របាយការណ៍ប្រាក់ចំណូលរបស់ក្រុមហ៊ុន Facebook មានសភាពរឹងមាំ បន្តកើនឡើងនៅត្រីមាសទី៤ ឆ្នាំ២០១៥ ព្រមទាំងរបាយការណ៍ហិរញ្ញវត្ថុប្រចាំឆ្នាំ២០១៥ ទាំងមូល។ ក្រុមហ៊ុនប្រកាសថា ខ្លួនបានចំណេញ ៣,៦៩ពាន់លានដុល្លារ ពីទំហំប្រាក់ចំណូលដែលរកបានសរុប ១៧,៩៣ពាន់លានដុល្លារអាមេរិកក្នុងឆ្នាំ២០១៥។ នេះជាតួលេខសាច់ប្រាក់មានការកើនឡើង ៤៤% ប្រៀបធៀបនឹងឆ្នាំ២០១៤។
Facebook ថែមទាំងឱ្យដឹងពីតួលេខជាមធ្យមរបស់អ្នកប្រើកាលពីឆ្នាំ២០១៥ កន្លងទៅថា មានប្រមាណ ១,០៤ពាន់លាននាក់ (user) លេង Facebook រៀងរាល់ថ្ងៃ ដែលតួលេខមានការកើនឡើង ១៧% ប្រៀបធៀបនឹងឆ្នាំចាស់ ឆ្នាំ២០១៤។ តួលេខប្រហែល ១ពាន់លាននាក់ខាងលើ បើគិតទៅលើអ្នកលេង Facebook តាមទូរស័ព្ទដៃ ឬឧបករណ៍អេឡិចត្រូនិកចល័តរៀងរាល់ថ្ងៃ មានប្រមាណ ៩៣៤លាននាក់ (user) ដែលតួលេខនេះមានកំណើន ២៥% ធៀបនឹងឆ្នាំចាស់។
លោក Mark Zuckerberg នាយកប្រតិបត្តិក្រុមហ៊ុនបណ្ដាញសង្គមយក្សនេះ បានថ្លែងថា៖ «២០១៥ ជាឆ្នាំដ៏អស្ចារ្យមួយសម្រាប់ Facebook។ សហគមន៍របស់យើង បន្តដុះដាល ហើយមុខជំនួញក៏រីកលូតលាស់ដែរ។ យើងបន្តធ្វើការវិនិយោគដើម្បីកាន់តែបម្រើដល់សហគមន៍របស់យើង ការសាងអាជីវកម្មរបស់យើង និងការភ្ជាប់ទំនាក់ទំនងលើពិភពលោក»។
របាយការណ៍ហិរញ្ញវត្ថុមានសភាពល្អប្រសើរនេះ ក៏ដោយសារបានរួមចំណែកពីជំនួញផ្នែកផ្សព្វផ្សាយពាណិជ្ជកម្មនៅលើបណ្ដាញសង្គម Facebook។ Facebook ចាប់ផ្ដើមកើបប្រាក់ពីការផ្សាយពាណិជ្ជកម្មនៅលើឧបករណ៍អេឡិចត្រូនិកចល័ត (Mobile Device) ហើយឥឡូវនេះ បានដឹងមុខបណ្ដាបណ្ដាញសង្គមផ្សេងៗហើយ។
ការផ្សព្វផ្សាយពាណិជ្ជកម្មគឺធ្វើឡើងដោយការបង្ហាញ ads នៅលើ Facebook និង ads ដែលបង្ហាញឡើងដោយសារអ្នកបានដំឡើង apps។ នៅរបាយការណ៍ចំណូលសម្រាប់ត្រីមាសថ្មីនេះ ក្រុមហ៊ុនអាចរកប្រាក់ពីអ្នកប្រើក្នុងម្នាក់ជាមធ្យមបាន ១៣,៥៤ដុល្លារ កើនឡើងពី ៩ដុល្លារនៅត្រីមាសដដែលកាលពីឆ្នាំចាស់៕
