អត់ដឹងថា គួរសន្សំប្រាក់បានប៉ុន្មាននៅវ័យនីមួយៗ ប្រើរូបមន្តនេះអាចជួយអ្នកបាន!
ការសន្សំប្រាក់សម្រាប់ពេលអនាគតគឺជាគោលដៅអាទិភាពមួយដើម្បីជោគជ័យហិរញ្ញវត្ថុ។ អ្នកកាន់តែឆាប់សន្សំប្រាក់ វាកាន់តែល្អបំផុតសម្រាប់អ្នក។ ប៉ុន្តែមានសំនួរមួយសួរឡើងនោះគឺថា តើអ្នកគួរសន្សំប្រាក់ក្នុងចំនួនប៉ុន្មានទើបល្អប្រសិនបើអ្នកឈានដល់វ័យ ៣០ ៤០ ឬ ៦០? សំនួរនេះត្រូវបានលោក David Bach អ្នកនិពន្ធសៀវភៅលក់ដាច់បំផុតមួយគឺ "The Automatic Millionaire” និង "Smart Women Finish Rich” របស់អាមេរិកលើកយកមកពន្យល់ពីរបៀបសន្សំប្រាក់ឲ្យបាននៅក្នុងចំនួនមួយទៅតាមអាយុនីមួយៗ។ យោងតាមរូបមន្តរបស់លោក David លោកបានតាំង (X) ជាចំនួនប្រាក់សន្សំនៃប្រាក់ខែរបស់អ្នក ហើយត្រូវយកប្រាក់សន្សំនោះទៅគុណនឹងចំនួនដងដែលកំណត់ដោយរូបមន្តនេះទៅតាមអាយុរបស់អ្នក។
ឧទាហរណ៍ថា នៅអាយុ ៣០ ឆ្នាំអ្នកមានប្រាក់សន្សំទុក ១៥ ០០០ ដុល្លារ។ ដូចនេះគេអាចគណនាដូចតទៅនេះ៖ -អាយុ ៣០ ឆ្នាំ= ១៥ ០០០ x ១= ១៥ ០០០ ដុល្លារ -អាយុ ៣៥ ឆ្នាំ= ១៥ ០០០ x ២= ៣០ ០០០ ដុល្លារ -អាយុ ៤០ ឆ្នាំ= ១៥ ០០០ x៣= ៤៥ ០០០ ដុល្លារ -នៅអាយុ ៦៧= ១៥ ០០០ x ១០= ១៥០ ០០០ ដុល្លារ។ លោក David Bach បានបន្ថែមថា ប្រាក់សន្សំជាមូលដ្ឋាននៅអាយុ ៣០ តិចឬច្រើនគឺអាស្រ័យលើជីវភាព និងវដ្ដចំណូលចំណាយរបស់អ្នក។ បើអ្នកយល់ថា ចំនួននេះនៅស្តួចស្តើងនៅឡើយ អ្នកអាចបង្កើនប្រាក់សន្សំឲ្យបានច្រើនជាងនេះទៀត ពោលគឺអ្នកសន្សំបានកាន់ច្រើនគឺកាន់តែល្អ។ លោកបន្តថា ការវិនិយោគមិនដែលយឺតពេលនោះទេ ហើយពេលវេលាដ៏ល្អបំផុតគឺត្រូវចាប់ផ្តើមពីឥឡូវនេះ។ យ៉ាងណាមិញចំពោះអ្នកដែលឈានជើងដល់វ័យ ៤០ ឬ ៥០ ឆ្នាំហើយតែមិនមានលុយសន្សំដូចរូបមន្តនេះទេនោះ លោកបានលើកទឹកចិត្តថា ត្រូវប្រញាប់សន្សំឲ្យបានច្រើន ហើយបើអាចរកចំណូលឲ្យបានច្រើនបន្ថែមដើម្បីប៉ះប៉ូវនូវការខកខានសន្សំប្រាក់តាំងពីអាយុ ៣០ មក៕
ដោយ៖ សូរ៉ាន់ដារ
