សង្ខេបព្រឹត្តិការណ៍សេដ្ឋកិច្ចកម្ពុជាសំខាន់ៗប្រចាំសប្ដាហ៍
ដូចសប្ដាហ៍សព្វមួយដង ថ្ងៃនេះគេហទំព័រ Bizkhmer សូមធ្វើការសង្ខេបជូនលោកអ្នកនូវព្រឹត្តិការណ៍សេដ្ឋកិច្ចសំខាន់ៗក្នុងប្រទេស ដើម្បីផ្ដល់ជាដំណឹង និងដើម្បីជួយសម្រួលដល់ការធ្វើអាជីវកម្មរបស់លោកអ្នក ដោយក្នុងនោះ Bizkhmerបានដកស្រង់ចេញពីសាព័ត៌មានក្នុងស្រុកល្បីៗ និងគួរឲ្យទុកចិត្តចំនួន ៥ គឺ កាសែតភ្នំពេញប៉ុស្ដិ៍ រស្មីកម្ពុជា កោះសន្តិភាព និង Khmer Time។
តាមរយៈការចុះផ្សាយរបស់គេហទំព័រសារព័ត៌មាន Khmer Times ដែលចេញផ្សាយកាលពីថ្ងៃទី១៥ ខែវិច្ឆិកា ឆ្នាំ២០១៨ ស្ដីអំពីក្រុមហ៊ុនចិន នឹងដំឡើងរោងចក្រនៅតំបន់សេដ្ឋកិច្ចពិសេសខេត្តព្រះសីហនុ។ ក្រុមហ៊ុនផលិតឧបករណ៍អគ្គិសនីចិន បានប្រកាសផែនការសាងសង់រោងចក្រមួយនៅក្នុងតំបន់សេដ្ឋកិច្ចពិសេសនៅក្រុងព្រះសីហនុ។ នៅក្នុងកិច្ចប្រជុំ កាលពីថ្ងៃអង្គារជាមួយលោក ចម ប្រសិទ្ធ រដ្ឋមន្រ្តីក្រសួងពាណិជ្ជកម្ម លោក Hongjian Wang ប្រធានក្រុមហ៊ុន Suzhou Zhongchu Puhua Electric Tecnology Co. , Ltd បានឱ្យដឹងថា ក្រុមហ៊ុនរបស់លោកកំពុងពិចារណាវិនិយោគនៅតំបន់សេដ្ឋកិច្ចពិសេសខេត្តព្រះសីហនុ (SSEZ)។ សូមចុចត្រង់នេះដើម្បីអានព័ត៌មានលម្អិត
ដោយឡែក សម្រាប់កោះសន្ដិភាព ដែលបានចេញផ្សាយកាលពីថ្ងៃទី១៦ ខែវិច្ឆិកា ឆ្នាំ២០១៨ ស្ដីអំពី ដំណាច់ត្រីមាសទី3 ទុនវិនិយោគកម្ពុជាមានទឹកប្រាក់ជិត ៥ពាន់លានដុល្លារ។ ដំណាច់ត្រីមាសទី៣ឆ្នាំនេះ ទំហំទុនវិនិយោគនៅកម្ពុជាសម្រេចបានទឹកប្រាក់ជិត ៥ពាន់លានដុល្លារអាមេរិក ដែលគម្រោងវិនិយោគទាំងនោះបានបង្ហាញថា អ្នកវិនិយោគចិននៅតែនាំមុខគេនៅប្រទេសកម្ពុជា ។ យោងតាមទិន្នន័យពីក្រុមប្រឹក្សាអភិវឌ្ឍន៍កម្ពុជា(CDC) បានឱ្យដឹងនាព្រឹកថ្ងៃទី១៤ វិច្ឆិកា ម្សិលមិញថា កម្ពុជាទទួលបានគម្រោងវិនិយោគសរុបចំនួន ១៧០នៅក្នុងរយៈពេល ៩ខែ ដើមឆ្នាំ២០១៨នេះ ដែលគិតជាទឹកប្រាក់មានចំនួនជាង ៤,៧ពាន់លានដុល្លារ ។ ក្នុងចំណោមគម្រោងវិនិយោគនោះ មានគម្រោងក្រៅតំបន់សេដ្ឋកិច្ចពិសេសចំនួន១១៤ ដែលគិតជាទឹកប្រាក់ចំនួន ៤ពាន់លានដុល្លារ និងគម្រោងក្នុងតំបន់សេដ្ឋកិច្ចពិសេសមានចំនួន ៥៦គម្រោង ដែលគិតជាទឹកប្រាក់សរុបចំនួនជិត ៧០០លានដុល្លារ ។ សូមចុចត្រង់នេះដើម្បីអានព័ត៌មានលម្អិត
