ស្ថាបនិកក្រុមហ៊ុនទេសចរណ៍ MSK Travel ប្រាប់គន្លឹះ ២ចំណុចជួយឲ្យអាជីវកម្មដំបូងឆាប់មានគេស្គាល់ច្រើន
ក្រុមហ៊ុន MSK Travel ជាក្រុមហ៊ុនក្នុងស្រុកមួយដែលមានជំនាញផ្នែកសេវាកម្មទេសចរណ៍និងបានដំណើរការរយៈពេលជិត២០ឆ្នាំមកហើយ។ លោក សុខ ឃាង ស្ថាបនិកនៃក្រុមហ៊ុនទេសចរណ៍មួយនេះបានលើកឡើងថា ការធ្វើអាជីវកម្មគឺដូចគ្នា ប៉ុន្តែអ្វីដែលសំខាន់យើងត្រូវដឹង ថាតើយើងអាចជួយដល់អតិថិជនយើងបានកម្រិតណា បើយើងអាចជួយដល់អតិថិជនរបស់យើងបានកាន់តែច្រើន នោះទើបអាចធ្វើឲ្យអាជីវកម្មយើងឆាប់រីកចម្រើន។
ស្ថាបនិករូបនេះបានលើកឡើងបន្តថាប្រសិនបើយើងចង់ឲ្យអាជីវកម្មឆាប់ទទួលបានការគាំទ្រ ឬឆាប់មានគេស្គាល់ច្រើនគឺចំណុចសំខាន់ទីមួយ យើងត្រូវស្គាល់ខ្លួនយើងឲ្យបានច្បាស់ជាមុនសិន យើងត្រូវដឹងថាតើយើងមានអ្វីដែលល្អមានអ្វីដែលប្លែក ឬមានអ្វីដែលពិសេស និងព្រមទាំងត្រូវស្គាល់ពីសេវាកម្មរបស់ខ្លួនឯងឲ្យច្បាស់ នោះទើបយើងអាចរីកចម្រើនបានយ៉ាងពិតប្រាកដ។
មួយវិញទៀតចំពោះគន្លឹះចែករំលែកទីពីរ លោក សុខ ឃាង បានលើកឡើងបន្តថា បន្ទាប់ពីបានស្គាល់ច្បាស់អំពីផលិតផលឬសេវាកម្មខ្លួនឯងហើយ យើងត្រូវយកអ្វីដែលពិសេសអ្វីដែលប្លែកដែលអាចជួយអតិថិជនបាន យកទៅផ្សព្វផ្សាយដល់ពួកគាត់ដើម្បីឲ្យពួកគាត់ដឹងពួកគាត់ស្គាល់កាន់តែច្រើន នៅពេលដែលពួកគាត់បានស្គាល់យើងកាន់តែច្រើននោះនឹងធ្វើឲ្យអាជីវកម្មរបស់យើងទទួលបានជោគជ័យកាន់តែធំ។
បន្ថែមពីលើចំណុចចែករំលែកសំខាន់ៗទាំងពីរខាងលើ ស្ថាបនិកក្រុមហ៊ុនរូបនេះបានប្រាប់ពីយុទ្ធសាស្រ្តមួយទៀតដែលក្រុមហ៊ុនMSK អនុវត្តដើម្បីឲ្យក្រុមហ៊ុនអាចប្រកួតប្រជែងទីផ្សារបានគឺ ការព្យាយាមផ្ដល់ទំនុកចិត្តឲ្យអតិថិជន ពោលគឺធ្វើម៉េចឲ្យពួកគាត់ទទួលបានអ្វីដែលគាត់ចង់បាន ដូចជាភាពរីករាយក្នុងការដើរកំសាន្ត ដូច្នេះនៅពេលដែលពួកគាត់ទទួលបានអ្វីដែលគាត់ពេញចិត្តហើយ នោះនឹងធ្វើឲ្យអាជីវកម្មរបស់យើងកាន់តែរីកចម្រើនទៅមុខ៕
អត្ថបទ៖ ជួប ស្រីរ័ត្ន
