វិធីសាស្រ្ត ៥ យ៉ាងជួយកាត់បន្ថយភាពតានតឹង ស្មុគស្មាញក្នុងជីវិតរបស់អ្នក
កុំបណ្តោយឲ្យស្រ្ដេស និង ភាពតានតឹងមកបំផ្លាញជីវិតដ៏រីករាយរបស់អ្នក។ ស្ត្រេសនឹងធ្វើឲ្យអ្នកបាត់បង់ភាពជាខ្លួនអ្នក មិនថានៅទីណានៅជាមួយអ្នកណា អ្នកនឹងមិនដូចអ្នកកាលពីមុនទេនៅពេលអារម្មណ៍ស្រ្តេសកាន់តែកើនឡើង។
ចំនុចខាងក្រោមនេះជាជំនួយសម្រាប់អ្នក អាចកាត់បន្ថយភាពតានតឹងក្នុងអារម្មណ៍បានខ្លះ៖
១) និយាយពាក្យល្អៗវិជ្ជមានសម្រាប់ខ្លួនឯង៖ បញ្ហាវាងាយនឹងកើតមានណាស់សម្រាប់មនុស្សយើង ហើយវាក៏ងាយនឹងកកស្ទះនៅក្នុងខួរក្បាលយើងដែរ។ ការសន្ទនាមួយចំនួនវាធ្វើឲ្យយើងមានអារម្មណ៍ល្អ តែខ្លះទៀតវានឹងបង្កជាបញ្ហាឲ្យយើងទៅវិញ។ ពេលអ្នកធ្វើនូវកំហុសអ្វីមួយ តើអ្នកគួរនិយាយបែបណាចំពោះខ្លួន? តើអ្នកត្រូវដាក់សម្ពាធឬបន្ទោសខ្លួនឯងរហូតមែនទេ? សាកល្បងនិយាយលួងលោមខ្លួនឯង កែប្រែគំនិតអវិជ្ជមានទាំងនោះទៅជាការស្រលាញ់ខ្លួនឯង មើលថែខ្លួនឯងឲ្យបានល្អ។ ប្រាប់ខ្លួនឯងថាអ្នកណាក៏ធ្លាប់ខុស អ្វីដែលសំខាន់គឺយើងចេះកែប្រែហើយមិនប្រព្រឹត្តនិងសាងកំហុសនេះម្តងទៀត។
២) បង្រៀនខ្លួនឯងឲ្យចេះសម្រាក៖ ពេលដែលអ្នកស្ថិតនៅក្រោមសម្ពាធខ្លាំងមួយអ្នកត្រូវប្រឈមមុខស្ថានភាពមួយដ៏សែនតានតឹង វាប្រាកដជាងាយនឹងធ្វើឲ្យអ្នកទទួលអារម្មណ៍មួម៉ៅ។ ដូច្នេះត្រូវចេះសម្រួលអារម្មណ៍ ដកដង្ហើមឲ្យវែងៗ ចេញដើរទៅនេះទៅនោះដើម្បីបន្ធូរអារម្មណ៍ ឬអាចធ្វើសមាធិស្តាប់ធម៌ជាដើម។
៣) របបអាហារដើម្បីសុខភាពខ្លួនឯង៖ ធ្លាប់សង្កេតទេថា ពេលស្រ្តេសម្តងៗវាអាចធ្វើឲ្យមានការប្រែប្រួលនូវការហូបចុករបស់អ្នក។ អ្នកខ្លះអាចញ៉ាំច្រើនជាងពេលធម្មតា ឯអ្នកខ្លះវិញបែរជាមិនមានអារម្មណ៍ចង់ញ៉ាំអាហារទាល់តែសោះ។ វាពិតជាប៉ះពាល់ដល់សុខភាពធ្ងន់ធ្ងរណាស់ ដូច្នេះអ្នកគួរញ៉ាំអាហារដែលសម្បូរទៅដោយប្រូតេអ៊ីន ហើយត្រូវប្រាកដថាអ្នកសារធាតុខ្លាញ់ដែលអ្នកបានញ៉ាំគឺល្អសម្រាប់សុខភាពដូចជា ផ្លែ avocado និងគ្រាប់ almonds។ វាអាចជួយបំពេញបន្ថែមឲ្យអ្នកនូវថាមពលនិងទប់ទល់អារម្មណ៍ឃ្លាន។ ចៀងវាងនូវសារធាតុកាហ្វេអ៊ីនហើយជំនួសមកវិញដោយអាហារដែលសម្បូរទៅដោយរូបត្ថម្ភជាបន្លែឬផ្លែឈើ។
៤) ស្តាប់ចម្រៀងដែលជួយឲ្យអារម្មណ៍ល្អ៖ ស្តាប់ចម្រៀងជួយដល់ខួរក្បាលច្រើនណាស់ ចម្រៀងដែលមានដែលបង្កប់ទៅដោយមនោសញ្ចេតនា រៀបរាប់ពីទេសភាពដែលអាចឲ្យអ្នកលំហែខួរក្បាល តែចៀសវាងពេលដែលកំពុងពិបាកចិត្ត តានតឹងបែរជាទៅស្តាប់ចម្រៀងឈឺចាប់ មនោសញ្ចេតនាចាក់ដោត ដែលធ្វើឲ្យអ្នកនឹងឃើញនិងរំលឹកភាពឈឺចាប់ឡើងវិញ។
៥) ធ្វើការសម្រាកឲ្យបានច្រើន៖ មនុស្សជាច្រើនតែងទុកម៉ោងពេលសម្រាក នៅចុងក្នុងបញ្ជីតារាងការងារប្រចាំថ្ងៃរបស់ខ្លួន។ ពេលអ្នកគេងមិនបានគ្រប់គ្រាន់អុកស៊ីសែនមិនអាចផ្តល់ទៅឲ្យខួរក្បាលបានពេញលេញទេ។ វាងាយនឹងធ្វើឲ្យអ្នកថយចុះនូវការចងចាំមួយចំនួន។ ដូច្នេះអ្នកត្រូវចេះដកខ្លួនខ្លះដើម្បីផ្លាស់ប្តូរបរិយាកាសឲ្យខួរក្បាលដ៏ដូចជារាងកាយ កំណត់ម៉ោងការងារដែលយើងត្រូវធ្វើក្នុងមួយថ្ងៃ ធ្វើខ្លួនឲ្យស្រស់ស្រាយ រស់នៅក្នុងកន្លែងដែលមានផាសុកភាព ទោះមិនមានប្រាក់កាសច្រើនតែអ្នកអាចរកសុភមង្គលមួយសម្រាប់ខ្លួនឯងបាន។ ចាប់ផ្តើមពីថ្ងៃនេះតទៅនូវជីវិតដ៏ស្រស់ថ្លាមួយដោយអនុវត្តតាមវិធីសាស្រ្តខាងលើនេះ អ្នកនឹងបានឃើញពីភាពខុសប្លែកគ្នានៃសម្រស់ជីវិតអ្នក។ ទោះជាមនុស្សគ្រប់គ្នាមិនអាចចៀសផុតពីបញ្ហាយ៉ាងណាក៏ដោយ តែសុភមង្គលរបស់អ្នក គឺខ្លួនឯងអ្នកជាអ្នកកំណត់ ហើយកុំបណ្តោយឲ្យស្រ្តេសនិងភាពតានតឹងអូសទាញអ្នកធ្លាក់ចូលទៅដល់កម្រិតបាក់ទឹកចិត្ត៕
ដោយ៖ ទីន ម៉ាទីយ៉ា ប្រភព៖ Lianne Avila
