កាលមិនទាន់ស្លាប់ Steve Jobs បានផ្តាំថា ចំណុចមួយនេះហើយដែលធ្វើឲ្យមនុស្សម្នាក់ជោគជ័យខុសពីអ្នកផ្សេងទៀត
នៅក្នុងបទសម្ភាសន៍មួយកាលពីឆ្នាំ ១៩៩៥ អ្នកសម្ភាសន៍លោក Daniel Morrow បានចោទសួរទៅលោក Steve Jobs នូវសំណួរមួយដូចនេះថា "តើមានកត្តាអ្វីខ្លះដែលធ្វើឲ្យយុវជនសម័យថ្មីជោគជ័យ? អតីតស្ថាបនិកក្រុមហ៊ុន Apple រូបនេះបានថ្លែងដូច្នេះថា៖« ខ្ញុំជឿជាក់ថា មានចំណុចខុសគ្នារវាងបុគ្គលបរាជ័យ និងបុគ្គលបរាជ័យ គឺទាក់ទងទៅនឹងការខិតខំប្រឹងប្រែងព្យាយាមមិនបោះបង់»។
ការខិតខំប្រឹងប្រែង និងការតស៊ូព្យាយាម
តើអ្នកមានធ្លាប់ឃើញមនុស្សដែលខិតខំប្រឹងប្រែង និងមានការប្ដេជ្ញាចិត្តខ្ពស់តស៊ូទៅនឹងឆាកជីវិតរបស់ពួកគេដែរឬទេ? បើមាន ហេតុអ្វីម្នាក់នោះអាចជាអ្នកដែរឬទេ? ចម្លើយអាចជាអ្នក ហើយអ្នកក៏ជាមនុស្សម្នាក់ដូចលោក Steve Jobs ដែរ។
ថ្វីត្បិតតែលោកបានហែលឆ្លងការលំបាក ឧបសគ្គធំៗរាប់មិនអស់ ឬការបាក់ទឹកចិត្តប្រយុទ្ធប្រឆាំងទៅនឹងជំងឺមហារីកដ៏រ៉ាំរ៉ៃក៏ដោយ ក៏លោក Jobs យល់ថា ការតស៊ូខិតខំប្រឹងប្រែងជាមួយនឹងគោលដៅច្បាស់លាស់នឹងនាំទៅរកការសម្រេចបានលទ្ធផលនៅទីបំផុត។
កាលនៅរស់រានមានជីវិតលោក Steve Jobs ធ្លាប់លើកឡើងដូច្នេះថា៖«ប្រសិនបើអ្នកមានគ្រួសារ ហើយរាល់ថ្ងៃអ្នកក្រោកឡើងពីព្រឹកព្រលឹមប្រញាប់រួសរាន់ទៅធ្វើការ ខ្ញុំមិនអាចស្រមៃឃើញថា អ្នកអាចបែងចែកគ្រប់គ្រងជីវិត និងការងាររបស់អ្នកដោយរបៀបណានោះទេ។ ប៉ុន្តែសម្រាប់ខ្ញុំ ខ្ញុំប្រាកដខ្លួនឯងថា ខ្ញុំអាចធ្វើបាន ប៉ុន្តែវាអាក្រក់មើលបន្តិច។ អ្នកគិតទៅមើលខ្ញុំធ្វើការច្រើនជាង ៨ម៉ោងក្នុងមួយថ្ងៃ ៧ ថ្ងៃក្នុងមួយសប្តាហ៍។ ដរាបណាអ្នកមិនមានមហិច្ឆតាទេនោះ អ្នកពិតជាមិនអាចតស៊ូនឹងជីវិតការងារបែបនេះបានទេ។ អ្នកច្បាស់ជាបោះបង់ចោលហើយ»។
លោកបានបន្ថែមថា នៅខណៈពេលដែលអ្នកបានឲ្យតម្លៃដល់ខ្លួនឯង និងគ្រួសារជារឿងអាទិភាព និងសុខភាពរបស់អ្នក ការចង់ច្បាមយកភាពជោគជ័យមកអោបក្រសោបនៅក្នុងដៃ គឺវានៅតែត្រូវការការខិតខំប្រឹងប្រែង និងត្រូវធ្វើការជាច្រើនម៉ោង។ ប៉ុន្តែលោកបានបញ្ជាក់ថា អ្នកមិនអាចធ្វើការងារនោះដោយគ្មានមហិច្ឆតា ឬចំណង់ចំណូលចិត្តនោះឡើយ។ វាជារឿងសំខាន់ដែលជួយញាំងឲ្យការតស៊ូរបស់អ្នកបំផុសឲ្យមានគំនិតល្អៗ ដោះស្រាយបញ្ហាធំៗ និងធ្វើឲ្យពិភពលោកក្លាយជាទីកន្លែងល្អប្រសើរជាងមុន។ មានមហិច្ឆតា គឺជាស្មើនឹងពាក់កណ្តាលនៃចំណែកភាពជោគជ័យរបស់អ្នក។