តាមរយៈស្ថាប័នដដែលនេះ ដែលបានចេញផ្សាយកាលពីថ្ងៃទី១៥ ខែវិច្ឆិកា ឆ្នាំ២០១៨ ស្ដីអំពី ថៃបោះទុន១០លានដុល្លារសង់ផ្សារទំនើប Big C នៅក្រុងប៉ោយប៉ែត។ ក្រុមហ៊ុនដ៏ធំរបស់ថៃ បានសម្រេចបោះទុនប្រមាណ១០លានដុល្លារ ដើម្បីវិនិយោគសាងសង់ផ្សារទំនើប Big C នៅក្រុងប៉ោយប៉ែត ។ អ្នកវិនិយោគក្នុងស្រុក លោក សុខ ហ៊ាង បានថ្លែងប្រាប់សារព័ត៌មានកោះសន្តិភាព កាលពីល្ងាចថ្ងៃទី១២ ខែវិច្ឆិកា កន្លងមកថា លោកបានជួបជាមួយអ្នកវិនិយោគថៃរួចហើយ ពួកគេបានប្រាប់ថាផ្សារទំនើបនេះ នឹងចាប់ផ្តើមសាងសង់នៅអំឡុងខែធ្នូខាងមុខ ហើយភាពយឺតយ៉ាវនៃការសាងសង់ផ្សារនេះ ដោយសារក្រុមហ៊ុនមិនទាន់ទទួលបានអាជ្ញាប័ណ្ណពីរាជរដ្ឋាភិបាលកម្ពុជា។ លោកបន្តថា ៖« តាមខ្ញុំបានជួបជាមួយអ្នកវិនិយោគថៃបានឲ្យដឹងថា ផ្សារទំនើបនេះ នឹងសាងសង់លើផ្ទៃដី ២,៥ហិកតា ក្នុងនោះដីសម្រាប់សាងសង់ផ្សារមានទំហំ ១,៥ហិកតា និងដី១ហិកតាទៀតបម្រុងទុកសម្រាប់ចំណតយានយន្ត។ លោកបន្តថា ៖« ផ្សារនេះស្ថិតនៅក្នុងសង្កាត់ប៉ោយប៉ែត ក្រុងប៉ោយប៉ែត នៅជាប់នឹងគម្រោង Empire »។ សូមចុចត្រង់នេះដើម្បីអានព័ត៌មានលម្អិត
ដោយឡែកសម្រាប់សាព័ត៌មានភ្នំពេញបុស្ដិ៍ បានចេញផ្សាយកាលពីថ្ងៃទី ១៦ ខែវិច្ឆិកា ឆ្នាំ២០១៨ ស្ដីអំពី កម្មវិធីលើកកម្ពស់តម្លៃស្រូវ ដំណើរការជាផ្លូវការ។ គម្រោង BlocRice ដែលបង្កើតឡើងដើម្បីពង្រឹងតម្លាភាពក្នុងជំនួញស្រូវ-អង្ករ តាមរយៈការប្រើប្រាស់បច្ចេកវិទ្យា BlockChain ដើម្បីតភ្ជាប់កសិករទៅចង្វាក់ផ្គត់ផ្គង់សកល ត្រូវបានប្រកាសដាក់ឲ្យដំណើរការជាផ្លូវការកាលពីថ្ងៃព្រហស្បតិ៍ដោយរំពឹងថា នឹងជួយធ្វើឲ្យកសិករទទួលបានតម្លៃកសិផលរបស់គេខ្ពស់ជាងមុន។ គម្រោងនេះត្រូវបានផ្តួចផ្តើមឡើងដោយអង្គការ Oxfam កម្ពុជា ដោយមានភាគីចូលរួមជាកសិករដាំស្រូវសរីរាង្គ ក្រុមហ៊ុនកែច្នៃនាំចេញ ក្រុមហ៊ុនផលិតផលិតផលពីអង្ករនៅប្រទេស ហូឡង់ និងអ្នកទិញ។ សូមចុចត្រង់នេះដើម្បីអានព័ត៌មានលម្អិត
ចំពោះសាព័ត៌មាន រស្មីកម្ពុជា ដែលបានចេញផ្សាយកាលពីថ្ងៃទី១៧ ខែវិច្ឆិកា ឆ្នាំ២០១៨ បានចេញផ្សាយអំពី កម្ពុជា -ប៊ុលហ្គារី ចុះហត្ថលេខាលើអនុស្សរណៈយោគយល់គ្នាស្តីពីកិច្ចសហប្រតិបត្តិការវិស័យទេសចរណ៍៖ ដោយៈមូលសម្បត្តិ/ភ្នំពេញ:តបតាមការអញ្ជើញរបស់លោកស្រី Nikolina Angelkova រដ្ឋមន្ត្រីក្រសួងទេសចរណ៍នៃសាធារណរដ្ឋប៊ុលហ្គារី លោក ថោង ខុន រដ្ឋមន្ត្រីក្រសួងទេសចរណ៍ និងគណៈប្រតិភូក្រសួង បានចូលរួម សមាជអន្តរជាតិលើកទី២ ស្តីពីអរិយធម៌ពិភពលោក និងខ្សែទស្សនកិច្ចប្រវត្តិសាស្ត្រ (The 2nd International Congress on World Civilization and Historical Routes) ដែលរៀបចំឡើងក្រោមកិច្ចសហការរបស់អង្គការទេសចរណ៍ពិភពលោក និងរដ្ឋាភិបាលប៊ុលហ្គារី (ក្រសួងទេសចរណ៍ប៊ុលហ្គារី) កាលពីថ្ងៃទី១៥ និង១៦ ខែវិច្ឆិកា ឆ្នាំ២០១៨។ សូមចុចត្រង់នេះដើម្បីអានព័ត៌មានលម្អិត៕
អត្ថបទ៖ ជួប ស្រីរ័ត្ន
