កំហុសនៃការចាត់ចែងហិរញ្ញវត្ថុ៤យ៉ាង អ្នកមានតែងជៀសផុត ជាហេតុមិនងាយធ្លាក់ខ្លួនក្រវិញ!
ការចាត់ចែងហិរញ្ញវត្ថុជារឿងសំខាន់សម្រាប់មនុស្សម្នាក់ៗ មានន័យថា មូលហេតុមួយដែលធ្វើឲ្យមនុស្សមួយចំនួននៅតែក្រនោះ ក៏ដោយសារតែពួកគេមិនបានរៀបចំវាឲ្យបានប្រសើរ។ ខាងក្រោមនេះ ជាកំហុស ការចាត់ចែងហិរញ្ញវត្ថុ៤យ៉ាងដែលអ្នកមានតែងជៀសផុត៖
១) មិនចាយខ្ជះខ្ជាយ៖
ថ្វីត្បិតតែមានទ្រព្យសម្បត្តិច្រើនក្ដី អ្នកដែលមានពិតប្រាកដគឺមិនចូលចិត្តចាយវាយខ្ជះខ្ជាយនោះឡើយ ពោលគឺចាយតាមការគួរប៉ុណ្ណោះ ព្រោះដឹងច្បាស់ថា លុយពិបាករកណាស់ ហើយមុនពេលឈានដល់ដំណាក់កាលនេះ គឺពួកគេបានឆ្លងកាត់ឧបសគ្គរាប់មិនអស់ទៅហើយ។ ផ្ទុយពីអ្នកក្រ ដែលពេលមានបានបន្តិចបន្តួច ចូលចិត្តចាយទាល់តែអស់ពីខ្លួន។
២) មិនសន្សំសម្រាប់ថ្ងៃក្រោយ
ពួកអ្នកមាន បានគិតគូរខ្លាំងណាស់ពីថ្ងៃអនាគតរបស់ពួកគេ ព្រោះដឹងច្បាស់ថា ថ្ងៃណាមួយប្រាកដជាត្រូវរលាយ ប្រសិនបើមិនចេះសន្សំទុកសម្រាប់ថ្ងៃក្រោយ។ ដូច្នេះពួកគេតែងតែវិនិយោគ ឬ ទិញអចលនទ្រព្យណាមួយដើម្បីជារបស់ប្រើប្រាស់នៅពេលចាំបាច់នៅថ្ងៃណាមួយ។
៣) គ្មានផែនការចំណាយចំណូលច្បាស់លាស់
ផែនការសម្រាប់ចំណាយ និង ចំណូលគឺជារឿងសំខាន់បំផុតសម្រាប់មនុស្សម្នាក់ៗ ព្រោះថា បើគ្មានផែនការច្បាស់លាស់នោះទេ ទោះរកលុយបានច្រើនប៉ុណ្ណាក៏មិនចេះសល់ដែរ។
៤) យកលុយទៅបង្កើតបញ្ហា
បើមិនចេះប្រើប្រាស់លុយទេ នោះលុយនឹងបញ្ជាខួរក្បាលរបស់យើងវិញ ដល់ពេលនោះ វាមានតែបញ្ហារាប់មិនអស់ មិនថា ក្នុងគ្រួសារ ឬ ក្នុងសង្គមនោះទេ។ ដូច្នេះហើយពួកអ្នកមាន គេដឹងច្បាស់ និង មានការប្រុងប្រយ័ត្នខ្ពស់ ក្នុងការប្រើប្រាស់ និង គ្រប់គ្រងលុយឲ្យបានល្អ ដើម្បីយកលុយទាំងនោះ ទៅទាក់ទាញ ឬ បង្កើតលុយឲ្យបានច្រើនទៀតនៅពេលអនាគត ពោលគឺមិនធ្វើជាទាសករលុយឡើយ៕
ដោយ៖ រតនា វិចិត្រ
