៦ ចំណុចបង្ហាញពីអាការៈនៅពីការក្រោយមនុស្សបាក់ទឹកចិត្ត
នៅពេលបច្ចុប្បន្ននេះ ការបាក់ទឹកចិត្តត្រូវបានគេសង្កេតឃើញថាមានការកើនឡើងគួរឲ្យកត់សម្គាល់ ។ តើវាមកពីមូលហេតុអ្វីទៅ ? រូបភាពនៃការបាក់ទឹកចិត្តគឺមានផ្សេងៗ គ្នា ហេតុនេះហើយទើបគប្បីឲ្យអ្នកចាប់អារម្មណ៍ថាតើអាការៈនៃការបាក់ទឹកចិត្តគឺយ៉ាងណាខ្លះ?
១) ឧស្សាហ៍អផ្សុក
ចេះតែអផ្សុកគឺជាជំហានដំបូងនៃជំងឺបាក់ទឹកចិត្ត។ អ្នកតែងតែមានអារម្មណ៍ធុញ មិនដឹងត្រូវធ្វើអ្វី មិនចង់ទាក់ទងគេឯង ហើយមិនរាក់ទាក់នឹងមជ្ឈដ្ឋានខាងក្រៅទាល់តែសោះ។
២) បាត់បង់កម្លាំងចិត្ត
វាប្រៀបបាននឹងរស់ដើម្បីអ្នកណា បើគ្មានអ្នកផ្ដល់កម្លាំងចិត្តផងនោះ។ កម្លាំងចិត្តគឺសំខាន់ណាស់ កាលណាដែលអ្នកបានបាត់បង់វាហើយ អ្នកលែងមាន អារម្មណ៍ចង់រស់លើលោកទៀតហើយ ព្រោះរាល់ថ្ងៃអ្នករស់នៅតែម្នាក់ឯងស្រាប់។
៣) ទម្លាប់ចូលគេងមិនល្អ
សម្រាប់អ្នកដែលមានសុខភាពល្អហើយគ្មានវិបត្តិផ្លូវចិត្ត គឺពួកគេងាយនឹងគេងលក់ណាស់ ពេលតម្រេកខ្លួនគឺគេងលក់តែម្ដង។ តែក្រឡេកមកអ្នកដែលមានជំងឺបាក់ទឹកចិត្តវិញ ពួកគេកម្រគេងលក់ណាស់ ហើយតែងបណ្ដោយខ្លួននៅដល់យប់ជ្រៅ នេះដោយសារតែការគិតច្រើនពេក។
៤) អារម្មណ៍ផ្លាស់ប្ដូរលឿន
ឃើញ ថាអ្នកមានវិបត្តិផ្លូវចិត្តគឺមានអារម្មណ៍ផ្លាស់ប្ដូរ ៩០ ដឺក្រេតែម្ដង។ ពេលខ្លះក៏ឆាប់ខឹង ពេលខ្លះក៏ឆាប់អរ ភ័យ តក់ស្លុត ពិបាកចិត្ត គឺតាមមិនទាន់ឡើយ។
៥) បាត់បង់កម្លាំងកំហែង
ជាការពិតណាស់ កាលណាអ្នក រវល់តែពិបាកចិត្តពេក អ្នកនឹងភ្លេចបាយភ្លេចទឹក ហើយគ្មានអារម្មណ៍ចង់ពិសាអីនោះទេ។ ពេលនោះអ្នកនឹងចាប់ផ្ដើមធ្លាក់ខ្លួន ខ្សោយ ល្ហិតល្ហៃ អស់កម្លាំង ដោយមិនដឹងខ្លួន។
៦) តែងអស់សង្ឃឹម
ក្ដីសង្ឃឹមគឺធំធេងណាស់ ហើយវាជាទឹកចិត្តមួយជំរុញអ្នកឲ្យរស់។ តែបើបាត់បង់វាហើយ ប្រៀបបាននឹងបាត់បង់ជីវិត ៥០ភាគរយបាត់ទៅហើយ៕
ប្រែសម្រួល៖ ព្រំ សុវណ្ណកណ្ណិកា
ប្រភព៖ Power of positivity.com
