ការព្យាករណ៍សេដ្ឋកិច្ចសំខាន់ៗរបស់ពិភពលោកចំនួន ៦ នៅក្នុងរយៈពេល ១ទសវត្សខាងមុខ
នៅក្នុងរយៈពេល ១០ឆ្នាំខាងមុខ ពិភពលោកនឹងបោះជំហានទៅក្នុងបរិបទថ្មីមួយដែលការប្រកួតប្រជែងភូមិសាស្ត្រនយោបាយ និងសេដ្ឋកិច្ចកាន់តែខ្លាំងឡើងៗជាពិសេសអំពីអនាគតមហាអំណាចអាមេរិកនៅលើឆាកអន្តរជាតិ ខណៈដែលចិននឹងក្លាយជាមហាអំណាចសេដ្ឋកិច្ចថ្មី។ ខាងក្រោមនេះគឺជាការព្យាករណ៍សំខាន់ៗនៃសេដ្ឋកិច្ចសាកលលោកនៅរយៈពេល១ទសវត្សខាងមុខ៖
១)សេដ្ឋកិច្ចអាមេរិកនឹងស្ទុះងើបឡើងវិញ
ធនាគារកណ្តាលអាមេរិក (Federal Reserve) បានព្យាករណ៍ថា កំណើនសេដ្ឋកិច្ចក្នុងស្រុករបស់ខ្លួននឹងមានកំណើន២,៤% នៅក្នុងឆ្នាំ ២០១៩ ខាងមុខ។ នេះជាកំណើនល្អបំផុតមួយដែលស្ថិតនៅក្នុងចន្លោះពី ២ ទៅ ៣% ។
២) បំណុលអាមេរិកនឹងកើនឡើងបន្តទៀត
បំណុលអាមេរិកត្រូវបានគេមើលឃើញថា នឹងកើនលើស ២១ ពាន់ពាន់លានដុល្លារនៅឆ្នាំ២០១៨ នេះ ។ វាអាចនឹងមានស្ថិរភាពប្រសិនបើរដ្ឋាភិបាលសហព័ន្ធតម្រូវឱ្យកាត់បន្ថយចំនួន ១០% នៃការចំណាយសរុបរបស់ថវិកាជាតិនៅក្នុងឆ្នាំ ២០២១ ខាងមុខ ។ យ៉ាងណាមិញគម្រោងនេះ អាចនឹងត្រូវបានលុបចោលក្រោមការដឹកនាំអាណត្តិប្រធានាធិបតី Donald Trump។ ប្រធានាធិបតីរូបនេះបានសន្យាថា នឹងកាត់បន្ថយបំណុល ប៉ុន្តែគោលនយោបាយរបស់លោកអាចនឹងធ្វើឲ្យបំណុលរបស់ខ្លួនកើនឡើង ៥,៦ ពាន់ពាន់លានដុល្លារបន្ថែមទៀត។
៣) សករាជថ្មីនៃមហាយក្សចិននឹងចូលមកដល់
ចិនត្រូវបានគេចាត់ទុកថា ជាមហាអំណាចសេដ្ឋកិច្ចធំបំផុតលំដាប់ទី២ នៅលើពិភពលោកបន្ទាប់ពីសហរដ្ឋអាមេរិក។ ប៉ុន្តែកាលពីឆ្នាំ ២០១៤ កន្លងទៅ ប្រទេសនេះត្រូវបានគេដាក់ឈ្មោះថា ជាមហាអំណាចសេដ្ឋកិច្ចធំបំផុតនៅលើពិភពលោក។ ថ្វីត្បិតតែកំណើនសេដ្ឋកិច្ចរបស់ខ្លួនបានធ្លាក់ចុះពី២ ខ្ទង់មកត្រឹម ៧% ជារៀងរាល់ឆ្នាំ ប៉ុន្តែនៅពេលបច្ចុប្បន្នមហាអំណាចមួយនេះកំពុងពង្រីកឥទ្ធិពលទាំងនយោបាយ និងសេដ្ឋកិច្ចកាន់តែធំឡើងដែលនឹងធ្វើឲ្យប៉ះពាល់ដល់ផលប្រយោជន៍អាមេរិកជាងមុន។ ហេតុផលមួយដ៏សំខាន់នោះគឺថា បំណុលអាមេរិកជំពាក់ចិននៅតែមានចំនួនច្រើនជាងបំណុលអាមេរិកជំពាក់ប្រទេសផ្សេងទៅទៀត ហើយថ្វីត្បិតតែ ឱនភាពពាណិជ្ជកម្មរវាងមហាអំណាចទាំងពីរកំពុងធ្លាក់ចុះក៏ដោយ ក៏វានៅតែមានទំហំធំនៅឡើយ។
៤) ប្រាក់ដុល្លារនឹងបន្តធ្លាក់ចុះទៀត
ចាប់តាំងពីធនាគារកណ្តាលពង្រឹងគោលនយោបាយរូបិយប័ណ្ណរបស់ខ្លួនជាបន្តបន្ទាប់តាំងពីឆ្នាំ ២០១៤ ២០១៥ និង ២០១៦ កន្លងទៅក៏ដោយ ក៏តម្លៃប្រាក់ដុល្លារនៅតែមានសញ្ញាណមិនល្អប៉ុន្មាននោះទេក្នុងឆ្នាំ ២០១៧ និង ឆ្នាំ ២០១៨ នេះ។ អ្នកជួញដូររូបិយប័ណ្ណតាមប្រព័ន្ធអេឡិចត្រូនិក (Forex) សប្បាយចិត្តក្នុងការជួញដូរប្រាក់ដុល្លារនៅពេលដែលធនាគារកណ្តាលបានដំឡើងអត្រាការប្រាក់ ប៉ុន្តែការដំឡើងអត្រាការប្រាក់ធ្វើឡើងក្នុងអត្រាមួយដ៏យឺតបំផុត ហេតុដូច្នេះហើយអ្នកជួញដូរកំពុងចាប់អារម្មណ៍ងាកទៅជួញដូររូបិយប័ណ្ណផ្សេងទៀត។
