នេះហើយជាផ្នត់គំនិតដ៏ពេញនិយមបំផុតចំនួន ៩ របស់ «អ្នកក្រ»!
បើយោងតាមអ្នកជំនាញដែលបានសិក្សាស្រាវជ្រាវលើអ្នកមានជាច្រើនរូបបានរកឃើញថា ភាពមានបានគឺចាប់ផ្តើមឡើងចេញពីគំនិត។ មុនពេលអ្នកកសាងទ្រព្យសម្បត្តិដ៏ស្តុកស្តម្ភមួយបាន អ្នកត្រូវជឿថា អ្នកអាចធ្វើវាបាន។ នេះបើយោងតាមការលើកឡើងរបស់លោក Steve Siebold អ្នកនិពន្ធសៀវភៅដ៏ល្បីល្បាញ "How Rich People Think”។ នៅក្នុងសៀវភៅរបស់លោក លោក Steve បានបង្ហាញនូវផ្នត់គំនិតមួយចំនួនខាងក្រោមនេះដែលជាផ្នត់គំនិតដ៏អន់ថយមួយរបស់អ្នកក្រ។ ផ្នត់គំនិតទាំងនេះហើយដែលបានធ្វើឲ្យអ្នកក្រពិបាកងើបផុតពីភាពក្រីក្រមិនអាចកសាងទ្រព្យសម្បត្តិឲ្យដូចអ្នកមានបាន។
១.គិតថា មានស្ថិតនៅលើសំណាង អ្នកក្រភាគច្រើនយល់ថា មានស្ថិតនៅលើសំណាងដែលនេះជាការយល់ខុសមួយដ៏ធ្ងន់។ សម្រាប់អ្នកមានយល់ថា ពួកគេមានសេរីភាពដើម្បីក្លាយជាអ្នកមាន ហេតុដូច្នេះហើយភាពមានបានអាចកសាងឡើងបានដោយបង្កើតតម្លៃមួយបម្រើឲ្យអ្នកដទៃ។ អ្នកមានជាមនុស្សពូកែដោះស្រាយបញ្ហា។ បើពួកគេអាចដោះស្រាយបញ្ហាឲ្យអ្នកដទៃ ធ្វើឲ្យអ្នកដទៃកាន់តែងាយស្រួលជាងមុន ពួកគេនឹងអាចរកលុយបានពីអ្នកទាំងនោះ។
២.គិតថា រកលុយជារឿងដ៏គួរឲ្យស្មុកស្មាញបំផុត អ្នកក្រទូទៅចូលចិត្តនិយាយថា រកលុយលំបាក និងស្មុគស្មាញខ្លាំងណាស់។ អ្នកក្រតែងនិយាយទៀតថា អ្នកមានឆ្លាតជាងខ្លួន សំណាងជាងខ្លួន ឬបានអប់រំខ្ពស់ជាងខ្លួន។ គ្មានទស្សនៈណាមួយក្នុងចំណោមទស្សនៈទាំងនេះត្រឹមត្រូវនោះឡើយ។ ការពិតអ្នកមានយល់យ៉ាងច្បាស់ថា លុយគឺហូរចេញពីគំនិត និងការដោះស្រាយបញ្ហាឲ្យអ្នកដទៃ។ បើពួកគេមានគំនិតសមត្ថភាពដោះស្រាយបញ្ហាបានកាន់តែធំ ពួកគេនឹងរកលុយបានកាន់តែធំ។ រកលុយមិនមែនជារឿងងាយស្រួល តែវាសាមញ្ញ។ គ្មានឡើយអាថ៌កំបាំងក្លាយជាអ្នកមាន ប៉ុន្តែផ្នត់គំនិតអវិជ្ជមានរបស់មនុស្សម្នាក់ មិនអាចធ្វើឲ្យពួកគេមានបាន។
