លក្ខណៈសម្បត្តិពិសេសៗ ១៩ ចំណុចដែលធ្វើឲ្យអ្នកមាននៅពេលអនាគត
ទាំងអ្នកមានទាំងអ្នកក្រ គឺមាន ២៤ ម៉ោងដូចគ្នា។ ប៉ុន្តែអ្វីដែលធ្វើឲ្យអ្នកមានខុសពីអ្នកក្រនោះគឺស្ថិតនៅត្រង់ថា តើមនុស្សពីរនាក់នេះមានទម្លាប់ និងផ្នត់គំនិតបែបណាដើម្បីប្រើប្រាស់ពេលវេលាទាំងនេះឲ្យមានប្រយោជន៍សម្រាប់បង្កើតប្រាក់ចំណូលរបស់ខ្លួន។ យ៉ាងណាមិញ ប្រសិនបើអ្នកមើលឃើញខ្លួនឯងថា អ្នកមានចំណុចទាំងអស់ខាងក្រោម នេះបញ្ជាក់ថា អ្នកនឹងក្លាយជាអ្នកមាននៅពេលអនាគត។
១.ចេះរកលុយតាំងពីក្មេង
ផ្នត់គំនិតធ្វើជាអ្នករកស៊ីដោយផ្តើមចេញពីការចេះរកលុយតាំងពីក្មេង គឺជាមូលដ្ឋានគ្រឹះដ៏សំខាន់ដែលធ្វើឲ្យបុគ្គលម្នាក់ក្លាយជាអ្នកមាននៅពេលធំឡើង។ មហាសេដ្ឋី Mark Cuban ធ្លាប់លក់ថង់ដាក់សំរាមតាំងពីអាយុ ១២ ឆ្នាំ ពេលធំ ឡើងលោកក្លាយជាមហាសេដ្ឋី។
២.ជាមនុស្សមានមហិច្ឆតាធំ
ខណៈដែលមនុស្សទូទៅមានក្តីស្រមៃចង់រកលុយត្រឹម ម៉ឺនដុល្លារ មនុស្សដែលមានផ្នត់គំនិតជាអ្នកមាន គឺមានមហិច្ឆតាចង់រកលុយរាប់ពីរាប់លានដុល្លារឡើងទៅ ពោលគឺចង់រកលុយឲ្យបានកាន់តែច្រើនគ្មានដែនកំណត់។
៣.ជាមនុស្សទាក់ទាញ
ការស្រាវជ្រាវមួយរបស់សាកលវិទ្យាល័យ Texas បានឲ្យដឹងថា មនុស្សដែលមានភាពទាក់ទាញអាចរកចំណូលលើសពីមនុស្សទូទៅយ៉ាងហោចណាស់ក៏ពី ៣ទៅ៤%ដែរ។
៤.ជាមនុស្សសកម្ម
ប្រភេទមនុស្សដែលមិនចូលចិត្តនៅទំនេរ សកម្មនឹងការងារ ចេះឆក់យកឱកាស មិនពឹងលើព្រេងវាសនាគឺជាសញ្ញាណល្អនៅក្នុងការកសាងទ្រព្យសម្បត្តិ។
៥.ជាមនុស្សមិនចូលចិត្តបង្អែបង្អង់យូរ
មនុស្សដែលមានផ្នត់គំនិតចូលចិត្តចាប់ផ្តើមធ្វើអ្វីភ្លាមៗ មិនចេះបង្អែបង្អង់យូរ មិនដេករង់ចាំឱកាស ឬពេលវេលាល្អបំផុតមកដល់ មិនយូរមិនឆាប់បុគ្គលនេះនឹងអាចក្លាយជាអ្នកមាន។
៦.ជាមនុស្សផ្ដោតលើការរកចំណូលបន្ថែមឲ្យកាន់តែច្រើនជាជាងគិតតែពីសន្សំលុយ
នេះគឺជាលក្ខណៈសម្បត្តិមួយទៀតរបស់អ្នកមាននៅពេលដែលបុគ្គលនោះដាស់តឿនខ្លួនឯងឲ្យរកលុយបានកាន់តែ ច្រើនជាងចំណាយតាមរយៈចំណេះដឹងវិនិយោគពីប្រាក់សន្សំរបស់ខ្លួនដើម្បីឲ្យលុយចេញទៅរកលុយដោយខ្លួនឯង។
