មុនចង់លាឈប់ពីការងារទៅបើកអាជីវកម្ម អ្នកគួរឆ្លើយសំណួរទាំង ៦នេះសិន
នៅក្នុងទិដ្ឋភាពជាក់ស្តែង អ្នកនឹងសង្កេតឃើញថា មានមនុស្សភាគតិចណាស់ដែលដាក់ចិត្តដាក់កាយចូលប្រឡូកក្នុងវិស័យអាជីវកម្ម។ មនុស្សភាគច្រើនបានចិញ្ចឹមជីវិតដោយជ្រើសរើសជីវិតជាអ្នកធ្វើការឲ្យគេដើម្បីរកប្រាក់ខែមកដោះស្រាយក្នុងជីវភាព។ នេះមិនខុសពីទ្រឹស្ដី Cash-flow Quadrant របស់លោក Robert Kiyosaki ដែលថាមានមនុស្សប្រហែល ៥%ប៉ុណ្ណោះដែលជាអ្នករកស៊ី និងអ្នកវិនិយោគ។ ប្រសិនបើអ្នកស្ថិតនៅក្នុងស្ថានភាពជាអ្នកធ្វើការឲ្យគេ ហើយរើបម្រាស់ខ្លួនងាកមកបើកអាជីវកម្ម អ្នកគួរតែសាកសួរ និងឆ្លើយសំនួរចំនួន ៦នេះជាមុនសិន។
១.តើអ្នកពិតជាមានមហិច្ឆតាខ្លាំងនឹងមុខជំនួញរបស់អ្នក អតិថិជន ឬបញ្ហាផ្សេង?
ចង់ធ្វើជាស្ថាបនិកអាជីវកម្មណាមួយ អ្នកត្រូវប្រាកដថា អ្នកពិតជាស្រលាញ់ដាក់ចិត្តខ្លាំងទៅនឹងមុខរបរនោះ។ អ្នកត្រូវសិក្សាស្វែងយល់ពីមុខជំនួញរបស់អ្នក អតិថិជន ឬបញ្ហាផ្សេងៗ និងត្រូវមានមហិច្ឆតាខ្លាំងទៅនឹងឱកាសដែលនឹងកើតមាននៅក្នុងអាជីវកម្មរបស់អ្នក។ ភាពខុសគ្នាពីចំណង់ និងចំណាប់អារម្មណ៍គឺថា ចំណាប់អារម្មណ៍អាចបាត់បង់បាន ខណៈដែលចំណង់ ឬមហិច្ឆតាធ្វើឲ្យអ្នកសញ្ជឹងគិតពីវាច្រើនដងក្នុងពេលមួយថ្ងៃ។ ប្រសិនបើអ្នកមានមហិច្ឆតាទៅនឹងមុខជំនួញនោះហើយ វាជារឿងល្អដែលអ្នកគួរចាប់ផ្តើមធ្វើអាជីវកម្ម។
២.តើគំនិតរបស់អ្នកអាចបង្កើតជាដំណោះស្រាយឲ្យអតិថិជនបានហើយឬនៅ?
គំនិតមួយនៅតែគ្មានតម្លៃដរាបណាអ្នកមិនបានយកវាទៅអនុវត្តឲ្យចេញជារូបរាងឡើង។ ចំណុចនេះអ្នកត្រូវមានសមត្ថភាពគ្រប់គ្រាន់ដើម្បីយកគំនិតរបស់អ្នកទៅអនុវត្តជាផលិតផល ឬសេវាកម្មណាមួយដែលអ្នកចង់បង្កើតឡើង។ អ្នកត្រូវប្រាកដថា ផលិតផល ឬសេវាកម្មដែលអ្នកបង្កើតឡើងនោះពិតជាអាចដោះស្រាយបញ្ហាណាមួយរបស់អតិថិជនបាន។
៣.តើគោលបំណងនៃការបង្កើតអាជីវកម្មដ៏ធំបំផុតរបស់អ្នកគឺអ្វី?
