Bill Gate បានផ្ញើសារទៅនិស្សិតកំពុងសិក្សាឲ្យធ្វើរឿង ៦ យ៉ាងនេះ
ជាអតីតនិស្សិតម្នាក់ដែលធ្លាប់បានបោះបង់ការសិក្សានៅ Harvard ការសម្រេចចិត្តរបស់លោក Bill Gates នៅពេលនោះមិនមែនជាគំរូពិតប្រាកដសម្រាប់សិស្សនិស្សិតនោះទេ។ ប៉ុន្តែអ្នកមានជាងគេបំផុតលំដាប់ទី២នៅលើពិភពលោករូបនេះបានជោគជ័យ ខ្លាំងនៅលើមុខជំនួញរបស់លោក ហើយនៅពេលបច្ចុប្បន្នលោកកំពុងរីករាយទៅនឹងសកម្មភាពមនុស្សធម៌ដើម្បីប្រយុទ្ធប្រឆាំងទៅនឹងភាពក្រីក្រ និងជំងឺផ្សេងៗដែលគំរាមកំហែងមនុស្សរាប់លានអ្នកនៅជុំវិញពិភពលោក។ យ៉ាងណាក៏ដោយ ទោះធ្លាប់បោះបង់សាលាលោកក៏មិនភ្លេចដែរក្នុងការផ្តល់ដំបូន្មានខ្លះៗដល់សិស្សនិស្សិតដែលកំពុងសិក្សានៅថ្នាក់មហា វិទ្យាល័យដូចខាងក្រោម៖
១. វិស័យថាមពល បច្ចេកវិទ្យាឆ្លាតវៃសិប្បនិម្មិត (AI) និង ជីវសាស្ត្រនឹងមានសក្ដានុពលនៅពេលអនាគត នៅចុងឆ្នាំ ២០១៧ កន្លងទៅ លោក Bill Gates បានសរសេរសារមួយនៅលើគេហទំព័រ Twitter របស់លោកថា សិស្សនិស្សិតចូលថ្មីដែលបញ្ចប់ថ្នាក់វិទ្យាល័យ គួរចាប់ជំនាញរៀនមុខវិជ្ជាសំខាន់ៗទាំង៣ខាងលើនេះ។ លោកបានហៅមុខវិជ្ជាទាំង៣នេះថា ជាមុខវិជ្ជាដ៏មានសក្ដានុពលសម្រាប់កើបមាសកើបប្រាក់នៅពេលអនាគត។
២. រាប់អានមនុស្សដែលជួយឲ្យអ្នកជោគជ័យ នៅលើបណ្ដាញ Twitter របស់លោកដដែល លោក Bill Gates ផ្តល់ដំបូន្មានថា និស្សិតទាំងអស់គួរចំណាយពេលនៅជាមួយមនុស្សដែលជួយឲ្យពួកគេរីកចម្រើន និងមានគំនិតអភិវឌ្ឍន៍។ លោកបានបន្តថា មនុស្សម្នាក់ៗអាចដើរទៅរកទិសដៅមួយអាស្រ័យលើមនុស្សដែលពួកគេសេពគប់។ មនុស្សដែលពួកគេសេពគប់ មានឥទ្ធិពលដល់ភាពជោគជ័យ ឬបរាជ័យរបស់ពួកគេ។ បើសេពគប់មនុស្ស ត្រូវឲ្យចេះមើលមនុស្សណាដែលនាំផលល្អមកឲ្យខ្លួនឯង។
