គម្រោងផ្លូវល្បឿនលឿន ភ្នំពេញ-ព្រះសីហនុ នឹងដំណើរការសាងសង់នាពេលឆាប់ៗនេះ ដោយគ្រោងចំណាយទឹកប្រាក់ជិត២០០០លានដុល្លារ
គម្រោងផ្លូវល្បឿនលឿន ភ្នំពេញ-ក្រុងព្រះសីហនុ នឹងចាប់ដាក់ដំណើរការសាងសង់នាខែកុម្ភៈ ឬដើមខែមីនា នេះបើយោងតាមប្រសាសន៍របស់ឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និង ដឹកជញ្ជូន ក្នុងកម្មវិធីបើកសន្និបាតបូកសរុបការងារសាធារណការ និង ដឹកជញ្ជូនឆ្នាំ ២០១៨ និង ទិសដៅការងារឆ្នាំ២០១៩។
ផ្លូវល្បឿនលឿននេះ គ្រោងនឹងចំណាយថវិកាប្រមាណជា ១៩០០លានដុល្លារ ដែលសាងសង់ដោយក្រុមហ៊ុនចិន ក្រោមរូបភាពវិនិយោគសាងសង់-ធ្វើអាជីវកម្ម-ផ្ទេរ (BOT)។ គម្រោងផ្លូវល្បឿនលឿននេះនឹងត្រូវ ឆ្លងកាត់ រាជធានី ខេត្តចំនួន៤ គឺមាន រាជធានីភ្នំពេញ ខេត្តកណ្តាល ខេត្តកំពង់ស្ពី និង ខេត្តព្រះសីហនុ ក្នុងនោះគឺឆ្លងកាត់ ៦ស្រុក ១ខណ្ឌ ២ក្រុង ៣១ឃុំ/សង្កាត់ និង ១១០ភូមិ។
ផ្លូវល្បៀនលឿននេះ ក្រាលបេតុងកៅស៊ូ AC មានប្រវែងសរុបជាង ១៩០គីឡូម៉ែត្រ (គិតរួមទាំងស្ពាន និងលូទាំងអស់) ហើយមានទទឹងសរុប ២៤,៥ម៉ែត្រ ក្នុងនោះមានគន្លងផ្លូវរថយន្ត (២x៣,៧៥ម៉ែត្រ) សងខាង ជាយផ្លូវកៅស៊ូ២ (២x២,៥ម៉ែត្រ) សម្រាប់ម៉ូតូ ជាយផ្លូវដីក្រហម ២(២x០,៧៥) សម្រាប់ថ្មើរជើង និងសួននៅអ័ក្សកណ្តាលទ្រូងផ្លូវ ៣ម៉ែត្រ ព្រមទាំងមានស្ពាន ៨៩កន្លែង។ នៅលើផ្លូវល្បឿនលឿននេះ មានកន្លែងឈប់សម្រាកចំនួន៤កន្លែង និង ស្ថានីយប្រេងឥន្ធនៈ ៣កន្លែង ហើយក៏មានរបងអមសងខាងផ្លូវនោះដើម្បីការពារសត្វពាហនៈឆ្លងកាត់ផងដែរ ៕
ប្រភព៖ Popular
ដកស្រង់ដោយ៖ ជួប ស្រីរ័ត្ន
