ម្ចាស់អាជីវកម្មមុ គួរ​យល់ដឹងពីទ្រឹស្តីទីផ្សារអាជីវកម្មដែលមានឈ្មោះ​ថា​ Marketing Mix ៤Ps សំរាប់ទីផ្សារផលិតផល និង៧Ps សំរាប់ទីផ្សារសេវាកម្ម។ ប្រសិនបើមិនដឹងវា ច្បាស់ ឬទាំងស្រុងទេ នោះអ្នកនឹងបាត់បង់នូវគ្រឿងផ្សំសំខាន់ៗមួយ ចំនួន​ដើម្បីភាព​រីកចម្រើន​ទៅ​មុខ​ជា​និរន្ត​​នៃ​អាជីវកម្ម​របស់​ខ្លួន​ក៏​អាច​ថា​បាន។ ​

ក្នុងនិយមន័យរបស់ទ្រឹស្តីទីផ្សារអាជីវកម្ម វា​ហាក់​បី​ដូច​ជា​សាមញ្ញ​មែន​ទែន។ ជា​ពិសេស​សម្រាប់​អ្នក​ដែល​បាន​បញ្ចប់​ការ​សិក្សា​នៅ​មហាវិទ្យាល័យ ប្រហែល​ជា​ធ្លាប់​បាន​ឮ​ច្រើន​លើក​ច្រើន​សារ​ ប៉ុន្តែ​ប្រហែល​ជា​មិន​សូវ​ដឹង​ច្បាស់​ថា​ ​វា​ឆ្លុះ​បញ្ចាំង​នឹង​ផលិតផល​ ឬ​សេវាកម្ម​ពិត​ប្រាកដ​យ៉ាង​ណា។

មែន​ទែន​ទៅ ទ្រឹស្ដី​  Marketing Mix 4Ps ឬ 7Ps វាសំដៅ​ទៅ​ដល់​ការ​ដាក់​ចេញ​នូវ​ផលិតផល ឬ​សេវាកម្ម​ឱ្យ​ត្រូវ​សម្រាប់​អតិថិជន​គោលដៅ ចំពេល​វេលា និង​ចំ​កាលៈទេសៈ​នៃ​តម្រូវ​ការ។​ ទ្រឹស្ដី Marketing Mix មាន​ច្រើន​ទម្រង់ និង​ច្រើន​ផ្នែកដូច​ជា​៖

១). ផលិតផល(Product) ផលិតផល ​សំដៅទៅលើរបស់របរបង្កើតឡើងឬ​ផលិត​ឡើង​ដើម្បីបំពេញតម្រូវការរបស់មនុស្សជាក់លាក់មួយក្រុម ឬ​​ច្រើន​ក្រុម។ ផលិតផល អាចជាអរូបី និងរូបី ហើយ​ក៏អាច​ស្ថិត​នៅ​ក្នុងទម្រង់​នៃ​ សេវាកម្មឬទំនិញ។ អ្នកត្រូវតែធានាឱ្យមានប្រភេទផលិតផលដែលត្រឹមត្រូវទៅតាមតម្រូវការទីផ្សាររបស់អ្នក។ ដូច្នេះក្នុងអំឡុងពេលដំណាក់កាលអភិវឌ្ឈន៍ផលិតផល អ្នកទីផ្សារត្រូវតែធ្វើការស្រាវជ្រាវយ៉ាងទូលំទូលាយលើវដ្ត​របស់ផលិតផលដែលពួកគេកំពុងបង្កើត។ ផលិតផលមួយមានវដ្ដ​ជាក់លាក់មួយដែលរួមបញ្ចូលដំណាក់​កាល​នៃ​កំណើន ដំណាក់កាលឆ្អែត និងដំណាក់កាលឆ្លាក់ចុះនៃការលក់។ វាមានសារៈសំខាន់ណាស់សម្រាប់អ្នកធ្វើទីផ្សារដើម្បីកែច្នៃផលិតផលរបស់ពួកគេ​ ជំរុញតម្រូវការកាន់តែច្រើននៅពេលដែលវាឈានដល់ដំណាក់កាលនៃការធ្លាក់ចុះ។ អ្នកទីផ្សារក៏ត្រូវ​ការ​បង្កើតផលិតផលចម្រុះឈ្លាសវៃក្នុងការពង្រីកផលិតផលបច្ចុប្បន្នរបស់អ្នកដោយធ្វើពិពិធកម្ម និងបង្កើនភាពខ្លាំងនៃចង្វាក់ផលិតកម្មរបស់អ្នក។ សរុបសេចក្តីមក អ្នកទីផ្សារទាំងអស់ដាច់ខាត់សួរខ្លួនពួកគេថា “តើខ្ញុំអាចផ្តល់ផលិតផលល្អប្រសើរជាងគូប្រកួតប្រជែងអ្វីខ្លះ”? ក្នុងការអភិវឌ្ឈផលិតផលត្រឹមត្រូវ អ្នកត្រូវតែឆ្លើយសំនួរខាងក្រោម:

១) តើអតិថិជនចង់បានអ្វីពីសេវាកម្មរឺផលិតផល? ២) តើអតិថិជននឹងប្រើប្រាស់វាដោយរបៀប​ម៉េច? ៣) តើអតិថិជននឹងប្រើប្រាស់វានៅកន្លែងណា? ៤) តើលក្ខណៈពិសេស​បែប​ណា​ដែលផលិតផលត្រូវតែមាន ដើម្បីបំពេញតម្រូវការរបស់អតិថិជន? ៥) តើមានលក្ខណៈចាំបាច់អ្វីដែលអ្នកខកខាន? ៦) តើអ្នកកំពុងបង្កើតលក្ខណៈពិសេសដែលអតិថិជនមិន​ត្រូវការដែរ​ ឬទេ? ៧) តើផលិតផលឈ្មោះអ្វី? ៨) តើឈ្មោះហ្នឹងវាងាយស្រួលចាំ ឬ​គេ​ស្គាល់​ដែររឺទេ? ៩) តើទំហំនិងពណ៌របស់វាមិចដែរ? ១០) តើភាពខុសគ្នាពីផលិតផលរបស់អ្នកនឹងផលិតផលរបស់គូប្រកួតប្រជែងរបស់អ្នកដោយរបៀបណា? ១១) តើផលិតផល​ឬ​សេវាកម្ម​នោះ មានលក្ខណៈដូចម្តេច? ការ​រចនា​ឡើង​ស្អាត​ប៉ុណ្ណា?​​

២). តម្លៃ (PRICE) តម្លៃនៃផលិតផល​ ​ជា​​ទឹកប្រាក់ ដែលអតិថិជន​​មាន​ឆន្ទៈ​ក្នុង​ការ​ចំណាយ​ទៅ​លើ​​ផលិតផល​ ឬ​សេវាកម្ម។ តម្លៃគឺជាធាតុផ្សំដ៏សំខាន់នៃនិយមន័យ ទ្រឹស្តីទីផ្សារអាជីវកម្ម។ វាក៏ជាធាតុផ្សំដ៏សំខាន់មួយនៃផែនការធ្វើទីផ្សារដើម្បីឈានទៅកំណត់ប្រាក់ចំណេញ និងចំណុចរួចខ្លួនរបស់ក្រុមហ៊ុនរបស់អ្នកផងដែរ។ ការកែតម្រូវតម្លៃផលិតផល​ មានផលប៉ះពាល់យ៉ាងធំធេងទៅលើយុទ្ធសាស្រ្តទីផ្សារទាំងស្រុងព្រមទាំងជះឥទ្ធិពលយ៉ាងខ្លាំងដល់ការលក់ និងតម្រូវការរបស់ផលិតផល។ ​វា​ជា​ការងារ​ដែលគួរឲ្យស្មុគស្មាញ​សម្រាប់​អ្នក​ធ្វើ​ទីផ្សារ ឬ​ម្ចាស់​អាជីវកម្ម​ ប្រសិនបើក្រុមហ៊ុនមួយថ្មីទៅក្នុងទីផ្សារ ឬ​នៅមិនទាន់បានដាក់ឈ្មោះនៅឡើយ​ទេ នោះ​ទីផ្សារ​​ ឬ​អតិថិជនគោលដៅ​របស់អ្នក គាត់នឹងមិនមានឆន្ទៈក្នុងការចំណាយថវិការខ្ពស់លេីផលិតផលនោះទេ។