៣.គិតថា ចង់មានត្រូវតែឆ្លាតបំផុត ដោយសារតែមនុស្សធម្មតាយល់ថា អ្នកមានជាមនុស្សឆ្លាត ទើបពួកគេតែងប្រាប់ខ្លួនឯងរហូតថា ខ្លួនល្ងង់ដើរមិនឆ្ងាយ ទៅមិនដល់បានត្រឹមតែប៉ុណ្ណឹង។ មនុស្សភាគច្រើននៅតែយល់ដែរថា ចង់មានលុះត្រាតែរៀននៅ សាលាថ្លៃៗ ឬរៀនឲ្យបានពូកែបំផុត។ ការពិតមិនមែនដូច្នេះនោះឡើយ ព្រោះថាការកសាងភាពមានបានវាមិនទាមទារឲ្យអ្នកជាមនុស្សឆ្លាតបំផុត ហើយត្រូវមានពិន្ទុល្អនៅសាលានោះដែរ។ បើអ្នកសំបូរគំនិតផ្តល់ដំណោះស្រាយ ឬផ្តល់សេវាកម្មដល់អ្នកដទៃឲ្យបានកាន់តែច្រើន អ្នកនឹងឃើញទ្រព្យកើនឡើងបន្តិចម្តងៗ។
៤.គិតថា ខំប្រឹងធ្វើការនឹងក្លាយជាអ្នកមាន សម្រាប់អ្នកមាន នេះជារឿងមួយដ៏គួរឲ្យអស់សំណើច។ អ្នកត្រូវយល់ថា បើអ្នកមានជាមនុស្សគិតតែខំធ្វើការ នោះប្រហែលជាកម្មករសំណង់ អ្នកថែសួន អ្នកជូតតុទាំងអស់ដែលខំធ្វើការធ្ងន់ៗច្រើនម៉ោងសឹងគ្មានពេលសម្រាកនឹងក្លាយជាអ្នកមានអស់ទៅហើយ។ រឿងពិតមិនមែនអ្នកមានមិនខំប្រឹងប្រែងធ្វើការនោះទេ។ ប៉ុន្តែការខិតខំប្រឹងប្រែងធ្វើការរបស់អ្នកមានគឺ ការរកមធ្យោបាយយកឈ្នះគូប្រជែង និងស្វែងរកគំនិតបែបណាដើម្បីមានសមត្ថភាពអាចទាញលុយចេញពីហោប៉ៅអ្នកដទៃបាន។
៥.គិតថា មានមិនមែនជារឿងសំខាន់ ផ្នត់គំនិតអវិជ្ជមានមួយរបស់អ្នកក្រគឺតែងបណ្តែតបណ្តោយឲ្យភាពមានបានរសាត់អណ្ដែតចេញពីខ្លួនដោយសារតែយល់ថា ខ្លួនគ្មានវាសនាអាចក្លាយជាអ្នកមាននឹងគេ។ នេះបានធ្វើឲ្យពួកគេគិតថា ភាពមានបានហាក់មិនមែនជារឿងមួយសំខាន់នោះឡើយ។ ដោយឡែកសម្រាប់អ្នកមានវិញអ្នកត្រូវយល់ថា ពួកគេមិនចុះចេញរឿងនេះឡើយ។ អ្នកមានចូលចិត្តបង្កើតអ្វីមួយដើម្បីរកលុយពីគំនិត និងសមត្ថភាពរបស់ខ្លួន។ ភាពមានបានគឺជាក្តីសុបិន្ដរបស់អ្នកមាន តែពួកគេប្ដេជ្ញាចិត្តថា ត្រូវតែធ្វើឲ្យបាន។
