រង់មានដល់ 4K display យ៉ាងហោចណាស់ ក៏មានប្រភេទ QHD display ដែរ។
សូមបញ្ជាក់ថា នៅចុងខែកុម្ភៈ នេះ ក្រុមហ៊ុន Samsung ត្រៀមរៀបចំព្រឹត្តិការណ៍ Unpacked ដើម្បីសម្ពោធស្មាតហ្វូនថ្មីពីរម៉ូដែលគឺ Galaxy S7 និង Galaxy S7 Edge។ ព្រឹត្តិការណ៍នេះ នឹងត្រូវប្រារព្ធឡើងនៅថ្ងៃទី២១ កុម្ភៈប៉ុន្មានថ្ងៃខាងមុខទៀតនេះ៕