ថ្លៃទំនិញ​ អាច​ឆ្លុះ​បញ្ចាំង​អំពីផលិតផលរបស់អ្នកនៅក្នុងកែវភ្នែករបស់អ្នកប្រើប្រាស់។ ​អ្នក​គួរ​ចាំ​ថា​ ​ស្ថាន​ភាព​មួយ​ចំនួន​​ តម្លៃទាបជាធម្មតា មានន័យថា​ ជាទំនិញគុណភាពមិនល្អនៅក្នុងការមេីលឃើញរបស់អ្នកប្រើប្រាស់ បើគាត់បៀបធៀបទៅគូប្រកួតប្រជែងរបស់អ្នក។ ​ដោយ​ឡែកបើ​តម្លៃដែលខ្ពស់ពេក នឹងធ្វើឲ្យការចំណាយច្រើនលើសពីផលប្រយោជន៍​ដែល​ទទួល​បាន​   ក្នុងកែវភ្នែករបស់អតិថិជន ដែល​ពួក​គេ​អាច​នឹងស្ទាក់ស្ទ័រ​។ ហេតុដូចនេះហេីយ ពួកគេនឹងឲ្យតម្លៃទៅលើប្រាក់របស់ពួកគេជាងផលិតផលរបស់អ្នក។ ត្រូវប្រាកដថា ​​អ្នក​ត្រូវពិនិត្យមើលតម្លៃរបស់គូប្រកួតប្រជែង និងតម្លៃដែលសមស្របតាមហាងឆេង​ហើយ​ចាប់​កំណត់​តម្លៃ​ផលិតផល​ឬ​សេវាកម្ម​របស់​អ្នក។នៅពេលកំណត់តម្លៃទំនិញ អ្នកទីផ្សារគួរពិចារណាថា តម្លៃដែលគាត់យល់ឃើញហ្នឹងវាសមស្របនឹង ផលិតផលដែលផ្តល់ជូនទៅឬអត់។

នេះគឺជាសំណួរសំខាន់មួយចំនួនដែលអ្នកគួរសួរខ្លួនឯងនៅពេលអ្នកកំពុងចង់កំណត់តម្លៃផលិតផល៖ ១) តើអ្នកត្រូវចំណាយប៉ុន្មានដើម្បីផលិតទំនិញហ្នឹង? ២) តើអតិថិជនយល់ឃើញ​បែប​ម៉េច​ទៅ​លើ​ទំនិញ​របស់​អ្នក?  តើតម្លៃបច្ចុប្បន្នរបស់ផលិតផល អាច​ខ្ពស់​ជាង​ ឬ​ទាប​ជាង​ តម្លៃ​របស់​គូប្រគួតប្រជែង?

