ការស្រាវជ្រាវរកឃើញថា វ័យ ៤៥ ឆ្នាំ ជាវ័យដែលជោគជ័យបំផុតក្នុងការធ្វើអាជីវកម្ម
លោកអ្នកប្រហែលធ្លាប់ឃើញអ្នករកស៊ីខ្លះចាប់ផ្តើមរកស៊ីតាំងពីវ័យក្មេង និងជោគជ័យតាំងពីអាយុក្រោម ៣០ ខ្លះទៀតនៅអាយុ ៤០ ជាង និងខ្លះទៀតជិតស្លាប់ទៅវិញហើយ ទើបរកឃើញ ពន្លឺជោគជ័យក្នុងមុខជំនួញរបស់ខ្លួន។ ហេតុដូចនេះទើបមានសំណួរ មួយចោទសួរឡើងថា តើវ័យណាដែលជោគជ័យបំផុតក្នុងការធ្វើអាជីវកម្ម?
បើយោងតាមការចេញ ផ្សាយរបស់ទស្សនាវដី្តអាជីវកម្មនៃសាកលវិទ្យាល័យ Harvard (Harvard Business Review) អ្នករកស៊ីភាគច្រើនជោគជ័យ នៅពេលដែលពួកគេជាមធ្យមឈានជើងដល់វ័យ ៤៥ ឆ្នាំ។ ការស្រាវជ្រាវមួយដែលដឹកនាំដោយលោកសាស្ត្រាចារ្យ Pierre Azoulay មកពីសាកលវិទ្យាល័យនេះ បានឈានដល់ការសន្និដ្ឋានមួយក្រោយពីលោកបានសិក្សាលើបុគ្គលជោគជ័យកំពូលៗ របស់អាមេរិក ០,១% ឬ ២,៧ លានអ្នក ដែលមានអាជីវកម្មផ្ទាល់ខ្លួន ដោយផ្អែកលើកំណើនប្រាក់ចំណូលរបស់អ្នកជំនួញទាំងនោះនៅក្នុងរយៈពេល ៥ ឆ្នាំដំបូង។
រកស៊ីតាំងពីវ័យក្មេងទៅ គឺជារឿងល្អបំផុតឬ? ទ្រឹស្ដីជាច្រើនបានលើកឡើថា អ្នករកស៊ីទំនងមានឱកាសជោគជ័យច្រើននៅពេលដែលពួកគេចាប់ផ្តើមបើកជំនួញរកស៊ីតាំងពីវ័យក្មេងទៅ។ ប៉ុន្តែបើយោងតាមការស្រាវជ្រាវរបស់លោក Pierre គឺពិតជាផ្ទុយពីស្រឡះពីការលើកឡើងរបស់ទ្រឹស្ដីខាងលើនេះ ពោលគឺក្រោយស្រាវជ្រាវរបស់លោកលើម្ចាស់អាជីវកម្មទាំងនេះដែលចាប់ផ្តើមឡើងតាំងពីឆ្នាំ ២០០៧ ដល់ឆ្នាំ ២០១៤ គឺលោកបានរកឃើញថា អាយុជាមធ្យមសម្រាប់អ្នកដែលចង់ចាប់ផ្តើមបើកជំនួញរកស៊ីគឺនៅអាយុ ៤២ ឆ្នាំ ហើយ៣ឆ្នាំក្រោយមក ពោលគឺនៅអាយុ ៤៥ ពួកគេទាំងនេះទទួលបានជោគជ័យ។
ចាប់ផ្តើមរកស៊ីនៅវ័យកណ្តាលហាក់ទទួលបានជោគជ័យច្រើនជាង? ការស្រាវជ្រាវរបស់លោកសាស្ត្រាចារ្យ Pierre មិនបានរកឃើញសោះឡើយថា សហគ្រិនដែលចាប់ផ្តើមមុខជំនួញនៅអាយុខ្ទង់ ២០ ហាក់ទទួលបានជោគជ័យច្រើន។ ប៉ុន្តែលោកបែរជារកឃើញថា ភាពជោគជ័យនៅក្នុងការចាប់ផ្តើមបើកមុខជំនួញមានទំនោរទៅរកមនុស្សវ័យកណ្ដាលច្រើនជាង។ លោកសាស្ត្រាចារ្យ Pierre បានរកឃើញផងដែរថា ម្ចាស់ក្រុមហ៊ុន ឬ ស្ថាបនិកក្រុមហ៊ុនដែលស្ថិតនៅក្នុងវ័យជាង ៤០ នេះ ហើយបើកក្រុមហ៊ុនតម្រង់ទិសលើឯកទេសខាងសេវាកម្មតែមួយមុខច្បាស់លាស់ មានអត្រាភាពជោគជ័យច្រើនច្រើនជាងម្ចាស់ក្រុមហ៊ុនដែលផ្ដោតលើសេវាកម្មច្រើនសំបូរបែប៕
ប្រភព៖ entrepreneur
