ហេតុផល៣យ៉ាងសំខាន់ៗ ដែលក្រុមហ៊ុនត្រូវថ្នមបុគ្គលិក ឲ្យដូចអតិថិជន
បុគ្គលិក គឺជាកម្លាំងស្នូលរបស់ក្រុមហ៊ុន នីមួយៗ។ បើអ្នកមិនអាចគ្រប់គ្រងពួកគេឲ្យបានល្អទេនោះ ការងារក្រុមហ៊ុនទាំងមូល ប្រាកដជាត្រូវប្រឈមបញ្ហាមិនខាន។
ខាងក្រោមនេះ គឺជាហេតុផលចំនួន៣យ៉ាងដែលអ្នកត្រូវថ្នមបុគ្គលិកឲ្យដូចអតិថិជន៖
១) ដើម្បីកាត់បន្ថយអត្រានៃការចាក់ចេញ
ក្រុមហ៊ុនជាច្រើនតែងតែប្រឈមបញ្ហា នៃការចាក់ចេញរបស់បុគ្គលិក។ តាមពិតទៅបុគ្គលិកមិនចង់ចេញទៅណាទេ ប្រសិនបើក្រុមហ៊ុនអាចបង្ហាញពីការយកចិត្តទុកដាក់ចំពោះពួកគេ ដូចជាការលើកទឹកចិត្ត និង ការផ្ដល់ប្រាក់ខែសមរម្យជាដើម។ ប៉ុន្តែបើមិនដូច្នោះទេ ប្រាកដជាពួកគេចាក់ចេញមិនខាន។ ដូច្នេះហើយ ក្នុងនាមអ្នកជាម្ចាស់ក្រុមហ៊ុន ឬ អ្នកគ្រប់គ្រងត្រូវតែយកទុកដាក់ដើម្បី បញ្ចៀសបញ្ហានេះ។
២) បង្កើនផលិតភាពការងារ
ក្រុមហ៊ុន ឬ ថ្នាក់លើណាដែលយកចិត្តទុកដាក់ខ្ពស់ចំពោះបុគ្គលិករបស់ខ្លួន មានន័យថា ពួកគេកំពុងចូលរួមយ៉ាងសកម្មក្នុងការជំរុញឲ្យបុគ្គលិកបង្កើនផលិតភាពការងារកាន់តែប្រសើរជាងមុន។ បុគ្គលិកភាគច្រើន ប្រាកដជាមានការរំភើបក្នុងចិត្ត នៅពេលដែលខ្លួនទទួលបានការយកចិត្តទុកដាក់ខ្ពស់ ហើយនឹងខិតខំអស់ពីលទ្ធភាពមិនខាន។
៣) យកចិត្តទុកដាក់បុគ្គលិក នោះបុគ្គលិកនឹងយកចិត្តទុកដាក់ចំពោះអតិថិជនដែរ
នៅពេលដែលថ្នាក់លើប្រើកាយវិការ ឬ ពាក្យសម្ដីមិនសមរម្យដាក់បុគ្គលិករបស់ខ្លួន នោះបុគ្គលិកទាំងនោះក៏មិនអាចប្រើប្រាស់ពាក្យសម្ដីល្អដាក់អតិថិជននោះដែរ ព្រោះពួកគេទទួលអារម្មណ៍មិនល្អបាត់ទៅហើយ។ ដូច្នេះហើយ បើអ្នកចង់ថ្នមអតិថិជន ដំបូងឡើយត្រូវចេះថ្នមបុគ្គលិករបស់ខ្លួនសិន បើមិនដូច្នោះទេ ប្រាកដជាត្រូវជួបបញ្ហាធំមិនខាន៕
ដោយ៖ អ៊ុន ភក្តី