វិនិយោគិនបរទេសកំពុងព្រួយបារម្ភខ្លាំងអំពីបំណុលដ៏ច្រើនសន្ធឹកសន្ធាប់របស់អាមេរិក។ ពួកគេយល់ថា រដ្ឋាភិបាលទីក្រុងវ៉ាស៊ីនតោនកំពុងមានចេតនាធ្វើឲ្យប្រាក់ដុល្លារធ្លាក់ថ្លៃដើម្បីឱ្យតម្លៃប្រាក់បំណុលជាតិរបស់ខ្លួនធ្លាក់ចុះ។ នេះបានជំរុញឲ្យអ្នកបង្វិលពីការកាន់កាប់សាច់ប្រាក់ដុល្លារមកជាទ្រព្យសម្បត្តិវិញកាន់តែច្រើនឡើង។
៥) តម្លៃប្រេងនិងហ្គាស៍នឹងឡើងវិញ
កាលពីឆ្នាំ ២០១៤ កន្លងទៅ តម្លៃប្រេងឆៅធ្លាក់ថ្លៃខ្លាំងដោយសារតែប្រាក់ដុល្លារឡើងថ្លៃ ខណៈដែលក្រុមហ៊ុនប្រេងអាមេរិកបានបង្កើតផលិតប្រេងឆៅបន្ថែមទៀតដែលជាលទ្ធផលធ្វើឲ្យតម្លៃប្រេងធ្លាក់ថ្លៃខ្លាំង ហើយជាលទ្ធផលវាបានធ្លាក់ថ្លៃដល់កម្រិតទាបបំផុតមិនធ្លាប់មាននៅក្នុងរយៈពេល ១៣ ឆ្នាំ ដោយលក់ចេញ ២៦ ដុល្លារក្នុងមួយបារ៉ែលកាលពីឆ្នាំ ២០១៦។ ប៉ុន្តែការជួយជ្រោមជ្រែងពីអង្គការ OPEC ចាប់តាំងពីឆ្នាំ ២០១៧ មក បានធ្វើឲ្យតម្លៃប្រេងឡើងថ្លៃមកកាន់កម្រិតមួយក្នុងរង្វង់ ៧០ ដុល្លារក្នុងមួយបារ៉ែល។
មន្ទីរព័ត៌មានថាមពលអាមេរិក (EIA) បានបង្ហើបពីទស្សនវិស័យមួយនៃអនាគតតម្លៃប្រេងសាំង និងហ្គាស៍ចាប់ពីឆ្នាំ ២០១៨ នេះតទៅដល់ឆ្នាំ ២០៤០។ ស្ថាប័ននេះបានព្យាករណ៍ថា តម្លៃប្រេងនឹងឡើងថ្លៃជាមធ្យម ៥៧ ដុល្លារឡើងទៅដល់ ៧០ ដុល្លារក្នុងមួយបារ៉ែលនៅក្នុងឆ្នាំ ២០១៨ នេះ។ វានឹងឡើងថ្លៃ ៩៥ ដុល្លារក្នុងឆ្នាំ ២០៣០ និង ១១៤ ដុល្លារក្នុងឆ្នាំ ២០៥០ ដោយសារតែនៅពេលនោះការផលិតប្រេងអាមេរិកនឹងធ្លាក់ចុះច្រើន។
៦) គោលនយោបាយវាតទីនិយមអាមេរិកនឹងធ្លាក់ចុះ
បំណុលចំនួន ២១ ពាន់ពាន់លានដុល្លារមានន័យថា អាមេរិកពិតជាមិនអាចមានលទ្ធភាពធ្វើសង្គ្រាមលើសមរភូមិយោធាជុំវិញពិភពលោកដូចពេលបច្ចុប្បន្នទៀតបានទេ។ នៅខែមិថុនាឆ្នាំ២០១៨ កន្លងទៅ ព្រឹទ្ធសភាអាមេរិកបានបោះឆ្នោតបង្កើនថវិកាយោធា ៨២ ពាន់លានដុល្លារបន្ថែមទៀតសម្រាប់ឆ្នាំ ២០១៩ ខាងមុខដែលចំនួនសរុបបានកើនដល់ ៧១៦ ពាន់លានដុល្លារ ឬប្រហែល ១៧% នៃថវិកាជាតិសម្រាប់វិស័យការពារជាតិ។
មន្ត្រីយោធាកំពូលៗរបស់ខ្លួនបានលើកឡើងថា ការបង្កើនទឹកប្រាក់សម្រាប់ការចំណាយលើវិស័យការពារជាតិគឺជាដង្ហើមដើម្បីឲ្យអាមេរិកមានឥទ្ធិពលលើភូមិសាស្ត្រនយោបាយអន្តរជាតិក្នុងការឆ្លើយតបទៅនឹងវិបត្តិសកលលោក។ ប៉ុន្តែវាកំពុងក្លាយជាប្រធានបទដ៏ចម្រូងចម្រាសដោយសារតែសាធារណជនយល់ថា ការចំណាយនេះឥតប្រយោជន៍ និងធ្វើឲ្យបំណុលជាតិកាន់តែកើនឡើង៕
ប្រភព៖ thebalance
