រាជធានីភ្នំពេញនឹងមានខណ្ឌថ្មីចំនួនពីរបន្ថែមទៀត
តាមរយៈសំណើរស្នើសុំរបស់ សម្ដេចក្រឡាហោម ស ខេង ឩបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក្នុងការបង្កើតក្រុង ស្រុក និងខណ្ឌថ្មីបន្ថែមទៀត ក្នុងគោលបំណងជួយសម្រួលដល់ការគ្រប់គ្រងប្រព័ន្ធរដ្ឋបាល រាជរដ្ឋាភិបាលកម្ពុជាបានសម្រេចចេញអនុក្រិត្យក្នុងការបង្កើតខណ្ឌថ្មីចំនួនពីរបន្ថែមទៀតនៅរាជធានីភ្នំពេញ គឺខណ្ឌបឹងកេងកង និងខណ្ឌកំបូល ។
ទីមួយខណ្ឌបឹងកេងកងនៃរាជធានីភ្នំពេញ ត្រូវបានកាត់យកសង្កាត់ចំនួន០៧ពីខណ្ឌចំការមនគឺមាន សង្កាត់បឹងកេងកង១ បឹងកេងកង២ បឹងកេងកង៣ សង្កាត់អូឡាំពិច សង្កាត់ទំនប់ទឹក សង្កាត់ទួលស្វាយព្រៃទី១ និងសង្កាត់ទួលស្វាយព្រៃទី២។ សាលាខណ្ឌចំការមនត្រូវបានផ្ទេរទីតាំងស្ថិតនៅក្នុងសង្កាត់បឹងកេងកង៣ ទៅឲ្យសាលាខណ្ឌបឹងកេងកង និងព្រំប្រទល់រដ្ឋបាលខណ្ឌកំបូល ត្រូវបានកំណត់ដូចមានក្នុងផែនទីជាឧបសម្ព័ន្ធនៃអនុក្រឹត្យនេះ។
ខណ្ឌថ្មីមួយទៀតគឺខណ្ឌកំបូលនៃរាជធានីភ្នំពេញ ដោយកាត់យកសង្កាត់ចំនួន៦ពីខណ្ឌពោធិ៍សែនជ័យនៃរាជធានីភ្នំពេញគឺ សង្កាត់កំបូល សង្កាត់កន្ទោក សង្កាត់ឱឡោក សង្កាត់ស្នោរ សង្កាត់ភ្លើងឆ្នេះរទះ សង្កាត់បឹងធំ និងកាត់យកសង្កាត់០១ពី ខណ្ឌដង្កោនៃរាជធានីភ្នំពេញគឺ សង្កាត់ប្រទះឡាង។ ខណ្ឌកំបូលមានសង្កាត់ចំនួន០៧ និងព្រំប្រទល់រដ្ឋបាលខណ្ឌកំបូល ត្រូវបានកំណត់ដូចមានក្នុងផែនទីជាឧបសម្ព័ន្ធនៃអនុក្រឹត្យនេះ។
គួរបញ្ជាក់ផងដែរថាក្រៅពីខណ្ឌថ្មីចំនួនពីរខាងលើ រាជរដ្ឋាភិបាលក៏បានចេញអនុក្រឹត្យស្ដីពីការបង្កើតក្រុង ស្រុកថ្មី ចំនួន៤បន្ថែមទៀតផងដែរគឺ ខេត្តព្រះសីហនុ បង្កើតក្រុង១ (ក្រុងកោះរ៉ុង), ខេត្តស្ទឹងត្រែងបង្កើតក្រុង១ (ស្រុកបុរីអូរស្វាយសែនជ័យ), ខេត្តកំពង់ធំបង្កើតក្រុង១ (ស្រុកតាំងគោក), និងខេត្តពោធិ៍សាត់បង្កើតក្រុង១ (ស្រុកតាលោសែនជ័យ) ដោយមានការចុះហត្ថលេខាដោយសម្តេច អគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃប្រទេសកម្ពុជា កាលពីថ្ងៃទី០៨ ខែមករា ឆ្នាំ២០១៩ កន្លងទៅនេះ៕
អត្ថបទដោយ៖ ជួប ស្រីរ័ត្ន