៣. ជឿជាក់ថាពិភពលោកនឹងកាន់តែប្រសើរ និងអភិវឌ្ឍល្អជាងមុន ថ្វីត្បិតតែពិភពលោកបានហែលឆ្លងឧបសគ្គជាច្រើនរាប់មិនអស់ដូចជាសង្គ្រាម ជំងឺកាចសាហាវ និងគ្រោះធម្មជាតិធំៗក៏ពិតមែន ប៉ុន្តែលោក Bill Gates ចង់ឲ្យយុវជនជានិស្សិតជំនាន់ក្រោយប្រកាន់ទស្សនៈវិជ្ជមានដោយជឿជាក់ថា ពិភពលោកមានស្ថានភាពល្អប្រសើរជាងមុន។ លោកសង្កត់ធ្ងន់ថា បើអ្នកគិតថា ពិភពលោកកាន់តែអភិវឌ្ឍ អ្នកបានចូលរួមចំណែកធ្វើឲ្យពិភពលោកកាន់តែល្អប្រសើរ។ នេះមិនមែនមានន័យថា អ្នកចង់គេចវេសពីបញ្ហាប្រឈមដែលពិភពលោកជួបប្រទះនោះទេ ប៉ុន្តែមានន័យថា អ្នកជឿជាក់ថា បញ្ហាទាំងនោះនឹងអាចដោះស្រាយបាន។
៤.មានសុទិដ្ឋិនិយម ធ្វើឲ្យមនុស្សដើរកាន់តែឆ្ងាយ សាររបស់លោក Bill Gates នៅទីនេះគឺថា ភាពសុទិដ្ឋិនិយមនាំឲ្យកើតចេញជាសកម្មភាព។ ថ្លែងនៅមុខសិស្សនិស្សិតរាប់ពាន់អ្នកនៅសាកលវិទ្យាល័យ Standford មហាសេដ្ឋីរូបនេះបានណែនាំទៅនិស្សិតថា សុទិដ្ឋិនិយមអាចជួយឲ្យមនុស្សមានភាពច្នៃប្រឌិត ចេះបង្កើតថ្មី និងអាចបង្កើតបានមធ្យោបាយថ្មីៗសម្រាប់លុបបំបាត់ចោលបញ្ហាដែលពិភពលោកប្រឈមមុខ។ លោកបន្ថែមថា បើអ្នកមិនដែលធ្លាប់ជួបមនុស្សកំពុងមានបញ្ហាទេ ភាពសុទិដ្ឋិនិយមរបស់អ្នកមិនអាចជួយពួកគេបានឡើយ។
៥.កុំខ្លាចបង្កើតកំហុស លោក Bill Gates ចូលចិត្តអានសៀវភៅយ៉ាងហោចណាស់ ៥០ ក្បាលក្នុងមួយឆ្នាំ។ លោកថា មានពេលខ្លះទស្សនៈរបស់លោកផ្ទុយពីទស្សនៈសៀវភៅទាំងនោះ ហើយពេលខ្លះទៀតលោកបានព្យាករណ៍ខុសពីលទ្ធផលដែលកើតមានឡើង។ ប៉ុន្តែលោកថា លោកមិនខ្លាចនឹងបង្កើតកំហុសនោះទេ បើគ្រាន់តែលោកចង់ចេះចង់ដឹង។ យុវជនជំនាន់ក្រោយក៏ដូចគ្នាដែរ បើមានកំហុស ត្រូវចាត់ទុកថា គឺជាមេរៀនរបស់ខ្លួន។ កំហុសធ្វើឲ្យអ្នករកឃើញវិធីត្រូវ ហើយអ្វីដែលសំខាន់តើអ្នកបានរៀនសូត្រពីវាកម្រិតណា?
៦.ចំណាយពេលគិតពីវិសមភាពសាកលលោក ជារឿយៗនៅពេលដែលលោកថ្លែងនៅ ចំពោះមុខនិស្សិត លោកតែងលើកយកប្រធានបទដែលទាក់ទងទៅនឹង វិសមភាពរវាងប្រជាជនម្នាក់ទៅកាន់ប្រជាជនផ្សេងទៀតជុំវិញការគ្រប់គ្រងទ្រព្យសម្បត្តិ សុខភាព និងធនធាន។ លោកថា នេះគឺបន្ទុកដ៏ធំមួយសម្រាប់យុវជនជំនាន់ក្រោយ ដែលត្រូវដោះស្រាយយ៉ាងណាឲ្យវិសមភាពទាំងនេះត្រូវបានកាត់បន្ថយមកកាន់កម្រិតមួយទាបបំផុតតាមរយៈការបង្កើតថ្មីជាមួយនឹងប្រព័ន្ធបច្ចេកវិទ្យាទំនើបៗ៕
ប្រភព៖ businessinsider
