ពីជីវិតជាក្មេងកំព្រាឳពុករស់ក្នុងត្រកួលគ្រួសារក្រីក្រ តស៊ូរហូតក្លាយជាម្ចាស់ក្រុមហ៊ុនចែកចាយសម្ភារៈសំណង់ដ៏ធំមួយនៅកម្ពុជា
បើនិយាយពីវិស័យសំណង់ និយាយអំពីក្រុមហ៊ុនផ្គត់ផ្គង់សម្ភារៈសំណង់ នោះមនុស្សភាគច្រើនជាពិសេសអ្នកដែលប្រឡូកនៅក្នុងវិស័យសហគ្រិនប្រាកដជានឹកឃើញដល់ឈ្មោះក្រុមហ៊ុន ហ៊ួត ជា ផ្គត់ផ្គង់សម្ភារៈសំណង់ ដែលជាក្រុមហ៊ុនដ៏ធំមួយនៅកម្ពុជានិងជាឈ្មោះដែលកំពុងលក់សិទ្ធិអាជីវកម្ម ដែលបង្កើតឡើងដោយស្នាដៃកូនខ្មែរមួយនេះមិនខាន ហើយជាការពិតឈ្មោះ ហ៊ួត ជា គឺជាឈ្មោះផ្ទាល់របស់ស្ថានិកនៃក្រុមហ៊ុនមួយនេះ។ ដូច្នេះតើអ្វីទៅដែលនៅពីក្រោយខ្នងនៃភាពជោគជ័យរបស់ស្ថាបនិករូបនេះ?
លោក ហ៊ួត ជា ស្ថាបនិកក្រុមហ៊ុនហ៊ួត ជា ផ្គត់ផ្គង់សម្ភារៈសំណង់ មានស្រុកកំណើតនៅឃុំព្រៃផ្ដៅ ស្រុកព្រៃកប្បាស ខេត្តតាកែវ ដោយរូបលោករស់នៅក្នុងត្រកូលគ្រួសារមួយដែលក្រីក្រ និងជាក្មេងកំព្រាដែលបានបាត់បង់ឪពុកនៅក្នុងឆ្នាំ១៩៨០ដោយសារចោប្លន់។ ស្ថាបនិករូបនេះបាននៅក្នុងវេទិការមួយដែលរៀបចំដោយសមាគមន៍អ្នកទីផ្សារកម្ពុជាប៉ុន្មានខែមុនថា «ពេលដំបូងដែលខ្ញុំមករស់នៅក្នុងទីក្រុងភ្នំពេញ គឺខ្ញុំបានរស់នៅក្នុងសំណង់អនាធិបតេយ្យចម្ការមន ហើយម្ដាយរបស់ខ្ញុំគឺជាអ្នកលក់បន្លែនៅផ្សារបឹងកេងកង»។
ស្ថាបនិករូបនេះ បានរៀបរាប់ «នៅក្នុងត្រកូលគ្រួសារដ៏ក្រីក្រមួយ ហើយបើក្រមិនដឹងជាថ្ងៃណាទើបអាចផុតក្រ ដូច្នេះគឺមានតែខំរៀន!»។ លោកបានបន្តប្រាប់ដល់ក្រុមការងារ Bizkhmer ក្រោយពីបញ្ចប់កម្មវិធីនោះថា លោកបានបន្តការសិក្សានៅភ្នំពេញនៅក្នុងឆ្នាំ១៩៩៧ដោយដំបូងឡើយគឺលោកបានសិក្សានៅសាលាទួលទំពូងអស់រយៈពេល១ឆ្នាំ បន្ទាប់មកលោកក៏បានប្រឡងជាប់សិក្សានៅសាលាជាតិគ្រប់គ្រង (NUM) និងបានបញ្ចប់ការសិក្សារយៈពេល៤ឆ្នាំនៅទីនោះ។
កត្តានៅក្នុងកំឡុងពេលសិក្សានេះគឺពិតជាសំខាន់ណាស់ព្រោះវាធ្វើឲ្យយើងបានសេពគប់មនុស្សល្អៗ និងធ្វើរឿងល្អៗដែលនាំឲ្យខ្លួនយើងជោគជ័យ នេះជាការលើកឡើងបន្ថែមរបស់លោក ហ៊ួត ជា។ បន្ទាប់ពីបានបញ្ចប់ការសិក្សា លោកបានចូលធ្វើការនៅក្រុមហ៊ុនមួយដែលនៅកំឡុងពេលនោះលោកបានធ្វើការផងនិងរៀនផងពីការងារទាំងនោះដើម្បីយកបទពិសោធន៍ ហើយតាមរយៈការសិក្សាពីបទពិសោធន៍នៃការងារទាំងនោះបានបង្រៀនឲ្យលោកស្គាល់អំពីសុខភាពរបស់អាជីវកម្ម និងស្គាល់ពីរបៀបរីកធំធាត់របស់អាជីវកម្ម។
លោកបានរៀបរាប់បន្ថែមថា «មនុស្សម្នាក់ៗតែងតែមានទស្សនៈវិស័យរៀងៗខ្លួន ហើយសម្រាប់ខ្ញុំ ខ្ញុំចង់ក្លាយទៅជាពាណិជករមួយរូបដែលជោគជ័យនិងល្បីល្បាញ ហើយអាចជួយបង្រៀនដល់កូនខ្មែរជំនាន់ក្រោយបាន»។ ដោយសារតែភាពក្រីក្របានជម្រុញឲ្យលោកជម្នះ និងខិតខំរៀនសូត្រ ហើយសេពគប់មនុស្សល្អៗ ប្រព្រឹត្តិសេក្ដីល្អ នឹងការចេះដឹងគុណផឹកទឹកត្រូវនឹកឃើញដល់ប្រភព គឺជាកត្តាដែលធ្វើឲ្យលោកអាចមកដល់បច្ចុប្បន្ននេះ។ លោក ហ៊ួត ជា៖ «ផ្លូវរបស់អ្នកជោគជ័យគឺមិនមានដានជើងមនុស្សខ្ជិលទេ»៕
អត្ថបទ៖ ជួប ស្រីរ័ត្ន
