សង្ខេបព្រឹត្តិការណ៍សេដ្ឋកិច្ចសំខាន់ៗប្រចាំសប្ដាស៍
Bizkhmer
ព្រឹត្តិការណ៍សេដ្ឋកិច្ចសំខាន់ៗចំនួន៧ ពីស្ថាប័នព័ត៌មានក្នុងស្រុកដែលគួរឲ្យទុកចិត្តចំនួន៤គឺ កាសែតកោះសន្តិភាព រស្មីកម្ពុជា ភ្នំពេញប៉ុស្តិ៍ និងសាព័ត៌មាន SabayNews ដើម្បីផ្ដល់ជាជំនួយដល់លោកអ្នកក្នុងការសម្រេចចិត្តអាជីវកម្ម ក៏ដូចជាស្វែងយល់អំពីព្រឹត្តិការណ៍សំខាន់ៗដែលកំពុងកើតឡើងក្នុងប្រទេសកម្ពុជាផងដែរ។
យោងតាមកាសែតកោះសន្តិភាពបានចេញផ្សាយកាលពីថ្ងៃទី ១២ ខែមករា ឆ្នាំ២០១៩ កន្លងទៅនេះបានចេញផ្សាយស្ដីអំពី កម្ពុជាកំពុងទទួលបានប្រយោជន៍ពីសង្គ្រាម ពាណិជ្ជកម្មអាមេរិក-ចិន៖ សង្គ្រាមពាណិជ្ជកម្មរវាងមហាយក្សសេដ្ឋកិច្ច ចិន និងអាមេរិក បាននិងកំពុងហុចផលមួយចំនួនដល់បណ្ដាប្រទេសដែលមានការអភិវឌ្ឍតិចតួច ក៏ដូចជាប្រទេសកំពុងអភិវឌ្ឍន៍នានាក្នុងតំបន់អាស៊ី ជាពិសេសអាស៊ីអាគ្នេយ៍ និងជាប្រទេសដែលកំពុងមានសក្ដានុពលខ្ពស់ក្នុងការវិនិយោគ ។ ក្នុងនោះដែរកម្ពុជាក៏ត្រូវបានគេមើលឃើញថាក៏កំពុងទទួលបានប្រយោជន៍ពីសង្គ្រាមពាណិជ្ជកម្មនេះដែរ តែទោះជាយ៉ាងណាក៏ដោយ ពាក្យថាសង្គ្រាមគឺមិនល្អនោះទេ ត្រូវតែមានការប្រយ័ត្នឲ្យបានខ្ពស់ ។ សូមចុចទីនេះដើម្បីអានព័ត៌មានលម្អិត
តាមប្រភពដដែល បានចេញផ្សាយកាលពីថ្ងៃទី១៦ ខែមករា ឆ្នាំ២០១៩ ស្ដីអំពី កម្ពុជាគ្រោងទាក់ទាញទេសចរចិន ៥លាននាក់នៅឆ្នាំ2025៖ ប្រមុខរាជរដ្ឋាភិបាលកម្ពុជា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានមានប្រសាសន៍ថា កម្ពុជាគ្រោងទាក់ទាញទេសចរចិនឲ្យបាន៥លាននាក់នៅឆ្នាំ២០២៥ខាងមុខ ។ សម្តេចតេជោបានថ្លែងបែបនេះនៅក្នុងពិធីបើកការដ្ឋានសាងសង់ផ្លូវក្រវាត់ក្រុងទី៣នាព្រឹកថ្ងៃទី១៤ មករា កន្លងមក ។ សូមចុចទីនេះដើម្បីអានព័ត៌មានលម្អិត
ប្រភពខាងលើដដែលនេះ កាលពីថ្ងៃទី១៧ ខែមករា ឆ្នាំ២០១៩ ស្ដីពី កម្ពុជាគ្រោងចំណាយ ៦,៧ ពាន់លានដុល្លារក្នុងឆ្នាំ2019នេះ៖ យោងទៅលើច្បាប់ថវិកាឆ្នាំ២០១៩ ដែលបានអនុម័តរួចហើយនោះ កម្ពុជាគ្រោងនឹងចំណាយ៦,៧ពាន់លានដុល្លារអាមេរិក ដែលមានកំណើន១១,៤% ធៀបនឹងច្បាប់ថវិកាឆ្នាំ២០១៨ ហើយក្នុងនោះដែរ កម្ពុជាមានថវិកាប្រមាណ៨០ភាគរយនៃការចំណាយ និងបានខ្ចីពីបរទេសប្រមាណតែ២០ភាគរយទៀតប៉ុណ្ណោះ ដើម្បីបង្គ្រប់សម្រាប់ការចំណាយប្រចាំឆ្នាំ ។ សូមចុចទីនេះដើម្បីអានព័ត៌មានលម្អិត