៣. ទីកន្លែង (PLACE) ឬ​ការ​ចែក​ចាយ​ ទីកន្លែងឬ​ច្រក​ចែកចាយ គឺជាផ្នែកមួយដ៏សំខាន់នៃនិយមន័យផលិតផលចម្រុះ អ្នកត្រូវរៀបចំ និងចែកចាយផលិតផលទៅកន្លែងណាដែល​អតិថិជន​មានសក្តានុពល​មាន​តម្រូវ​ការ​ និង​អាច​ស្វែង​រកបាន​ដោយ​ងាយ។ នេះភ្ជាប់មកជាមួយ​នូវ​ការយល់ដឹងយ៉ាងជ្រាលជ្រៅអំពីទីផ្សារគោលដៅរបស់អ្នក។ ​ប្រសិន​បើ​អ្នក​ស្គាល់​ពី​អតិថិជន​គោលដៅ​របស់​អ្នក​កាន់​តែ​ច្បាស់​​ នោះអ្នកនឺងអាចរកឃើញ នូវទីកន្លែង​ និង​បណ្តាញ​ ឬ​ច្រក​ចែកចាយ​ តដ៏មានប្រសិទ្ធិភាព ​បៀបដូចជាអ្នកកំពុងលក់ផ្ទាល់ជាមួយទីផ្សាររបស់អ្នកតែម្តង។

​យុទ្ធសាស្រ្តចែកចាយ​មួួ​យ​ចំនួន​ដែល​អ្នក​គួរ​តែ​ពិចារណាដូច​ជា​៖ ១) ការពឹងផ្អែក​លើ​តំណាងចែកចាយ​ ២) តំណាងចែកចាយផ្តាច់មុខ ៣) សិទិ្ធលក់បន្ត ៤) តើអតិថិជនរបស់អ្នករកមើលសេវាកម្មឬផលិតផលរបស់អ្នកនៅកន្លែងណា? ៥) តើអតិថិជនរបស់អ្នករកមើលសេវាកម្មឬផលិតផលរបស់អ្នកនៅ​ពេល​ណា? ៦) តើហាងបែបណាខ្លះដែលអតិថិជនសក្តានុពលអញ្ញើញចូលទៅ? ពួកគេចូលផ្សារធំៗ ផ្សារទំនើប ឬតាមហាងតូចៗតាមដងផ្លូវ និងតាមបណ្តាអនឡាញ។ ៧) តើអ្នកទាក់ទងបណ្តាចែកចាយខុសគ្នាដោយរបៀបណា? ៨) តើយុទ្ធសាស្រ្តចែកចាយរបស់អ្នកខុសគ្នាពីដៃគូប្រកួតប្រជែងរបស់អ្នកយ៉ាងដូចម្តេច? ៩) តើអ្នកត្រូវការកម្លាំងលក់ខ្លាំងដែរឬទេ? ១០) តើអ្នកត្រូវការលក់នៅក្នុងហាងតាមអនឡាញដែរឬទេ? ១១) តើអ្នកត្រូវការចូលរួមក្នុងពិព័រណ៍ពាណិជ្ជកម្មដែរឬទេ?

៤. ការផ្សព្វផ្សាយ(PROMOTION) ការផ្សព្វផ្សាយ​គឺជាធាតុផ្សំដ៏សំខាន់នៃទីផ្សារព្រោះវាជួុយបង្កើនឈ្មោះម៉ាក​យីហោ​​ដ៏​សំខាន់ ​និង​ការ​បង្កើន​ការលក់។ ការផ្សព្វផ្សាយ មានផ្នែកផ្សេងៗ​ជាច្រើនដូចជា៖ ១) ​ផ្សាយ​តាម​មធ្យោបាយ​ប្រពៃណី Traditional ដូច​ជា​ទូរទស្សន៍ វិទ្យុ ទស្សនាវដ្ដី កាសែត  ២) ទំនាក់ទង​សាធារណៈ កម្មវិធី​តាំង​ពិរពណ៌ កម្មវិធី​ផ្សេងៗ ៣) ចរន្តបែប​ទំនើប ឌីជីថល​មេឌៀរ Facebook ឬ  Online Media.  ៤) តាម​មធ្យោបាយ​ផ្សេងៗ​ទៀត​ដូច​ជា​ Billboard ឬ​ Outdoor ជាទូទៅ ការផ្សព្វផ្សាយគ្របដណ្តប់លើវិធីសាស្រ្ត ទំនាក់ទំនងដែលត្រូវបានបង់ថ្លៃទៅលើផ្សព្វផ្សាយពាណិជ្ជកម្មតាមទូរទស្សន៍ វិទ្យុ បោះពុម្ពផ្សាយដូចជាកាសែតនិងទស្សនាវដ្តី តាមប្រព័ន្ធអីុនធឺណិត។ ក្នុងសម័យកាលបច្ចុប្បន្ន ហាក់ដូចជាមានការផ្លាស់ប្តូរការពីផ្តោតលើប្រព័ន្ធមិនមែនអុីនធឺណេតទៅជាប្រព័ន្ធអុីនធឺណេតលើពិភពលោក។

