ដើម្បីអាចបោះផ្សាយលក់​មូលបត្រកម្មសិទ្ធិជាសារធារណៈលើកដំបូង (IPO) បាន ក្រុមហ៊ុនត្រូវ​អនុវត្តន៍​ជា​ច្រើន​ជំហាន និង​ត្រូវ​រៀប​ចំ​ឯកសារ​ជា​ច្រើន​ផង​ដែរ។ ខា​ងក្រោម​នេះ​ ជា​សេចក្ដី​ណែនាំ​ដែល​ចេញ​ផ្សាយ​ដោយ​ក្រុមហ៊ុ​ន​ផ្សារមូលបត្រ​កម្ពុជាដើម្បី​ជាជំនួយ​ និង​ចំណេះដឹង​បន្ថែម​សម្រាប់​បង​ប្អូន​ម្ចាស់​អាជីវកម្ម​ដែល​មាន​បំណង​ចង់​បោះ​ផ្សាយ​លក់​មូលបត្រ​កម្មសិទ្ធិ​បាន។ ជំហានទី១ ការរៀបចំខ្លួន

• រៀបចំកិច្ចប្រជុំនិងព្រមព្រៀងផ្ទៃក្នុងជាមួយក្រុមប្រឹក្សាភិបាល អំពីគម្រោងស្វែងរកដើមទុនបន្ថែម តាមរយៈទីផ្សារមូលបត្រ។
• ត្រូវជាក្រុមហ៊ុនមហាជនទទួលខុសត្រូវមានកម្រិត ឬ នីតិបុគ្គលប្រតិស្រុត។
• រៀបចំអភិបាលកិច្ចសាជីវកម្ម ដូច ជាសមាសភាពក្រុមប្រឹក្សាភិបាលជាពិសេសអភិបាលឯករាជ្យ និង គណៈកម្មការសនវកម្ម ជាដើម។
• ពង្រឹងប្រព័ន្ធគណនេយ្យស្របតាមស្ដង់ដារគណនេយ្យដែលមានជាធរមាន និង ការត្រួតពិនិត្យផ្ទៃក្នុង។
• ធ្វើសវនកម្មលើរបាយការណ៍ហិរញ្ញវត្ថុមុននឹងដាក់ពាក្យសើ្នសុំបោះផ្សាយលក់មូលបត្រ
• រៀបចំផែនការសម្រាប់ការប្រើប្រាស់សាច់ប្រាក់ដែលបានមកពីការបោះផ្សាយលក់មូលបត្រកម្មសិទ្ធិជាសាធារណៈលើកដំបូង ដើម្បីធានាបាន​នូវ​កំណើនរយៈពេលវែង។
• រៀបចំឯកសារចាំបាច់នានា សម្រាប់ក្រុមហ៊ុនធានាទិញមូលបត្រធ្វើការសិក្សា និង រៀបចំត្រួតពិនិត្យកាតព្វកិច្ចតាមច្បាប់ ព្រមទាំងរៀបចំឯកសាចាំបាច់ផ្សេងៗទៀតសម្រាប់ការដាក់ពាក្យស្នើសុំបោះផ្សាយលក់មូលបត្រ។

ជំហានទី ២  ការតែងតាំងក្រុមហ៊ុនធានាទិញមូលបត្រ និង ការបង្កើតក្រុមការងារបោះផ្សាយលក់មូលបត្រកម្មសិទ្ធិ​សាធារណៈលើកដំបូង ក្រុមហ៊ុនមិនចាំបាច់បារម្ភពីការរៀបចំនិងបំពេញនីតិវិធីនៃបោះផ្សាយលក់មូលបត្រដោយខ្លួនឯងនោះទេ ដោយសារក្រុមហ៊ុនត្រូវតែងតាំងក្រុមហ៊ុនធានាទិញមូលបត្រ (Underwriter) ដែលទទួលបានអាជ្ញាបណ្ណពីគណកម្មការមូលបត្រកម្ពុជា និង ជ្រើសរើសក្រុមហ៊ុនផ្ដល់សេវាសវនកម្ម មេធាវី ដែលទទួលស្គាល់ពី គ ម ក។ ក្រុមការងារនេះ នឹង ជូយ សម្រួលការងារដល់ក្រុមហ៊ុនបោះផ្សាយលក់មូលបត្រក្នុងដំណើរការបោះផ្សាយលក់មួលបត្រកម្មសិទ្ធជាសារធារណៈលើកដំបូង ជាពិសេសការរៀបចំ របាយការណ៍ត្រួតពិនិត្យការបំពេញកាតព្វកិច្ចតាមផ្លូវច្បាប់ (Due Diligence Report) និង រៀបចំឯកសារផ្ដល់ពត៌មាន (Disclosure Document) ជាដើម។ សូម​រង់​ចាំ​តាម​ដាន​ភាគទី 2 ដែល​នឹង​ចេញ​ផ្សាយ​ឆាប់ៗ​នេះ...  ដោយ៖ គីម ច័ន្ទលាភ ប្រភព៖ Cambodia Securities Exchange - CSX