ចំណុចសំខាន់ ២យ៉ាងដែលអ្នកត្រូវដឹងដើម្បីរើសមនុស្ស «ចង់រួមចំណែកការងារជាមួយអ្នក»
មនុស្សម្នាក់ៗសុទ្ធតែធ្វើការដើម្បីចង់បានប្រាក់កម្រៃ ប៉ុន្តែក៏មានមនុស្សមួយចំនួនដែរដែលមានគោលបំណងលើសពីត្រឹមតែប្រាក់កម្រៃ តែពួកគេចង់រួមចំណែកជាសមាជិកក្រុមរបស់អ្នកដើម្បីជួយដំណើរការអាជីវកម្មថ្មីថ្មោងរបស់អ្នកឲ្យសម្រេចបានជោគជ័យ។ ខាងក្រោមនេះគឺជាចំណុចសំខាន់២យ៉ាងដែលអ្នកត្រូវដឹងដើម្បីរើសមនុស្សដែលចង់រួមចំណែកដល់អ្នក៖
១) ចូលចិត្តសកម្មភាពជាងការគ្រោងផែនការទុកមុន៖ ជាធម្មតាអាជីវកម្មនីមួយៗតែងចាប់ផ្ដើមដោយមានការគ្រោងរៀបចំផែនការទុកមុន បើទោះមិនគ្រោងទុកលម្អិតច្រើន យ៉ាងហោចណាស់ក៏មានគ្រោងទុកជាចំណុចគោលសំខាន់ៗខ្លះៗដែរ។ យ៉ាងណាមិញ អ្វីៗមិនមែនសុទ្ធតែទៅតាមការគ្រោងទុករបស់អ្នកទាំងអស់នោះទេ។ អ្នកនឹងត្រូវជួបប្រសព្វនឹងស្ថានការណ៍មួយចំនួនដែលតម្រូវឲ្យអ្នកបត់បែននិងផ្លាស់ប្ដូរផែនការរបស់អ្នកចេញ។ ហេតុនេះមនុស្សដែលអ្នកត្រូវស្វែងរកគឺជាមនុស្សដែលចេះបត់បែន ចូលចិត្តការធ្វើសកម្មភាពជាងការដើរតាមផែនការយ៉ាងដាច់ខាត និងមនុស្សដែលអាចជួយអ្នកនៅក្នុងការសម្រេចចិត្ត។
២) មិនប្រចាំការងារគ្នា៖ នៅពេលអាជីវកម្មទើបនឹងចាប់ផ្ដើមដំបូង វាគឺជារឿងសំខាន់ណាស់ដែលអ្នកអាចស្វែងរកមនុស្សណាដែលអាចធ្វើការអ្វីៗបានគ្រប់យ៉ាងនៅពេលស្ថានការណ៍ទាមទារ ដោយមិនខ្វល់ពីតួនាទីប្រចាំការរបស់ខ្លួន។ មានមនុស្សបែបនេះនៅក្នុងក្រុម នឹងធ្វើឲ្យក្រុមរបស់អ្នកមានសាមគ្គីគ្នា មានភាពស្វះស្វែង គិតពីប្រយោជន៍រួមជាធំ និងជំរុញឲ្យដំណើរការការងាររបស់អ្នកសម្រេចបានដល់គោលដៅ៕
ដោយ៖ ស្រីពៅ