៧.ជាមនុស្សមានគំនិតទូលំទូលាយ
មនុស្សដែលមានគំនិតទូលំទូលាយមានគំនិតច្នៃប្រឌិត មើលអនាគតបានវែងឆ្ងាយ ស្គាល់ពីឱកាសរកលុយ ស្គាល់ពីទីផ្សារច្បាស់ និងស្គាល់ពីមនុស្សដែលត្រូវទំនាក់ទំនងដើម្បីកសាងភាពជោគជ័យលើទ្រព្យសម្បត្តិរបស់ខ្លួន។
៨.មានចំណងមិត្តភាព និងមនុស្សរាប់អានច្រើននៅមហាវិទ្យាល័យ
សាកលវិទ្យាល័យ Essex របស់អង់គ្លេសបានរកឃើញថា មនុស្សដែលមានមិត្តភាពរាប់អាន ឬអ្នកស្គាល់ច្រើនជាពិសេសនៅថ្នាក់មហាវិទ្យាល័យមានឱកាសជោគជ័យដល់ទៅ ១០% ខ្ពស់ជាងមនុស្សទូទៅ។
៩.អាចរស់នៅតាមបែបសាមញ្ញ
លក្ខណៈសម្បត្តិរួមមួយទៀតដែលមើលឃើញជាទូទៅនៅក្នុងចំណោមក្រុមអ្នកមានគឺថា ពួកគេជាមនុស្សសាមញ្ញ មិនចូលចិត្តប្រើប្រាស់ថ្លៃៗសម្ញែងអួតដាក់អ្នកដទៃនោះឡើយ។
១០.ជាមនុស្សមិនប្រើអារម្មណ៍មកគ្រប់គ្រងការចំណាយរបស់ខ្លួន
ខណៈដែលអ្នកក្រភាគច្រើនចូលចិត្តទិញរបស់ថ្លៃៗ តែមិនចាំបាច់ លក្ខណៈសម្បត្តិបែបអ្នកមានវិញ គឺមិនប្រើអារម្មណ៍មកគ្រប់គ្រងការចំណាយរបស់ខ្លួនឡើយ។ ដោយសារតែការកសាងទ្រព្យវាជារឿងលំបាក ការសន្សំសំចៃលើការចាយវាយ មិនទិញរបស់ឥតប្រយោជន៍ គឺជាគ្រឹះសំខាន់មួយក្នុងការកសាងភាពមានបាននៅពេលអនាគត។
១១.មានមនុស្សជំនិត ឬគ្រូបង្គោលសម្រាប់ណែនាំផ្លូវ
មនុស្សដែលមានអ្នកប្រឹក្សា ឬគ្រូបង្គោលសម្រាប់ជួយតម្រង់ផ្លូវអប់រំចិត្តសាស្ត្រ គោលដៅជីវិត និងរបៀបធ្វើជំនួញរកលុយនឹងមានពន្លឺក្នុងការទទួលបានមាគ៌ាភាពជោគជ័យហិរញ្ញវត្ថុ។
១២.ជាមនុស្សមិនអណ្ដែតអណ្ដូងញាំញីនឹងរឿងអតីតកាលឥតប្រយោជន៍
រស់នៅតាមបែបអ្នកមានគឺយកការបរាជ័យ និងបទពិសោធន៍មិនល្អអតីតកាលមកបម្លែងទៅជាភាពជោគជ័យនៅពេលបច្ចុប្បន្ន និងពេលអនាគត។ មនុស្សដែលមិនអណ្ដែតអណ្ដូងញាំញីនឹងរឿងអតីតកាលឥតប្រយោជន៍ គឺជាមនុស្សដែលមានឆន្ទល្អ ចិត្តរឹងប៉ឹង និងផ្តោតលើរឿងវិជ្ជមាននៅពេលអនាគតជាសំខាន់។
១៣.ជាមនុស្សមានគោលដៅច្បាស់លាស់
អត្តចរិតរបស់អ្នកមានគឺចូលចិត្តធ្វើអ្វី មួយតាមផែនការច្បាស់លាស់ ដូចជាការរៀបចំគោលដៅរកលុយក្នុងរយៈពេលខ្លី និងរយៈពេលវែង។ មនុស្សបែបនេះមានយុទ្ធសាស្ត្រ និងមធ្យោបាយដើម្បីសម្រេចគោលដៅតាមអ្វីដែលខ្លួនចង់បាន។
