សង្ខេបព្រឹត្តិការណ៍សេដ្ឋកិច្ចកម្ពុជាសំខាន់ៗប្រចាំសប្តាស៍
ថ្ងៃនេះ Bizkhmer សូមលើកយកនូវការសង្ខេបព្រឹត្តិការណ៍សេដ្ឋកិច្ចកម្ពុជាសំខាន់ៗចំនួន៦ ពីស្ថាប័នល្បីៗនិងគួរឲ្យទុកចិត្តចំនួន៤ គឺកាសែតភ្នំពេញប៉ុស្ដិ៍ កាសែតរស្មីកម្ពុជា កាសែតកោះសន្តិភាព និងសាព័ត៌មាន Sabay News ជូនលោកអ្នក ក្នុងគោលបំណងផ្ដល់ចំណេះដឹង ព្រមទាំងដើម្បីជួយជាជំនួយក្នុងការសម្រេចចិត្តនានាក្នុងការធ្វើអាជីវកម្មរបស់លោកអ្នក។
យោងតាមកាសែត កោះសន្តិភាព ដែលបានចេញផ្សាយកាលពីថ្ងៃទី២៣ ខែមករា ឆ្នាំ២០១៩ ស្ដីអំពីកម្ពុជានឹងធ្វើពិពិធកម្មដើម្បីរក្សាទីផ្សារអង្ករ ខណៈEUដាក់ពន្ធ3ឆ្នាំ៖ ក្នុងពេលដែលសហគមន៍អឺរ៉ុបបានដាក់ពន្ធលើការនាំចូលអង្ករពីកម្ពុជា បានធ្វើឲ្យមានការព្រួយបារម្ភពីឈ្មួញនាំចូល ហើយនឹងប៉ះពាល់ដល់កសិករផ្ទាល់តែម្ដង ។ ដើម្បីរក្សាទីផ្សារនេះឲ្យនៅតែមានភាពល្អប្រសើរដដែល ក៏ដូចជាពង្រីកទីផ្សារបន្ថែមទៀត កម្ពុជានឹងធ្វើពិពិធកម្មទីផ្សារដោយងាកទៅរកទីផ្សារថ្មីៗក្រៅអឺរ៉ុប ។ សូមចុចទីនេះដើម្បីអានព័ត៌មានលម្អិត
ដោយឡែកសម្រាប់កាសែត ភ្នំពេញប៉ុស្ដិ៍ កាលពីថ្ងៃទី២៥ ខែមករា ឆ្នាំ២០១៩ កន្លងទៅនេះបានចេញផ្សាយអំពី សហព័ន្ធស្រូវអង្ករ នឹងព្យាយាមតវ៉ាទៅអន្តរជាតិករណីអង្ករកម្ពុជា៖ សហព័ន្ធស្រូវអង្ករកម្ពុជា (CRF) បានចាត់ទុកការយកពន្ធលើការនាំចូលអង្ករកម្ពុជាទៅទីផ្សារអឺរ៉ុបថា មានលក្ខណៈឆាប់រហ័សពេក ខណៈវិស័យស្រូវអង្ករកម្ពុជា ត្រូវការពេលបន្ថែមទៀតក្នុងការពង្រឹងខ្លួន ដើម្បីមានលទ្ធភាពគ្រប់គ្រាន់ក្នុងការប្រកួតប្រជែង ដោយពឹងផ្អែកលើការអនុគ្រោះពន្ធ។ នេះបើយោងតាមសេចក្តីថ្លែងការណ៍របស់ខ្លួន។ សូមចុចទីនេះដើម្បីអានព័ត៌មានលម្អិត
តាមរយៈប្រភពខាងលើ កាលពីថ្ងៃទី២៦ ខែមករា ឆ្នាំ២០១៩ បានចេញផ្សាយស្ដីអំពី ពន្ធដារបង្ហាញពីនីតិវិធីលម្អិត ក្នុងការដាក់ពាក្យសុំការលើកលែងពន្ធ៖ អគ្គនាយកដ្ឋានពន្ធដារបានបង្ហាញពីនីតិវិធីលម្អិតសម្រាប់សហគ្រាសធុនតូច និងមធ្យម (SME) ក្នុងការដាក់ពាក្យស្នើសុំការលើកទឹកចិត្តផ្នែកពន្ធដារពីរដ្ឋាភិបាល។ នេះបើតាមសេចក្តីប្រកាសរបស់អគ្គនាយកដ្ឋានពន្ធដារដែលបានចេញផ្សាយកាលពីថ្ងៃម្សិលមិញ។ យោងតាមសេចក្តីណែនាំស្តីពីការអនុវត្តអនុក្រឹត្យស្តីពីការលើកទឹកចិត្តផ្នែកពន្ធដារសម្រាប់ SME ក្នុងវិស័យអាទិភាព អគ្គនាយកដ្ឋានពន្ធដារ បានបែងចែកលក្ខខណ្ឌជា ២ គឺទី១ សម្រាប់សហគ្រាសដែលស្នើសុំលើកលែងពន្ធលើប្រាក់ចំណូល ប្រាក់រំដោះពន្ធលើប្រាក់ចំណូល និងពន្ធអប្បបរមា និងទី២ ចំពោះសហគ្រាសដែលស្នើសុំលើកទឹកចិត្តសម្រាប់ចំណាយដែលអាចកាត់កងបាន។ សូមចុចទីនេះដើម្បីអានព័ត៌មានលម្អិត