៦.គិតថា ទាល់តែមានលុយទើបរកលុយបាន អ្នកនឹងសង្កេតឃើញថា អ្នកក្រតែងនិយាយថា ចង់ធ្វើអ្វីមួយត្រូវតែមានលុយ។ បើចង់រកស៊ីត្រូវមានដើមទុនឲ្យច្រើនសិនចាំរកស៊ី។ ប៉ុន្តែការពិតនោះគឺគំនិតនោះទេជាអ្នកបង្កើតលុយ។ មានគំនិតហើយទើបមានលុយ លុយមិនអាចបង្កើតគំនិតបានទេ។ គំនិតនេះគឺសំដៅលើសមត្ថភាពអាចជួយដោះស្រាយបង្ហារបស់អ្នកដទៃបានឲ្យកាន់តែងាយស្រួល។ អ្នកមានមានវិធីសាស្ត្រចេះប្រើលុយអ្នកដទៃដើម្បីកសាងទ្រព្យសម្បត្តិរបស់ខ្លួន។ អ្នកមានយល់ថា មិនខ្វះទេអ្នកមានលុយចង់ចូលរួមជាមួយខ្លួន បើខ្លួនមានគំនិតល្អៗដើម្បីកសាងជំនួញរកលុយ។
៧.គិតថា រកលុយបានកាន់តែច្រើន មានបញ្ហាកាន់តែច្រើន ការយកលេសដ៏ធំមួយទៀតរបស់មនុស្សធម្មតាគឺគិតថា អ្នកមានជាមនុស្សវក់វីនឹងការងារ មិនសូវមានពេលសម្រាក គិតតែពីរកលុយ ជួបបញ្ហាជាច្រើនជំពូក មិនដឹងខំយកទៅណា ស្លាប់ទៅយកលុយដាក់តាមខ្លួនមិនកើតដដែល។ តាមការពិតអ្នកមានបានដឹងទៅហើយថា ភាពក្រីក្រជាឧបសគ្គ។ ដូចនេះបើគេមានលុយច្រើន លុយនឹងអាចជួយដោះស្រាយបានភាគច្រើនដែលអ្នកក្រមិនអាចធ្វើបាន។ ពួកគេមានសេរីភាពហិរញ្ញវត្ថុ ចង់ទៅកន្លែងដែលចង់ទៅ ចង់នៅកន្លែងដែលខ្លួនចង់នៅ ចង់ទិញរបស់ដែលខ្លួនចង់បាន។
៨.គិតថា អ្នកមានកើបយកលុយអស់ហើយ នៅក្នុងផ្នត់គំនិតអ្នកក្រយល់ថា អ្នកមានកាន់តែមានៗឡើងដោយសារតែអ្នកមានបានអោបក្រសោបការងារនៅជុំវិញខ្លួនអស់ទៅហើយ ដែលធ្វើឲ្យអ្នកក្រពិបាកប្រកួតប្រជែងជាមួយអ្នកមានណាស់។ នេះជាគំនិតមួយខុសទាំងស្រុក ត្បិតអីអ្នកមាននៅតែប្រកាន់ទស្សនៈមួយថា រកលុយគ្មានដែនកំណត់ទេ។ មានគំនិតកាន់តែច្រើន លុយហូរចូលកាន់តែច្រើន។
៩.គិតថា ពេញចិត្តត្រឹមតែអ្វីដែលខ្លួនមាន វាជារឿងធម្មតាទៅហើយដែលអ្នកគ្មានលុយតែងនិយាយថា មិនបាច់មានលុយច្រើននោះទេក៏អាចរស់បាន។ រកបានប៉ុណ្ណាចាយប៉ុណ្ណឹង។ ទៅចង់មានបានពេកធ្វើអី ពេញចិត្តអ្វីដែលខ្លួនមាន ធ្វើតាមសមត្ថភាពរបស់ខ្លួនគឺគ្រប់គ្រាន់ណាស់ទៅហើយ។ បើគេសួរថា តើសុភមង្គល និងលុយ រើសយកមួយណា? អ្នកក្រនឹងឆ្លើយថា រើសយកសុភមង្គល ឬ យកលុយ។ ប៉ុន្តែអ្នកមានវិញនឹងជ្រើសរើសយកទាំងពីរ។ នេះមានន័យថា អ្នកមានចូលចិត្តធ្វើឲ្យបានសម្រេចនូវអ្វីដែលខ្លួនចង់បាន មិនបិទផ្លូវខ្លួនឯងមិនឲ្យដើរនោះឡើយ៕
ប្រភព៖ cnbc
