មេរៀន ៦ ដែលអ្នកគួររៀនសូត្រនៅក្នុងឆ្នាំ ២០១៩ខាងមុខ
តើអ្នកបានត្រៀមខ្លួនដើម្បីផ្លាស់ប្ដូរហើយឬនៅសម្រាប់ឆ្នាំ ២០១៩ខាងមុខ? នៅពេលអ្នកមានគោលដៅត្រូវធ្វើសម្រាប់ឆ្នាំថ្មីដូចជា ពង្រីកមុខជំនួញ រកលុយបន្ថែម ឬពង្រឹងអាជីពការងារជាដើម អ្នកតែងនឹកគិតឃើញភាពជោគជ័យនឹងធ្លាក់មកលើដៃអ្នក។ ប៉ុន្តែពេលខ្លះ លទ្ធផលវាមិនអាចដូចការគ្រោងទុករបស់អ្នកទាំងស្រុងនោះទេ។ នេះអាចបណ្តាលមកពីកត្តាជាច្រើនទៀតជាពិសេសខ្លួនអ្នកផ្ទាស់ដែលមិនបានបញ្ចេញសកម្មភាពណាមួយដើម្បីសម្រេចបានគោលដៅនោះ។ ឥឡូវនេះអ្នកអាចសាកល្បងមកសិក្សាស្វែងយល់ពីមេរៀនសំខាន់ៗ ខាងក្រោមនេះដើម្បីភាពជោគជ័យឆ្នាំ ២០១៩ ខាងមុខ៖
១.ជោគជ័យ មិនអាចយកបានដោយប្រើពេលត្រឹមតែមួយយប់នោះឡើយ ត្រឹមតែមួយយប់អ្នកអាចជោគជ័យបាន គឺជារឿងបោកប្រាស់ ហើយវាមិនអាចទៅរួចនោះឡើយ។ នៅក្នុងឆ្នាំ ២០១៩ ខាងមុខ មិនចំពោះថា អ្នកព្យាយាមរកលុយ ធ្វើជំនួញ បង្កើតទំនាក់ទំនងឲ្យកាន់តែរឹងមាំ ឬ ហាត់ប្រាណដើម្បីឲ្យសុខភាពល្អយ៉ាងណាក៏ដោយ ត្រឹមតែពេលមួយយប់ អ្នកមិនអាចសម្រេចលទ្ធផលទាំងនេះដូចអ្វីដែលអ្នកចង់បាននោះឡើយ។ រៀងរាល់ថ្ងៃអ្នកត្រូវតែខិតខំប្រឹងប្រែងដើម្បីបង្កើតមូលដ្ឋានគ្រឹះនៃភាពជោគជ័យរបស់អ្នកហើយអ្វីដែលសំខាន់បំផុតអ្នកត្រូវចាប់ផ្តើមជឿជាក់លើខ្លួនឯង រៀបយុទ្ធសាស្ត្ររបស់អ្នក និងឃ្លាំមើលភាពភាពរីកចម្រើនរបស់អ្នកដើម្បីឈានទៅរកភាពជោគជ័យនៅក្នុងផ្នែកណាមួយនៃជីវិតរបស់អ្នក។
២.ការដាក់វិន័យខ្លួនឯង គឺជាកូនសោមាសឆ្ពោះទៅរកភាពជោគជ័យ ភាពមានវិន័យចំពោះខ្លួនឯង គឺមានសារៈសំខាន់ណាស់សម្រាប់កសាងជីវិតមួយដ៏មានសុភមង្គល និងសុខភាពល្អ។ ប្រសិនបើអ្នកមិនលត់ដំខ្លួនឯង ឬបង្កើតទម្លាប់ដ៏តឹងរឹងទេនោះ វានឹងបណ្តាលឲ្យអ្នកមានជំងឺផ្លូវកាយ និងផ្លូវចិត្ត។ ការឆាប់ក្រោកពីព្រលឹម ហាត់ប្រាណ ការទទួលទានអាហារឲ្យបានត្រឹមត្រូវ ការបែងចែកការងារជាអាទិភាពរបស់អ្នក ការរៀនសូត្រជំនាញថ្មីៗ ការទំនាក់ទំនង និងការចូលទទួលទានដំណេកគ្រប់គ្រាន់ គឺជាសមាសធាតុសំខាន់ៗ ដែលអ្នកត្រូវអនុវត្តឲ្យបានត្រឹមត្រូវ។ ជោគជ័យក្នុងឆ្នាំ ២០១៩ ខាងមុខ គឺផ្តើមចេញពីសកម្មភាពដ៏ហ្មត់ចត់របស់អ្នកនៅពេលនេះ។
