ទោះរដ្ឋាភិបាលមើលមុខគ្នាមិនសូវចំ Elon Musk ដំឡើងរោងចក្រខ្នាតយក្សនៅចិន
នាយកប្រតិបត្តិក្រុមហ៊ុន Tesla លោក Elon Musk បានប្រកាសសាងសង់រោងចក្រខ្នាតធំ Tesla Gigafactory នៅទីក្រុងសៀងហៃ ដែលជាគម្រោងធំមួយដែលលោកអាចគេចផុតបានមួយចំនួនពីក្រញាំពន្ធដែលរដ្ឋាភិបាលត្រាំ ទើបដំឡើងមកលើចិន។
រោងចក្រថ្មីនេះ ត្រូវបានប្រកាសតាំងពីខែកក្កដា ហើយការសាងសង់អាចនឹងរួចរាល់ជាស្ថាពរនៅចុងឆ្នាំ២០១៩ នេះ។ ទោះជាយ៉ាងណាផ្នែកខ្លះនៃរោងចក្រនេះអាចនឹងបម្រើការផលិតនៅរដូវក្ដៅឆ្នាំ២០១៩ នេះ។
ចំណាត់ការរបស់រដ្ឋាភិបាលអាមេរិក កាលពីខែតុលា ឆ្នាំកន្លងទៅ ដែលរដ្ឋាភិបាលចិនបានតបតធ្វើឱ្យប៉ះពាល់ដល់ក្រុមហ៊ុនផលិតរថយន្តអេឡិចត្រូនិក Tesla ខ្លាំងមែនទែន ពោលគឺពន្ធលើការនាំចូលប្រមាណ ៤០%មកលើផលិតផលរថយន្ត Tesla ខណៈក្រុមហ៊ុនផលិតរថយន្តផ្សេងទៀតទទួលរងនូវកម្រិតពន្ធតែ ១៥%ប៉ុណ្ណោះ។
រោងចក្រ Tesla ដែលមានវត្តមាននៅទីក្រុងសៀងហៃនេះ ត្រូវបានសាងសង់ក្នុងទំហំទឹកប្រាក់ ២ពាន់លានដុល្លារដែលមានសមត្ថភាពផលិតរថយន្តបានប្រមាណ ៥សែនគ្រឿងក្នុងមួយឆ្នាំសម្រាប់តែការផ្គត់ផ្គង់ក្នុងទីផ្សារចិន។
គួរបញ្ជាក់ថា Tesla មានរោងចក្រខ្នាតធំប្រភេទ Gigafactories នៅ Nevada និងនៅ Buffalo នៃទីក្រុង New York ប៉ុន្តែវត្តមាននៅសៀងហៃគឺអាចជួយបង្កើតបរិមាណរថយន្តអេឡិចត្រូនិកប្រមាណកើនឡើងពីរដង បើគិតទៅលើតួលេខនៅទូទាំងពិភពលោក៕
