ហេតុអ្វីអ្នកគួរទទួលទានតែបៃតងក្ដៅអ៊ុនៗ ១កែវមុនចូលគេង?
ទទួលទានតែបៃតងក្ដៅៗអ៊ុនៗ ១ កែវមុនពេលចូលគេងត្រូវបានគេរកឃើញថា មានអត្ថប្រយោជន៍ជាច្រើនសម្រាប់សុខភាពរបស់យើង។ វាសម្បូរទៅដោយសារធាតុប្រឆាំងនឹងអុកស៊ីតកម្ម និងជីវជាតិបំប៉នជាច្រើនប្រភេទដែលសុទ្ធតែមានឥទ្ធិពលខ្លាំងក្លាចំពោះសុខភាពរបស់យើង។ ខាងក្រោមនេះគឺជាហេតុផលទាំង៥យ៉ាងដែលអ្នកគួរទទួលទានតែបៃតង១កែវមុនពេលចូលគេង៖
១) ជួយឲ្យអ្នកគេងលក់ស្រួល៖ ការគេងមិនគ្រប់គ្រាន់អាចនាំទៅរកហានិភ័យពីជំងឺផ្សេងៗបានជាច្រើនមុខ។ ហេតុនេះហើយការគេងឲ្យបានគ្រប់គ្រាន់គឺជារឿងសំខាន់មួយដែលអ្នកត្រូវធ្វើឲ្យបានជាប្រចាំ។ បើអ្នកមានផលលំបាកជាមួយនឹងការគេង អ្នកអាចចាប់ផ្ដើមទទួលទានតែបៃតងក្ដៅអ៊ុនៗ១កែវមុនពេលចូលគេង ដើម្បីសម្រួលដល់ការគេងរបស់អ្នកឲ្យលង់លក់ស្កប់ស្កល់។
២) កាត់បន្ថយហានិភ័យពីជំងឺមហារីក៖ មានការសិក្សាជាច្រើនសុទ្ធតែបានអះអាងថា ការទទួលទានតែបៃតងអាចកាត់បន្ថយហានិភ័យពីជំងឺមហារីកជាច្រើនប្រភេទដូចជា ថ្លើម ពោះវៀន សុដន់ ក្រពះ លំពែង ក្រពេញប្រូស្តាត និងប្លោកនោម។
៣) ការពារសុខភាពបេះដូង៖ មានការស្រាវជ្រាវមួយដែលបានធ្វើការសិក្សាទៅលើមនុស្សជំទង់ជាង៤មឺុននាក់ក្នុងប្រទេសជប៉ុនបានរកឃើញថា អ្នកដែលបានទទួលទានតែបៃតងច្រើនជាង៥កែវក្នុង១ថ្ងៃមានហានិភ័យក្នុងការកើតជំងឺបេះដូងនិងជំងឺដាច់សរសៃឈាមក្នុងខួរក្បាលទាបជាងអ្នកដែលមិនបានទទួលទាន។
៤) កាត់បន្ថយស្ត្រេសនិងជំងឺធ្លាក់ទឹកចិត្ត៖ ជាតិកាហ្វេអ៊ីននៅក្នុងតែបៃតងអាចជួយធ្វើឲ្យអារម្មណ៍របស់អ្នកប្រសើរឡើងបាន។ ជាមួយគ្នានេះដែរ សារធាតុL-theanineដែលមានក្នុងតែបៃតងក៏មានសមត្ថភាពអាចប្រយុទ្ធជាមួយនឹងរោគសញ្ញានៃជំងឺធ្លាក់ទឹកចិត្តបានទៀតផង។
៥) គ្រប់គ្រងកម្រិតកូឡេស្តេរ៉ុល៖ តែបៃតងត្រូវបានគេរកឃើញថាអាចកាត់បន្ថយកម្រិតកូឡេស្តេរ៉ុលក្នុងឈាម។ ទោះជាយ៉ាងណា ដើម្បីទទួលបានអត្ថប្រយោជន៍របស់វាប្រកបដោយប្រសិទ្ធភាព ក្នុងពេលជាមួយគ្នា អ្នកក៏ត្រូវទទួលទានអាហារដែលមានជាតិកូឡេស្តេរ៉ុលទាប ព្រមទាំងធ្វើលំហាត់ប្រាណផងដែរ៕
ដោយ៖ ស្រីពៅ