៣.គ្រប់គ្រងហិរញ្ញវត្ថុរបស់អ្នក ដោយសារតែការចំណាយមានការកើនឡើងជាលំដាប់ និងទំនិញកាន់តែឡើងថ្លៃ មានមនុស្សច្រើនណាស់ដែលបាត់បង់ការគ្រប់គ្រងហិរញ្ញវត្ថុរបស់ខ្លួន។ ជារៀងរាល់ឆ្នាំ អ្នកប្រហែលជាសន្យានឹងខ្លួនឯងថា រកលុយឲ្យបានប៉ុណ្ណេះ ចាយត្រឹមប៉ុណ្ណេះ យកលុយទៅរកស៊ីប៉ុណ្ណោះ ឬគ្រោងចំណាយធ្វើអ្វីមួយ ប៉ុន្តែទីបំផុតការសន្យាទាំងនេះបានរលាយទៅវិញ។ នេះជាចំណុចសំខាន់ដែលអ្នកត្រូវកែប្រែវាឲ្យមានប្រសិទ្ធភាពឡើងវិញ ដោយតាមដានយ៉ាងលម្អិតពីចំណូលចំណាយ ជាពិសេសអ្វីដែលអ្នកគូរសម្រេចឲ្យបានក្នុងឆ្នាំ ២០១៩ ខាងមុខគឺភាពច្នៃប្រឌិតក្នុងការវិនិយោគលុយកាក់ ជាជាងចាយលុយច្រើនឥតប្រយោជន៍។ រកគន្លឹះធ្វើម៉េចឲ្យរកចំណូលបានច្រើនដូចជា ចាប់ដៃគូរកស៊ី ឬវិនិយោគអចលនទ្រព្យ ជាដើម។
៤.ធ្វើឲ្យបានច្រើនជាងគិត មានគំនិតច្រើន ប៉ុន្តែបើមិនអនុវត្ត វានៅតែគ្មានប្រយោជន៍។ ការគិតច្រើនជ្រុលដូចចៅចាក់ស្មុគ គឺជាការចំណាយពេលឥតប្រយោជន៍។ ប្រសិនបើអ្នកចង់ផ្លាស់ប្ដូរខ្លួនអ្នក អ្នកត្រូវធ្វើអ្វីមួយដើម្បីផ្លាស់ប្ដូរវាចេញ។ បើចង់សម្រកទម្ងន់ អ្នកត្រូវចេញទៅហាត់ប្រាណ ឬ បើអ្នកចង់មានលុយ ត្រូវធ្វើការរកស៊ី។ គំនិតបែបរវើរវាយ និងស្រមើស្រមៃគ្មានព្រំដែន វានឹងមានឥទ្ធិពលដល់ភាពជោគជ័យរបស់អ្នក។ ដូច្នេះ បើអ្នកមានគំនិត ឬ គម្រោងណាមួយហើយនោះ អ្នកត្រូវអនុវត្តឲ្យចេញជារូបរាងឡើងឲ្យក្លាយជាការពិត។
៥.បិទបញ្ចប់ទំនាក់ទំនងមិនល្អ មនុស្សម្នាក់ៗធ្លាប់ជួបបញ្ហាទំនាក់ទំនងល្អក់កករ។ ប្រសិនបើអ្នកណាម្នាក់ចាកចេញពីអ្នកនៅពេលអ្នកត្រូវការបុគ្គលនោះបំផុត នោះមានន័យថា អ្នកនោះកំពុងបាត់បង់អ្នក។ រឿងសាមញ្ញបំផុតរបស់អ្នកនៅទីនេះ អ្នកត្រូវស្វែងយល់ថា តើអ្នកមានអារម្មណ៍បែបណានៅពេលទំនាក់ទំនងជាមួយអ្នកណាម្នាក់? សូមចាំថា អ្នកត្រូវរក្សាទំនាក់ទំនងឲ្យបានល្អជាមួយអ្នកដែលជួយលើកទឹកចិត្តអ្នក ផ្តល់ក្តីសង្ឃឹមឲ្យអ្នក ធ្វើឲ្យអ្នកញញឹម និងជំរុញឲ្យអ្នកជោគជ័យ។ ទំនាក់ទំនងដែលធ្វើឲ្យអ្នកបរាជ័យ ឬបែបហុតទឹកសម្លឹងកាក អ្នកគួរបញ្ចប់វាទៅ។
៦.រៀនទទួលយកការបដិសេធន៍ ភាពភ័យខ្លាចទៅនឹងការបដិសេធន៍ពីអ្នកណាម្នាក់ គឺជារារាំងដល់សក្ដានុពលរបស់អ្នក។ ការទទួលបានការបដិសេធន៍គឺជាបទពិសោធន៍វិជ្ជមានមួយសម្រាប់អ្នក។ មានមនុស្សមិនតិចឡើយដែលត្រូវបានបដិសេធន៍ពីការងារ ឬ ត្រូវបានបដិសេធន៍ពីសំណើលើគម្រោងអាជីវកម្មជាដើម ប៉ុន្តែពួកគេនៅតែឈ្មុសឈ្មុលទៅមុខ។ ការបដិសេធន៍បន្តិចបន្តួចនេះ នឹងជំរុញឲ្យអ្នកដើរទៅមុខបានមួយជំហានទៀត ហើយនៅទីបំផុតនឹងមានមនុស្សផ្សេងទៀតព្រមទទួលយកសំណើ ឬឲ្យតម្លៃអ្នកជាមិនខាន។ គន្លឹះទាំងនេះនឹងជួយអ្នកឲ្យចាប់ផ្តើមជោគជ័យក្នុងឆ្នាំ ២០១៩ ខាងមុខ ហើយសូមចាំជានិច្ចថា ភាពជោគជ័យ ឬ បរាជ័យ គឺជាការទទួលខុសត្រូវរបស់អ្នក៕
ប្រភព៖ entrepreneur
