គម្រោងវិនិយោគរោងចក្រពីរនៅខេត្តកំពង់ស្ពឺបង្កើតការងារបានជិត ៣ពាន់កន្លែង
ក្រុមហ៊ុនចំនួនពីរត្រូវបានគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនប័ត្រចុះបញ្ជីជាស្ថាពរតាមរយៈការស្នើរសុំក្នុងការវិនិយោគលើគម្រោងបង្កើតរោងចក្រ ដែលមានទីតាំងស្ថិតនៅខេត្តកំពង់ស្ពឺ ដែលសរុបទុនវិនិយោគប្រមាណ ៩,០៤ លានដុល្លារអាមេរិក ព្រមទាំងអាចជួយផ្ដល់ការងារដល់ប្រជាជនបានរហូតដល់២,៧៩៤កន្លែង។
ទីមួយក្រុមហ៊ុន “SHINING (CAMBODIA) BELT & BAG CO.,LTD.” គម្រោងបង្កើតរោងចក្រផលិតខ្សែក្រវាត់ និងកាបូបគ្រប់ប្រភេទ ដែលចំណាយដើមទុនក្នុងការវិនិយោគប្រមាណជា ៣,៣៦ លានដុល្លារអាមេរិក និងអាចជួយផ្ដល់ការងារដល់ប្រជាពលរដ្ឋបានចំនួន ៧៣៥ កន្លែង។ រោងចក្រនេះមានទីតាំងវិនិយោគស្ថិតនៅ ដីឡូតិ៍ A ភូមព្រៃខ្វាវ ឃុំរកាកោះ ស្រុកគងពិសី ខេត្តកំពង់ស្ពឺ។
ក្រុមហ៊ុន ទីពីរ “PARTAGE (CAMBODIA) CO.,LTD” គម្រោងបង្កើតរោងចក្រផលិតកាបូប និងគ្រឿងបន្សំកាបូបគ្រប់ប្រភេទ ដែលមានទីតាំងវិនិយោគស្ថិតនៅ ភូមិសង្រ្គោះជាតិ ឃុំត្រពាំងគង ស្រុកសំរោងទង ខេត្តកំពង់ស្ពឺ។ ដោយចំណាយទុនក្នុងការវិនិយោគប្រមាណ ៥,៦៨ លានដុល្លារអាមេរិក ព្រមទាំងអាចបង្កើតឱកាសការងារដល់ប្រជាពលរដ្ឋបានរហូតដល់ ២,០៥៩ កន្លែងផងដែរ៕
អត្ថបទ ៖ ជួប ស្រីរ័ត្ន
