វិនិយោគិនជនជាតិថៃម្នាក់បោះទុន៣លានដុល្លារអាមេរិកសង់រោងចក្រកែច្នៃផ្លែឈើមួយកន្លែងនៅខេត្តព្រះសីហនុ
រោងចក្រកែច្នៃផ្លែឈើមួយកន្លែងនៅខេត្តព្រះសីហនុ ត្រូវបានវិនិយោគិនជនជាតិថៃមួយរូបបោះទុនវិនិយោគប្រមាណជា ៣លានដុល្លារអាមេរិកក្នុងការសាងសង់ លើទំហំផ្ទៃដី១០ហិចតា ដោយរោងចក្រកែច្នៃផ្លែឈើនេះ មានទីតាំងភូមិសាស្រ្តស្ថិតនៅ ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ (ជាប់ផ្លូវជាតិលេខ៤) ។
ក្នុងឱកាសដែលឯកឧត្តម យន្ត មីន អភិបាល នៃគណៈអភិបាលខេត្តព្រះសីហនុ អញ្ជើញចុះពិនិត្យមើលដំណើរការសាងសង់ និងសួរសុខទុក្ខ នាថ្ងៃទី៣១ ខែមករា ឆ្នាំ២១០៩ កន្លងទៅនេះ តំណាងរោងចក្របានប្រាប់ឲ្យដឹងថា រោងចក្រនេះមានសមត្ថភាពអាចកែឆ្នៃផ្លែឈើមួយចំនួនដូចជា ផ្លែស្វាយ ផ្លែល្ហុង ផ្លែសាវម៉ៅ ផ្លែម្នាស់ និងផ្លែដូងជាដើម។ល។ ដោយក្នុងមួយថ្ងៃអាចកែច្នៃផ្លែឈើបានចន្លោះពី ២០ ទៅ២៥ តោន។
នៅចន្លោះរវាងពី៤ ទៅ៥ខែទៀត ក្រោយពេលដែលរោងចក្រសាងសង់រួច មិនត្រឹមតែអាចជួយស្វែងរកទីផ្សារដល់ប្រជាកសិករប៉ុណ្ណោះទេ ថែមទាំងអាចផ្ដល់ឱកាសការងារដល់ប្រជាពលរដ្ឋក្នុងតំបន់នោះបានប្រមាណជា២០០កន្លែងផងដែរ។ នេះបើយោងតាមការផ្សាយដំណឹងពីហ្វេសប៊ុកផេកផ្លូវការរបស់ឯកឧត្តម ខៀវ កញារិទ្ធ រដ្ឋមន្ត្រីក្រសួងព័ត៌មាន តាមរយៈការផ្ដល់ដំណឹងដោយ ប្រធានមន្ទីខេត្តព្រះសីហនុ៕
អត្ថបទដោយ៖ ជួប ស្រីរ័ត្ន