ដោយឡែកសម្រាប់កាសែតភ្នំពេញបុស្ដិ៍ កាលពីថ្ងៃទី១៨ ខែមករា ឆ្នាំ២០១៩ នេះបានចេញផ្សាយស្ដីពី អង្ករកម្ពុជា បាត់បង់សិទ្ធិរួចពន្ធនាំចូល ទៅទីផ្សារអឺរ៉ុបចាប់ពីថ្ងៃនេះក្នុងរយៈពេល ៣ ឆ្នាំ៖ អង្កររបស់កម្ពុជាបានបាត់បង់សិទិ្ធទទួលការលើកលែងពន្ធពីទីផ្សារអឺរ៉ុបជាផ្លូវការហើយ ចាប់ពីថ្ងៃសុក្រនេះតទៅ បន្ទាប់ពីសហភាពអឺរ៉ុបបានសម្រេចយកពន្ធលើអង្ករនាំចូលពីប្រទេស កម្ពុជា និងមីយ៉ាន់ម៉ា ក្រោមហេតុផលដើម្បីការពារផលប្រយោជន៍កសិករផលិតអង្ករនៅអឺរ៉ុប។ ការសម្រេចដែលបានធ្វើឡើងកាលពីថ្ងៃម្សិលមិញ និងមានប្រសិទ្ធភាពអនុវត្តចាប់ពីថ្ងៃសុក្រ ទី ១៨ នេះទៅ តម្រូវឲ្យអង្ករនាំចូលពីប្រទេស កម្ពុជា និងមីយ៉ាន់ម៉ា ត្រូវបង់ពន្ធរយៈពេល ៣ ឆ្នាំក្នុងអត្រា ១៧៥ អឺរ៉ូ (ប្រហែល ២០០ ដុល្លារ) ក្នុង ១ តោននៅឆ្នាំដំបូង និងថយចុះបន្តិចនៅឆ្នាំទី ២ និងទី ៣។ សូមចុចទីនេះដើម្បីអានព័ត៌មានលម្អិត
មួយវិញទៀត យោងតាមកាសែតរស្មីកម្ពុជា ចេញផ្សាយកាលពីថ្ងៃទី១៨ ខែមករា ឆ្នាំ២០១៨ បានចេញផ្សាយស្ដីអំពី កម្ពុជាបានលេខ៩ក្នុងចំណោមប្រទេស១០ដែលផលិតស្រូវច្រើនជាងគេលើពិភពលោក៖ ប្រទេសទាំង១០ដែលផលិតស្រូវច្រើនបំផុតលើពិភព លោក ក្នុងនោះកម្ពុជាជាប់លេខទី៩….បណ្តាប្រទេសនៅអាស៊ីផលិតស្រូវបានច្រើន ជាងគេនៅលើពិភពលោក ខណៈដែលប្រទេសនៅអាហ្វ្រិក អាមេរិកឡាទីន និង មជ្ឈិមបូព៌ាត្រូវបានគេដឹងថាបរិមាណនៃការប្រើប្រាស់អង្ករមានការកើនឡើង។ នេះបើតាមការអោយផ្សាយនៅថ្ងនេះដោយវេបសាយមួយឈ្មោះហៅថាAnnar chak។ សូមចុចទីនេះដើម្បីអានព័ត៌មានលម្អិត
តាមរៈប្រភពដដែលខាងលើ ដែលបានចេញផ្សាយកាលពីថ្ងៃទី១៨ ខែមករា ឆ្នាំ២០១៩ បានចេញផ្សាយអំពី ទុនវិនិយោគទុនរបស់ក្រុមហ៊ុនចិននៅកម្ពុជាកើនឡើងជាង ២០ពាន់លានដុល្លារអាមេរិក៖ ប្រទេសចិន បានក្លាយទៅជាដៃគូពាណិជ្ជកម្មធំបំផុតរបស់កម្ពុជា។ គិតត្រឹមឆ្នាំ២០១៨ ក្រុមហ៊ុនចិនបានដាក់វិនិយោគទុននៅកម្ពុជាប្រមាណ ជាង ២០ពាន់លានដុល្លារអាមេរិក ហើយក្រុមហ៊ុនចិន ៧០ភាគរយ ជាក្រុមហ៊ុនផលិតសម្លៀកបំពាក់ និងស្បែកជើង។ ក្រុមហ៊ុនទាំងនេះ បានផ្តល់ការងារដល់ប្រជាពលរដ្ឋកម្ពុជារាប់សែននាក់។ ជាពិសេសនៅក្នុងខេត្តព្រះសីហនុ ក្នុងតំបន់សេដ្ឋកិច្ចពិសេស បានផ្តល់ការងារជូនប្រជាពលរដ្ឋប្រមាណ ២ម៉ឺន ២ពាន់នាក់។ សូមចុចទីនេះដើម្បីអានព័ត៌មានលម្អិត
សម្រាប់ព័ត៌មានចុងក្រោយគឺ យោងតាមសាព័ត៌មានSabayNews បានចេញផ្សាយកាលពីថ្ងៃទី១៦ ខែមករា ឆ្នាំ២០១៩ កន្លងទៅនេះ បានចេញផ្សាយស្ដីអំពី សម្ដេច ហ៊ុន សែន រំពឹងថា អត្រាភាពក្រីក្រនៅកម្ពុជាថយចុះនៅសល់ត្រឹម ១០% ៖ សម្ដេច ហ៊ុន សែន ថ្លែងក្នុងកិច្ចប្រជុំវេទិកាសភាអាស៊ី-ប៉ាស៊ីហ្វិក លើកទី២៧ នៅទីក្រុងសៀមរាប ថ្ងៃទី ១៦ មករា ២០១៩ ឲ្យដឹងថា អត្រានៃភាពក្រីក្របានធ្លាក់ចុះប្រមាណ ៥៣.២% នៅឆ្នាំ២០០៤ មកនៅត្រឹមតែ ១៣.៥% នៅឆ្នាំ២០១៤។ អត្រានេះ រំពឹងថានឹងថយចុះនៅសល់ត្រឹមតែ ១០% នាពេលបច្ចុប្បន្ន។ សូមចុចទីនេះដើម្បីអានព័ត៌មានលម្អិត
