កម្មវិធី​បារខែមអាស៊ាន​ ២០១៨ បាន​ធ្វើ​ឡើង​នៅ​រាជធានីភ្នំពេញ​នៃ​ប្រទេស​កម្ពុជា​ នឹង​ទើប​តែ​បាន​បញ្ចប់​កាល​ពី​ថ្ងៃ​ទី​២១ ខែតុលា ឆ្នាំ​២០១៨​ កន្លង​ទៅ ​នា​វិទ្យាស្ថាន​បច្ចេកវិទ្យាកម្ពុជា​ ដោយ​បាន​បំបែក​កំណត់​ត្រា​ក្លាយ​ជា​កម្មវិធី​ធំជាង​គេ​បំផុត​នៅ​ក្នុង​ពិភព​លោក​ដែល​មាន​អ្នក​ចូល​រួម​ច្រើន​ជាង​ ៨០០០នាក់​ នឹង​បាន​យក​ឈ្នះ​កំណត់​ត្រា​ចាស់​គឺ​បារខែម​យ៉ាំងហ្គូន​នៃ​ប្រទេស​ភូមា ដែល​មាន​អ្នក​ចូល​រួម​ប្រមាណ ៦៤០០​នាក់​កាល​ពី​ខែ​មករា ឆ្នាំ​២០១៣។   បារខែមកម្ពុជា​ ដោយ​មាន​ការ​គាំ​ទ្រ​ពី​ ក្រសួង​ប្រៃសណីយ៍ និង​ទូរគមនាគមន៍ និង​ក្រសួង​អប់រំយុវជន​និង​កីឡា បាន​រៀប​ចំ​នៅ​កម្មវិធី​បារខែម​អាស៊ាន​២០១៨ ស្តី​អំពី​ "សន្និបាត​បច្ចេកវិទ្យា និង​ការ​ចាប់​ផ្ដើម​អាជីវកម្ម" លើក​ទី១១​ លើ​ប្រធាន​បទ " Powering Your Future " ក្រោម​អធិបតីភាព​ ឯកឧត្តម កាន ច័ន្ទមេត្តា រដ្ឋលេខាធិការ នៃ​ក្រសួង​ប្រៃសណីយ៍ និង​ទូរគមនាគមន៍។ ដោយ​ក្នុង​នោះ​ផង​ដែរ​ក៏​មាន​ការ​ពី​សំណាក់​វាគ្មិន​ជំនាញ​ចំនួន​៩៥​រូប​ ជា​មួយ​នឹង​ប្រធាន​បទ​ចំនួន​៨៥​ប្រធាន​បទ។ គួរ​បញ្ជាក់​ផង​ដែរ​ថា ​កម្មវិធី​បារខែម​អាស៊ាន​ ២០១៨​នេះ ប្រារព្ធ​ឡើង​ក្នុង​គោល​បំណង​ធ្វើ​ការ​ជួបជុំ​រវាង​សិស្ស​និស្សិត, Tech Startups, បុគ្គលិក​ក្រុមហ៊ុន​ ម្ចាស់​អាជីវកម្ម​ និង​អ្នក​ជំនាញ​ដើម្បី​ពិភាក្សា​ ចែក​រំលែក​បទ​ពិសោធន៍​និង​ចំណេះ​ដឹង​ ដល់​សិស្ស​និស្សិត​ អាជីវកម្ម​ធុន​តូច​និង​មធ្យម បុគ្គលិក​ក្រុមហ៊ុន បុគ្គលិក​សហគ្រាស​នានា​និង​មហាជន​ទូទៅ​អំពី​ បច្ចុប្បន្ន​ភាព​នៃ​បច្ចេកវិទ្យា សេដ្ឋកិច្ច ធនធាន​មនុស្ស ហិរញ្ញវត្ថុ ទីផ្សារ ការ​ឆ្នៃ​ប្រឌិត និង​ជំនាញ​ឌីជីថល ក្នុង​ប្រទេស​កម្ពុជា​ក៏​ដូច​ជា​ក្នុង​តំបន់៕ អត្ថបទ ៖ ជួប ស្រីរ័ត្ន