ការតស៊ូប្រឹងប្រែងមិនអាចធ្វើឡើងត្រឹមតែម្នាក់ឯងនោះឡើយ
សម្រាប់លោក Jobes លោកបានដឹងពីរបៀបធ្វើការមួយដែលលោកអាចចែករំលែកការតស៊ូប្រឹងប្រែងនេះទៅកាន់មនុស្សផ្សេងទៀតដែលជាបុគ្គលិករបស់លោកឲ្យជួយក្រុមហ៊ុន Apple ក្លាយជាក្រុមហ៊ុនបច្ចេកវិទ្យាយក្សនៅលើពិភពលោក។ លោកបានធ្លាប់ថ្លែងកាលនៅរស់រានថា Apple រួមចំណែកដល់ពិភពលោកដោយបង្កើតមធ្យោបាយថ្មីៗជួយឲ្យមនុស្សជាតិកាន់តែមានភាពជឿនលឿនជាងមុន។
កាលនៅអាយុ ៤៤ ឆ្នាំលោកធ្លាប់បានធ្វើបទសម្ភាសន៍មួយទៅកាន់សារព័ត៌មាន Time ដោយបានថ្លែងដូច្នេះថា៖«ខ្ញុំបានស្តាប់លោក Bill Gates និយាយកាលពី ៦ខែមុន។ កាលនោះ Bill Gatesនិយាយថា លោកធ្វើការខ្លាំងណាស់កាលពី អាយុ ២០ឆ្នាំ ហើយខ្ញុំបានយល់ពីអ្វីដែលលោក Bill Gates និយាយ ពីព្រោះកាលពីអាយុ ២០ឆ្នាំ ខ្ញុំក៏ខិតខំប្រឹងប្រែងធ្វើការខ្លាំងដូចលោកដែរ។ អ្នកសាកគិតទៅ ធ្វើការ ៧ថ្ងៃមួយសប្តាហ៍ ហើយច្រើនម៉ោងក្នុងមួយថ្ងៃ។ ប៉ុន្តែខ្ញុំនៅតែរីករាយការងារទាំងនោះ ពីព្រោះខ្ញុំអាចធ្វើវាបាន»។
យ៉ាងណាមិញលោកបានបញ្ជាក់ថា អ្នកមិនចាំបាច់ប្រឹងប្រែងរហូតគ្មានទីបញ្ចប់នោះឡើយ ហើយអ្នកក៏មិនចាំបាច់ធ្វើវារហូតដែរ ពោលគឺអ្នកគ្រាន់តែបែងចែកឲ្យច្បាស់ថា តើការងារណាខ្លះគឺជារឿងអាទិភាពសម្រាប់អ្នក? ហើយអ្នកអាចធ្វើការងារនោះជាមួយមនុស្សផ្សេងទៀតបានកាន់តែច្រើន។
នៅឆ្នាំចុងក្រោយមុនពេលលោកលាចាកពីភពផែនដីនេះ លោក Jobs បានយល់ច្បាស់ពីបរិបទនៃការជ្រើសរើសមនុស្សមកធ្វើជាដៃគូការងារ។ លោកថា វាមិនមែនជាជម្រើសដ៏ត្រឹមត្រូវនោះឡើយក្នុងការជួលមនុស្សឆ្លាតមកធ្វើការ ហើយប្រាប់ពួកគេនូវការងារដែលត្រូវធ្វើ។ យើងត្រូវជួលមនុស្សឆ្លាតមកធ្វើការដើម្បីឲ្យពួកគេប្រាប់យើងថា តើយើងគួរធ្វើអ្វីវិញ?
មេរៀននេះនូវតែជាមេរៀនដ៏មានតម្លៃសម្រាប់ឲ្យថ្នាក់ដឹកនាំស្ថាប័ននានាទាំងក្រុមហ៊ុនឯងជន និងរដ្ឋមិនថា ថ្នាក់ដឹកនាំក្រុមហ៊ុនបច្ចេកវិទ្យា ធនាគារ ឬមន្ទីរពេទ្យនោះទេ។ អ្នកត្រូវធ្វើឲ្យបុគ្គលិករបស់អ្នកជាបុគ្គលិកខិតខំប្រឹងប្រែងបំពេញការងារ និងធ្វើឲ្យពួកគេមានអារម្មណ៍ថា មានភាពកក់ក្តៅ និងមហិច្ឆតាដែលនឹងអាចរួមចំណែកដល់ភាពជោគជ័យរបស់ស្ថាប័នទាំងមូល៕
ប្រភព៖ Inc