១៤.ជាមនុស្សដែលស្គាល់ពីចំណុចខ្លាំងរបស់ខ្លួន
លក្ខណៈសម្បត្តិរបស់មនុស្សដែលជោគជ័យហិរញ្ញវត្ថុ គឺជាមនុស្សដែលមិនមែនព្យាយាមធ្វើការអ្វីដែលមិនមែនជាទេពកោសល្យរបស់ខ្លួន។ គ្រប់អ្នកមាននៅលើលោកយើងនេះសុទ្ធតែជាមនុស្សដឹងពីចំណុចខ្លាំង និងចំណុចខ្សោយរបស់ខ្លួន។ ពួកគេស្រលាញ់ពេញចិត្តនូវមុខរបរការងារ ឬជំនាញដែលខ្លួនកំពុងធ្វើ ហើយខិតខំអភិវឌ្ឍវាឲ្យកាន់តែរីកចម្រើនជាលំដាប់។
១៥.ជាមនុស្សមានសុទិដ្ឋិនិយម
មនុស្សដែលមានសុទិដ្ឋិនិយម នឹងគិតពីរឿងវិជ្ជមាននៅក្នុងជីវិត។ មនុស្សដែលមានផ្នត់គំនិតវិជ្ជមាន នឹងមើលឃើញរឿងរ៉ាវល្អៗនៅជុំវិញ ខ្លួន។ មនុស្សប្រភេទនេះទទួលស្គាល់បញ្ហាប្រឈមដែលនឹងកើតមានឡើង មិនត្អូញត្អែរ ឬយកលេសច្រើន ហើយចេះរកមធ្យោបាយដើម្បីដោះស្រាយបញ្ហាទាំងនោះដែលជាបច្ច័យល្អជួយដល់ភាពរឹងមាំ នៃហិរញ្ញវត្ថុ។
១៦.ជាមនុស្សចេះញាំស្រា តែមិនជក់បារី
សាកលវិទ្យាល័យ Columbia បានរកឃើញថា មនុស្សស្រីដែលចេះទទួលទានស្រា មានឱកាសជោគជ័យ ២១% ជាងមនុស្សស្រីដែលមិនទទួលទានស្រា។
១៧.ជាមនុស្សក្លាហាន និងមានទំនុកចិត្តលើខ្លួនឯង
មនុស្សដែលមានទំនុកចិត្តលើខ្លួនឯង នឹងមិនភ័យខ្លាច ឬ តក់ស្លុតទៅនឹងបញ្ហាប្រឈមដែលនឹងកើតមាននៅជុំវិញខ្លួនឯងនោះឡើយ។ មនុស្សប្រភេទនេះជឿលើសមត្ថភាពរបស់ខ្លួន និងអាចតតាំងបានគ្រប់កាលៈទេសៈដោយយកគំនិតបញ្ញារបស់ខ្លួនធ្វើជាយានសម្រាប់ដោះស្រាយបញ្ហាចំពោះមុខដែលនេះគឺជាគុណសម្បត្តិរបស់អ្នកមានទូទៅ។
១៨.ជាមនុស្សចូលចិត្តតាមដានព្រឹត្តិការណ៍នៅពេលបច្ចុប្បន្ន
ការអានសៀវភៅ កាសែត សារព័ត៌មាន និងឯកសារផ្សេងៗ គឺជាចំណង់ចំណូលចិត្តមួយរបស់អ្នកមានហើយ។
១៩.ជាមនុស្សដែលរៀនជាប្រចាំ
មនុស្សដែលមានផ្នត់គំនិតជាអ្នកមាន នឹងបែងចែកពេលវេលាមួយផ្នែកមកសិក្សារៀនសូត្រស្រាវជ្រាវអភិវឌ្ឍសមត្ថភាពរបស់ខ្លួនបន្ថែម។ អ្នកមានតម្កល់ផ្នត់គំនិតមួយគឺរៀនសូត្រមិនចេះឈប់ទោះបីជាស្ថិតនៅក្នុងវ័យណាក៏ដោយ៕
ប្រភព៖ Entrepreneur