សម្រាប់កាសែតរស្មីកម្ពុជាឯណោះវិញ កាលពីថ្ងៃទី២៥ ខែមករា ឆ្នាំ២០១៩ បានចេញផ្សាយស្ដីអំពី៖ អាមេរិកសន្យាកៀងគរធុរជនអាមេរិកកាន់តែច្រើនឲ្យចូលមកបណ្តាក់ទុននៅកម្ពុជា៖ នៅក្នុងជំនួបការងារកាលពីកន្លងទៅនេះនៅទីស្តីការ ក្រសួងពាណិជ្ជកម្ម ភាគីសហរដ្ឋអាម៉េរិកបានសន្យានឹងជួយផ្សព្វផ្សាយអំពីសក្តានុពលរបស់កម្ពុជាទៅកាន់តំបន់របស់ខ្លួន ដើម្បីកៀងគរធុរជនអាមេរិកឱ្យចូលមកបណ្តាក់ទុនកាន់តែច្រើននៅក្នុងប្រទេសកម្ពុជា សំដៅចូលរួមអភិវឌ្ឍន៍កំណើនសេដ្ឋកិច្ច និងកាត់ បន្ថយភាពក្រីក្រជាមួយរដ្ឋាភិបាលកម្ពុជា។ សូមចុចទីនេះដើម្បីអានព័ត៌មានលម្អិត
តាមប្រភពដដែលនេះដែលបានចេញផ្សាយកាលពីថ្ងៃទៃ២៥ ខែមករា ឆ្នាំ២០១៩ បានចេញផ្សាយស្ដីអំពី សេដ្ឋកិច្ចឆ្នាំ២០១៨កើនឡើង៧.៣ភាគរយមានសញ្ញាវិជ្ជមានច្រើនធៀបនិងប៉ុន្មានឆ្នាំចុងក្រោយ៖ យោងតាមលទ្ធផលបូកសរុបប្រចាំឆ្នាំរបស់ធនាគារជាតិនៃកម្ពុជាបានបង្ហាញថាកំណើនសេដ្ឋកិច្ចបានកើនឡើង៧.៣ភាគរយនៅដើមឆ្នាំ២០១៩នេះ។ កំណើននេះមានផលវិជ្ជមានច្រើនបើធៀបនិងលទ្ធផលបូកសរុបឆ្នាំមុនៗ កាលពីពេលកន្លងមក។ សូមចុចទីនេះដើម្បីអានព័ត៌មានលម្អិត
សម្រាប់ព័ត៌មានសេដ្ឋកិច្ចចុងក្រោយគឺ តាមរយៈសាព័ត៌មាន Sabay News កាលពីថ្ងៃទី២២ ខែមករា ឆ្នាំ២០១៩ បានចេញផ្សាយស្ដីអំពី ជួបសម្ដេចម្សិលមិញ ប្រធានាធិបតីចិនសម្រេចផ្ដល់ឲ្យកម្ពុជា ៣យ៉ាងសំខាន់ៗបំផុត៖ ក្នុងជំនួបពិភាក្សារវាងសម្ដេចអគ្គមហាសេនាបតីតេជោ ហ៊ុន សែន និងឯកឧត្ដម ស៊ី ជីនពីង ប្រធានាធិបតីចិន កាលពីថ្ងៃទី២១ ខែមករា ឆ្នាំ២០១៩ម្សិលមិញនេះ ឯកឧត្ដមប្រធានាធិបតីចិន បានមានប្រសាសន៍ថា នៅក្នុងឆ្នាំ២០១៩នេះ ចិននឹងបន្តនាំចូលអង្ករចំនួន៤០ម៉ឺនតោន ពីប្រទេសកម្ពុជា និងខិតខំជំរុញទំហំពាណិជ្ជកម្មនៃប្រទេសទាំងពីរកើនដល់ ១០ពាន់លានដុល្លានៅឆ្នាំ ២០២៣ ក្នុងនោះចិននឹងបន្តលើកទឹកចិត្តដល់អ្នកវិនិយោគចិន ទៅវិនិយោគនៅកម្ពុជា។ ជាមួយគ្នានេះ ប្រទេសចិននឹងផ្តល់ជំនួយឥតសំណងចំនួន ៤ពាន់លានយ័ន ស្មើនឹង៦០០លានដុល្លារ សម្រាប់រយៈពេល៣ ឆ្នាំ ពីឆ្នាំ២០១៩ ដល់ឆ្នាំ២០២១៕ សូមចុចទីនេះដើម្បីអានព័ត៌មានលម្អិត
ដកស្រង់ដោយ៖ ជួប ស្រីរ័ត្ន
