បន្ទាប់ពីភាពអវិជ្ជមាននៃរបាយការណ៍ហិរញ្ញវត្ថុរបស់ក្រុមហ៊ុន GoPro ពេលនេះនាយកប្រតិបត្តិលោក Nick Woodman បានប្រកាសថា ក្រុមហ៊ុននឹងបញ្ឈប់ការលក់កាមេរ៉ាថតសកម្មភាព (action camera) ស៊េរីមួយចំនួនរួមទាំងម៉ូដែលតម្លៃថោកបំផុតរបស់ខ្លួន ដោយទុកតែ ៣ម៉ូដែលប៉ុណ្ណោះគឺ Hero 4 Black, Hero 4 Silver និង Hero 4 Seesion។
ចាប់ពីខែមេសា ខាងមុខក្រុមហ៊ុនឯកទេសផលិតកាមេរ៉ារបស់អាមេរិកនេះ នឹងបញ្ឈប់ការលក់ស៊េរីកាមេរ៉ាទាំងឡាយរបស់ខ្លួនដោយទុកតែ ៣ម៉ូដែលប៉ុណ្ណោះគឺ ម៉ូដែល Hero 4 Balck (តម្លៃ ៤៩៩,៩៩ដុល្លារ), ម៉ូដែល Hero 4 Silver (តម្លៃ ៣៩៩,៩៩ដុល្លារ) និង Hero 4 Session (តម្លៃ ១៩៩,៩៩ដុល្លារ)។
ចំណែកម៉ូដែលកាមេរ៉ាផ្សេងពីនេះ មាន Hero+ LCD (តម្លៃ ២៩៩,៩៩ដុល្លារ), Hero+ (តម្លៃ ១៩៩,៩៩ដុល្លារ) និង Hero ធម្មតា (តម្លៃ ១២៩,៩៩ដុល្លារ) នឹងត្រូវលក់បញ្ចុះតម្លៃ។ យ៉ាងណាលោក Woodman មិនបានអះអាងនូវម៉ូដែលកាមេរ៉ាថ្មី Hero 5 ដែលក្រុមហ៊ុននឹងប្រកាសចេញក្នុងឆ្នាំ២០១៦ នេះនៅឡើយ។
របាយការណ៍ហិរញ្ញវត្ថុរបស់ GoPro បង្ហាញថា ក្រុមហ៊ុនអាចរកចំណូលនៅត្រីមាសទី៤ ឆ្នាំ២០១៥ បាន ៤៣៦,៦លានដុល្លារអាមេរិក ធ្លាក់ចុះ ១% បើប្រៀបធៀបនឹងត្រីមាសដដែលកាលពីឆ្នាំ២០១៤៕
