ហេតុផលទាំង ៦នេះ បញ្ជាក់ថា អ្នកមិនអាចក្លាយជាសេដ្ឋីដូចគេបានឡើយ
មានមនុស្សជាច្រើនគិតថាការក្លាយជាអ្នកមានគឺត្រូវពឹងតែលើសំណាង ជំនួយពីឪពុកម្ដាយជាដើម តែវាមិនមានបែបនោះទាំងស្រុងទេ។ មានសេដ្ឋីមិនតិចទេដែលពឹងផ្អែកលើសមត្ថភាព និងការខិតខំរបស់ខ្លួន។ ហេតុនេះហើយអ្នកគួរតែស្វែងយល់ពីមូលហេតុខាងក្រោមរួចព្យាយាមកែប្រែខ្លួនឯងតាមដែលអាចធ្វើបាន។
១) អ្នកគិតថាខ្លួនឯងមិនឆ្លាតគ្រប់គ្រាន់៖
គ្មានការមើលងាយណាដែលធ្វើឲ្យអ្នកបាក់ទឹកចិត្តជាជាងការមើលងាយខ្លួនឯងនោះទេ។ វាជាការល្អដែលអ្នកចេះស្គាល់ពីភាពទន់ខ្សោយរបស់ខ្លួន តែអ្នកមិនត្រូវមើលងាយ ឬប្រៀបធៀបខ្លួនឯងជាមួយអ្នកដទៃឡើយ។
២) អ្នកគ្មានជំនឿចិត្តលើខ្លួនឯង
មិនមែនថាអ្នកមាន មានមហិច្ឆតាខ្ពស់ជាងអ្នករាប់សិបដងនោះទេតែអ្វីដែលសំខាន់គឺពួកគេជឿជាក់លើខ្លួនឯង ហើយជឿថាខ្លួនឯងអាចធ្វើទៅបាន។ បើសិនជាអ្នកចង់ក្លាយជាអ្នកមាន អ្នកត្រូវតែជឿជាក់លើខ្លួនឯងច្រើនជាងនេះ និងចេះធ្វើឲ្យសុបិនរបស់អ្នកក្លាយជាពិត។
៣) អ្នកផ្ដោតលើការសន្សំលុយជាងការរកចំណូលបន្ថែម
សូមកុំយល់ច្រឡំ ព្រោះអ្នកមានក៏ធ្វើការសន្សំលុយដែរគ្រាន់តែពួកគេមិនបានយកទៅដាក់ធនាគារហើយដេកចាំការប្រាក់បន្តិចបន្តួចនោះទេ។ ពួកគេយកលុយទៅបង្កើតលុយដូចជាការរកស៊ី ឬការបណ្ដាក់ទុនជាដើម។
៤) អ្នកគិតថាធ្វើការកាន់តែច្រើនម៉ោងប្រាក់ចំណូលរឹតតែច្រើន
មនុស្សច្រើនណាស់ដែលយល់បែបនេះ តែការពិតទៅការក្លាយជាមហាសេដ្ឋីដ៏ឆ្លាតនោះគឺអ្នកត្រូវព្យាយាមរកដំណោះស្រាយទៅនឹងបញ្ហារួចបង្កើតជាលុយ មិនមែនខំធ្វើការរាប់ម៉ោងរហូតនោះទេ។
៥) អ្នកខ្លាចបរាជ័យ
មុននឹងសេដ្ឋីម្នាក់អាចក្លាយជាអ្នកមានទ្រព្យសម្បត្តិហូរហៀរបាន គាត់ធ្លាប់បានជួបឧបសគ្គនិងភាពបរាជ័យរាប់មិនអស់។ តែពួកគេបានចាត់ទុកការបរាជ័យទាំងនោះជាជំហានឈានទៅរកភាពជោគជ័យរបស់ពួកគាត់។ ការបរាជ័យ និងកំហុសហាក់បីដូចជាគ្រូបង្រៀន ហេតុនេះអ្នកគួររៀនសូត្រពីវាវិញទើបល្អ។
៦) អ្នករាប់អានមិត្តភ័ក្ដិខុស
អ្នកណាក៏ស្រលាញ់មិត្តភ័ក្ដិរបស់ខ្លួនដែរ ប៉ុន្តែបើមិត្តភ័ក្ដិរបស់អ្នកជាអ្នកក្រ ហើយមានចរិតមិនល្អនិងគំនិតអវិជ្ជមាន អ្នកនឹងមិនមានភាពរីកចម្រើនឡើយ។ អ្នកមានចូលចិត្តរាប់អានអ្នកមាន មិនមែនពួកគេស្អប់អ្នកក្រនោះទេ គឺពួកគេនៅជុំវិញអ្នកមានដើម្បីរៀនពីពួកគេ៕
ដោយ៖ តូច ម៉ាយ៉ារស្មី
