ឧទ្យានច្នៃប្រឌិតវប្បធម៌កម្ពុជា-ចិន នឹងលេចរូបរាងឡើងនៅទឹកដីសៀមរាបអង្គរក្នុងឆ្នាំ២០២០ ដោយចំណាយដើមទុនប្រមាណជាង៧០លានដុល្លារ
ប្រភព៖ AKP
គម្រោងសាងសង់ ឧទ្យានច្នៃប្រឌិតវប្បធម៌កម្ពុជា-ចិនដ៏ធំមួយ មានទីតាំងស្ថិតនៅក្នុងបរិវេណ សណ្ឋាគារសុខាសៀមរាប ខេត្តសៀមរៀប ត្រូវបានក្រុមហ៊ុនចិន Yunnan Cultural Industry Investment Holding Group បណ្ដាក់ទុនវិនិយោគប្រមាណជាង៧០លានដុល្លារ ដែលគ្រោងនឹងបញ្ចប់ការសាងសង់ឲ្យរួចរាល់នៅត្រឹមឆ្នាំ២០២០ខាងមុខនេះ និងបើកឲ្យភ្ញៀវទេសចរណ៍ចូលទស្សនាឈ្វេងយល់ពីវប្បធម៌ខ្មែរ និងចិន។
ឧទ្យានច្នៃប្រឌិតវប្បធម៌កម្ពុជា-ចិន កំពុងតែបើកដំណើរការសាងសង់លើផ្ទៃដីសរុបប្រមាណ ៣,៣ហិកតា ដោយបន្ទាប់ពីសាងសង់រួច ឧទ្យាននេះនឹងក្លាយទៅជាបណ្ដុំនៃតំបន់ទេសចរណ៍បែបវប្បធម៌ ដោយរួមមាន រោងមហោស្រពញញឹមអង្គរ ចំនួន១ ៥០០កៅអី, សារមន្ទីរ Zhou Daguan, មជ្ឈមណ្ឌល វប្បធម៌សម័យចេនឡា, មជ្ឈមណ្ឌលផ្លាស់ប្តូរវប្បធម៌កម្ពុជា-ចិន, មជ្ឈមណ្ឌលពិព័រណ៍ផលិតផលវប្បធម៌ និងភោជនីយដ្ឋានជាដើម។
លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរៀបបានអោយដឹងថា ឧទ្យានច្នៃប្រឌិតវប្បធម៌កម្ពុជា-ចិន នឹងធ្វើឲ្យទំនាក់ទំនងផ្នែកវប្បធម៌កម្ពុជា-ចិនកានតែរឹងមាំ ជាពិសេសនឹងទាក់ទាញភ្ញៀវទេសចរណ៍ចិនឲ្យមកទស្សនាកម្ពុជាកាន់តែច្រើនបន្ថែមទៀព្រោះបច្ចុប្បន្ននេះ ចិនគឺជាទីផ្សារទេសចរណ៍ដ៏សំខាន់របស់កម្ពុជា។ នេះបើយោងតាមការចេញផ្សាយរបស់សារព័ត៌មានAKPកាលពីថ្ងៃទី២៦ ខែមករា ឆ្នាំ២០១៩ កន្លងទៅនេះ៕
សង្ខេបអត្ថបទដោយ៖ ជួប ស្រីរ័ត្ន