តើអាជីវកម្មរបស់អ្នកបង្កើតឡើងត្រឹមតែជាអ្នកចាក់ថ្នាំបំបាត់ការឈឺចាប់ ឬជាថ្នាំវីតាមីន? ជាអាជីវកម្មដែលជួយសន្សំសំចៃ ឬដើម្បីតែប្រាក់ចំណេញ? ចំណុចដ៏សំខាន់បំផុតមួយដែលអ្នកត្រូវដឹងនោះគឺថា តើផលិតផល ឬសេវាកម្មរបស់អ្នកអាចឆ្លើយតបទៅនឹងតម្រូវការរបស់អ្នកប្រើប្រាស់បានក្នុងកម្រិតណា? ប្រសិនបើអ្នកបង្កើតឡើងដើម្បីគិតតែប្រាក់ចំណេញសុទ្ធសាធ មិនផ្តល់គុណភាពដល់អ្នកប្រើប្រាស់ អ្នកនឹងទទួលបានប្រាក់ចំណេញច្រើនត្រឹមរយៈពេលខ្លីតែប៉ុណ្ណោះ។ អ្វីដែលអ្នកត្រូវចងចាំគឺថា ការបង្កើតអាជីវកម្មរបស់អ្នកមិនត្រូវស្វែងរកតែប្រាក់ចំណេញមួយមុខប៉ុណ្ណោះនោះឡើយពោលគឺត្រូវចូលរួមដោះស្រាយបញ្ហាអតិថិជនឲ្យបានជាអតិបរមា។
៤.តើជំនួញរបស់អ្នកមានទីផ្សារធំ ឬក៏កំពុងមានសក្ដានុពលដែរទេ?
នៅពេលបច្ចុប្បន្ននេះ កម្មវិធីបច្ចេកវិទ្យាប្រឆាំងទៅនឹងបទល្មើសបច្ចេកវិទ្យា គឺកំពុងមានសក្ដានុពលខ្លាំង។ ប៉ុន្តែមុខជំនួញថាសឌីសលែងមានប្រជាប្រិយភាពដូចមុនទៀតហើយ។ សម្រាប់អ្នកវិញ អ្នកត្រូវបង្កើតផលិតផល ឬ សេវាកម្មនៅក្នុងវិស័យណាមួយច្បាស់លាស់ និងកំពុងមានសក្ដានុពលខ្លាំងនៅលើ ទីផ្សារទាំងពេលនេះ និងពេលអនាគត។ ប្រសិនបើអ្នកបង្កើតមុខជំនួញមួយស្របទៅនឹងតម្រូវការនៅលើទីផ្សារ ការលះបង់ពេលវេលា ប្រាក់កាស និងកម្លាំងកាយរបស់អ្នកពិតជាមិនឥតប្រយោជន៍នោះឡើយ។
៥.តើអ្វីទៅជាចំណុចពិសេសរបស់អ្នកដែលល្អជាងគូប្រជែងរបស់អ្នក?
នៅពេលអ្នកចង់ប្រឡូកទីផ្សារជំនួញដែលមានស្រាប់នៅលើទីផ្សារ អ្នកនឹងមានគុណវិបត្តិមួយចំនួនដូចជាការចំណាយនៅពេលបើកអាជីវកម្មដំបូង និងមិនទាន់ទទួលបានការគាំទ្រច្រើនពីអតិថិជនដូចគូប្រជែងរបស់អ្នកនោះឡើយ។ ដើម្បីដោះស្រាយបញ្ហាទាំងនេះ អ្នកត្រូវធ្វើឲ្យបានលឿនជាងគូប្រជែងរបស់អ្នកឲ្យបាន១០ដង កំណត់តម្លៃទាបជាង មានគុណភាពជាង និងផ្តល់អត្ថប្រយោជន៍ច្រើនជាងគូប្រជែងរបស់អ្នក។
៦.តើអ្នកបានត្រៀមខ្លួនរួចរាល់អ្វីខ្លះសម្រាប់អាជីវកម្មរបស់អ្នក?
ការបំផុសគំនិតអាជីវកម្មឡើង និងវិធីសាស្ត្រធ្វើជំនួញរបស់អ្នក វាគ្រាន់តែជាផ្នែកមួយនៃអាជីវកម្មតែប៉ុណ្ណោះ។ តាមពិតនៅមុនពេលធ្វើជំនួញ អ្នកត្រូវត្រៀមខ្លួនច្រើនណាស់តាំងពីថវិកា ទីតាំង បុគ្គលិក ដៃគូជំនួញ និងតម្រូវការជាច្រើនទៀតជាពិសេសគឺគម្រោងធ្វើអាជីវកម្ម (Business Plan) ដែលកំណត់ពីជោគវាសនារបស់អ្នកនៅពេលខាងមុខទាំងរយៈពេលខ្លី និងរយៈពេលវែង៕
ប្រភព៖ Inc
