មហាសេដ្ឋី Jack Ma និយាយថា មានកំហុសមួយនេះអាចធ្វើឲ្យអាជីវកម្មថ្មីថ្មោងស្លាប់ទៅវិញ
លោក Jack Ma ដែលគេទទួលស្គាល់ថា ជាមហាសេដ្ឋីដ៏អស្ចារ្យជាងគេបំផុតទី២នៅលើពិភពលោករបស់ទស្សនាវដី្ត Fortune និងជាមហាសេដ្ឋីមានជាងគេបំផុតមួយរូបរបស់ចិនបានលើកឡើងពីកំហុសមួយដែលនឹងធ្វើឲ្យក្រុមហ៊ុនមួយដួលរលំទៅវិញ។
នៅក្នុងវេទិកាសាធារណៈមួយដែលធ្វើឡើងនៅទីក្រុងហុងកុងកន្លងទៅ ស្ថាបនិកក្រុមហ៊ុន Alibaba រូបនេះបានផ្តល់ដំបូន្មានដល់សហគ្រិនថ្មីថ្មោងជាពិសេសយុវជនដែលមានបំណងចង់ចាប់ផ្តើមអាជីវកម្មទាំងអស់ថា កុំសាកល្បងជួលបុគ្គលិកកំពូលៗមកពីក្រុមហ៊ុនធំៗឲ្យមកធ្វើការនៅក្នុងក្រុមហ៊ុនរបស់អ្នក។ ធ្វើការងារជាក្រុមគឺកូនសោជោគជ័យនៅក្នុងក្រុមហ៊ុន មហាសេដ្ឋីវ័យ ៥៤ ឆ្នាំរូបនេះបានផ្តល់យោបល់ដូច្នេះថា៖« អ្នកគួរបង្កើតក្រុមការងារមួយដែលមានមហិច្ឆតាលើបេសកកម្មក្រុមហ៊ុនរបស់អ្នកជាជាងនាំយកបុគ្គលិកជំនាញ និងពូកែៗមកធ្វើការឲ្យអ្នក។ កុំយកម៉ាស៊ីនយន្តហោះ Boeing 747 មកបំពាក់ក្នុងម៉ាស៊ីនយន្តហោះតូចមួយរបស់អ្នក។ វានឹងបំផ្លាញអ្នកជាមិនខាន»។ នៅទីនេះ អ្វីដែលលោកចង់ពន្យល់នោះគឺថា អ្នកគួរស្វែងរកបុគ្គលណាមួយដែលស័ក្តិសមនឹងក្រុមហ៊ុនរបស់អ្នក។ ជាបុគ្គលិកដែលអាចធ្វើការងារជាក្រុមតែមួយ និងជាបុគ្គលិកដែលដែលមានការលះបង់ខ្ពស់ដើម្បីអ្នក និងភាពរីកចម្រើនរបស់ក្រុមហ៊ុនទាំងមូល។ លោកបានបន្តថា៖« ធ្វើការជាក្រុមតែមួយ ហើយបង្ហាត់ពួកគេ បន្ទាប់មកពួកគេនឹងអាចជួយបង្ហាត់បង្រៀនអ្នកវិញ»។ លោកបន្តថា សូម្បីតែ Alibaba បង្កើតឡើងដំបូងនៅក្នុងឆ្នាំ ១៩៩៩ ក៏លោកមិនបានជួលអ្នកជំនាញសមត្ថភាពខ្ពស់មកធ្វើការក្នុងក្រុមហ៊ុនរបស់លោកដែរ។ កាលនោះលោកមានស្ថាបនិករួមដល់ទៅ ១៨ រូបដែលធ្វើការនៅក្នុងក្រុមហ៊ុននេះដែលអ្នកទាំងនោះសុទ្ធសឹងតែមិត្តភក្ដិរបស់លោកដែលមិនមានជំនាញ និងចំណេះដឹងខាងកុំព្យូទ័រនោះឡើយ។ សហគ្រិនត្រូវតែមានសុទិដ្ឋិនិយមជានិច្ច ដំបូន្មានដ៏មានតម្លៃមួយទៀតដែលលោក Jack Ma បានលើកឡើងដំណាលគ្នានេះគឺលោកបានលើកឡើងពីសារសំខាន់នៃអត្តចរិតរបស់សហគ្រិន។ លោកថា អ្នកគួរតែជាមនុស្សមានសុទិដ្ឋិនិយម ហើយត្រូវតែមានសុទិដ្ឋិនិយមជានិច្ច។ «សហគ្រិនដ៏អស្ចារ្យម្នាក់ត្រូវតែមានសុទិដ្ឋិនិយមចំពោះអនាគតខាងមុខ ហើយសួរថា តើបញ្ហាអ្វីខ្លះដែលអ្នកអាចដោះស្រាយបាន និងថា តើអ្នកដំណោះស្រាយរបស់អ្នកខុសពីអ្នកដទៃ និងល្អជាងអ្នកដទៃដោយរបៀបណា?។ មានបុគ្គលិកល្អក្នុងក្រុមហ៊ុន មិនមែនផ្ដោតតែលើការជ្រើសរើសអ្នកពូកែ និងអ្នកជំនាញមានសមត្ថភាពខ្ពស់មកធ្វើការនោះទេ។ ហើយនេះក៏ជាដំណោះស្រាយមួយដ៏សំខាន់ក្នុងក្រុមហ៊ុនដែរ»។ លោក Jack Ma បានបញ្ជាក់បន្ថែម៕
ប្រភព៖ Weforum