ផ្ទុយទៅវិញទំនាក់ទំនងសាធារណៈគឺជាទំនាក់ទំនងដែទូទៅ​ដោយ​គ្រាន់​តែ​បង់​ចំណាយ​តិច​តួច​ រួមបញ្ចូលទាំងការចេញផ្សាយព័ត៌មាន ការតាំងពិពណ៌ ​កម្មវិធី Sponsorship សិក្ខាសាលាសន្និសីទ និងព្រឹត្តិការណ៍ផ្សេងៗ។ ពាក្យសម្តីនិយាយតៗគ្នាពីមាត់ ១ ទៅមាត់ ១ (word of mouth) ក៏ជាប្រភេទនៃការធ្វើការផ្សេព្វផ្សាយផលិតផលមួយផងដែរ។ ការនិយាយតៗគ្នាគឺជាការប្រាស្រ័យទាក់ទងក្រៅផ្លូវការអំពីអត្ថប្រយោជន៍របស់ផលិតផលដោយអតិថិជនពេញចិត្ត និងបុគ្គលផ្ទាល់ខ្លួនធម្មតា។ បុគ្គលិកផ្នែកលក់ដើរតួនាទីយ៉ាងសំខាន់ក្នុងការទំនាក់ទំនងសាធារណៈ និងធ្វើអោយមានការនិយាយតៗគ្នាពីផលិតផលរបស់យើង។ ពាក្យសម្ដីនិយាយតៗគ្នា ក៏អាចផ្សាយនៅលើអុីនធឺណែត​បាន​ផង​ដែរ។ ទទួលបានប្រសិទ្ធិភាពហើយវាមានសក្តានុពលក្នុងការក្លាយជាទ្រព្យសម្បត្តិដ៏មានតម្លៃបំផុតមួយដែលអ្នកអាចបង្កើនប្រាក់ចំណេញទៅលើបណ្តាញអនឡាញ។,

ក្នុងការបង្កើតយុទ្ធសាស្រ្ត លើកកម្ពស់ផលិតផលប្រកបដោយប្រសិទ្ធភាពអ្នកត្រូវឆ្លើយសំណួរដូចខាងក្រោម: ១) តើអ្នកអាចផ្ញើសារពាក្យពេជចន៍ក្នុងការធ្វើទីផ្សារទៅអតិថិជនសក្តានុពលរបស់អ្នកយ៉ាងដូចម្តេច? ២) តើពេលណាដែលជាពេលវេលាដ៏ល្អបំផុតដើម្បីផ្សព្វផ្សាយផលិតផលរបស់អ្នក? ៣) តើអ្នកអាចទៅចាប់យកទស្សនិកជន និងអ្នកទិញដែលមានសក្តានុពលរបស់អ្នកតាមរយៈការ ផ្សព្វផ្សាយតាមទូរទស្សន៍ដែរឬទេ? ៤) តើវាល្អបំផុតក្នុងការប្រើប្រាស់បណ្តាញសង្គមក្នុងការជំរុញផលិតផលឬទេ? ៥) តើយុទ្ធសាស្រ្តផ្សព្វផ្សាយគូប្រជែងរបស់អ្នកគឺជាអ្វីខ្លះ?