គ្រាន់​តែ​ព្យព្ជានៈ ប,ផ,ព,ភ, ម ទាំង ៥ នេះសោះ ហេតុ​អ្វីបាន​ជា​យើង​អាច​និយាយ​បាន​ថា​ អា​ច​ធ្វើ​ឱ្យ​ជីវិត​របស់​យើង​ជោគជ័យ​បាន?

បើ​មើល​ឱ្យ​ដិត​ដល់​ទៅ គឺ​ថា​សាមញ្ញបំផុត តែពាក្យដែលផ្សំឡើងដែលផ្តើមដោយព្យព្ជានៈទាំងអស់នេះពិតជាមិនធម្មតាឡើយ ហើយបើអ្នកចងចាំ និងយកទៅអនុវត្តន៍តាមទៀតនោះ ជីវិតរបស់អ្នកនឹងមានការប្រែប្រួល។

ខ្លឹមសារ​នេះ​ដក​ស្រង់​ចេញពីសៀវភៅ ចិត្តសាស្រ្តអនុវត្តន៍ និពន្ធ និងស្រាវជ្រាវដោយលោក ទៀ ថេន តាមរយៈកម្មវិធីរបស់

Dale Carnegie's Institute of Effective Speaking and Human Relations។

១. អក្សរ "ប=បំណង"៖ ចូរសួរទៅខ្លួន ២សំណួរថា អ្នកមានបំណងចង់ក្លាយជាអ្វីនៅថ្ងៃអនាគតហើយ ឬនៅ? អ្នកប្រាកដទេថាចង់ធ្វើវា ហើយដោយរបៀបណា?

២. អក្សរ "ផ=ផុសផុលនិងផែនការ"៖ អ្នកគួរតែរៀបចំផែនការមួយ​ឱ្យ​ច្បាស់លាស់ និងប្រុងប្រយ័ត្ន ហើយត្រូវតែបំផុសគំនិតទាំងនោះក្នុងខួរក្បាលជានិច្ច ដើម្បីសម្រួចទៅរកវា។

៣. អក្សរ "ព=ពុះពារ"៖ មានបំណង មានផែនការច្បាស់លាស់ តែបើខ្វះការខំប្រឹងប្រែងក៏មិនអាចសម្រេចដល់គោលដៅបានដែរ ដូច្នេះចងចាំថាអ្វីៗមិនមែនស្រួលទេ ទាមទារ​ឱ្យ​អ្នកមានចិត្តអំណត់ ជាពិសេសត្រូវតែខំពុះពារគ្រប់ឩបសគ្គទាំងឡាយ ដើម្បីរកផ្លូវចេញនិងរំដោះខ្លួនពីបញ្ហាដែលកើតឡើងចំពោះមុខ។

៤. អក្សរ "ភ=ភក្តីភាព"៖ មានរឿងអ្វីកើតឡើងក៏ដោយ អ្នកត្រូវតែប្រកាន់ភាពស្មោះត្រង់ និង ស្មោះស្ម័គ្រជាមួយគោលបំណង ផែនការ មនុស្សជុំវិញ​ខ្លួន​ មិត្តភក្តិ គ្រួសារ និងខ្លួនរបស់អ្នកជានិច្ច។

៥. អក្សរ "ម=មោះមុត"៖ អ្វីៗគឺទាមទារពេលវេលាជានិច្ច ហើយអ្វីដែលអ្នកចាំទទួលគឺ "ការបរាជ័យ" ប៉ុន្តែភាគតិចណាស់ដែលជោគជ័យមិនឆ្លងកាត់ការបរាជ័យ ប្រាកដជាមានគ្រាន់តែតិចហើយ​និង​ច្រើន​តែ​ប៉ុណ្ណោះ។ ដូច្នេះ​ប្រសិន​ បើអ្នកជួបរឿងនេះចូរកុំបោះបង់ ហើយខិតខំបំពេញបន្ថែម រាល់ចំណុចខ្វះខាតដែលអ្នកមាន ជាពិសេសត្រូវពង្រឹងនិងលត់ដំខ្លួនឯងឱ្យ​ខ្លាំងជាងមុនដើម្បី​ឱ្យ​ក្លាយជាមនុស្សអស្ចារ្យជាទីបំផុត៕

​ដោយ៖ លឺ សុខហេង