ថ្លៃភាគហ៊ុនកំពង់ផែស្វយ័តភ្នំពេញហក់ឡើងដល់ចំណុចខ្ពស់បំផុតកាលពីថ្ងៃទី១១ កញ្ញា
យោងតាមសេចក្ដីប្រកាសព័ត៌មានរបស់ផ្សារមូលបត្រកម្ពុជាកាលពីថ្ងៃទី១១ ខែកញ្ញា បានឱ្យដឹងថា ថ្លៃភាគហ៊ុនកំពង់ផែស្វយ័តភ្នំពេញបានហក់ឡើងដល់ចំណុចខ្ពស់បំផុតប្រចាំថ្ងៃដែលហៅតាមភាសាបច្ចេកទេសថា Upper Price Limit គឺ ៦.២៦០រៀលក្នុងមួយភាគហ៊ុន។
នេះជាថ្លៃខ្ពស់បំផុតគិតចាប់តាំងពីពេលដែលក្រុមហ៊ុននេះបានចុះបញ្ជីជួញដូរនៅផ្សាមូលបត្រកម្ពុជាកាលពីឆ្នាំ២០១៥ មក។ យោងតាមសេចក្ដីប្រកាសព័ត៌មានដដែលបានឱ្យដឹងថា បើធៀបនឹងថ្ងៃទី១០ កញ្ញា ថ្លៃភាគហ៊ុននេះបានកើនឡើង ៩,៨២% ខណៈថ្ងៃទី១០ កញ្ញា តម្លៃត្រឹមតែ ៥.៧០០ហ៊ុនប៉ុណ្ណោះ។ គិតត្រឹមថ្ងៃសុក្រ ទី១៤នេះ ថ្លៃភាគហ៊ុននៅត្រឹម ៦.០០០រៀលក្នុងមួយភាគហ៊ុន។
គិតចាប់តាំងពីថ្ងៃទី៣ ខែកញ្ញា មក បរិមាណបញ្ជាទិញសរុបមានដល់ទៅ ៦០.៩៨៨ហ៊ុន ខណៈបរិមាណបញ្ជាលក់វិញមានត្រឹមតែ ១.៨៨៧ហ៊ុន។
ការកើនឡើងនៃថ្លៃ និងបរិមាណនៃតម្រូវការរបស់ភាគហ៊ុនកំពង់ផែស្វយ័តភ្នំពេញ អាចបណ្ដាលមកពីអនុបាតថ្លៃធៀបនឹងប្រាក់ចំណេញរបស់ភាគហ៊ុននេះស្ថិតនៅកម្រិតគួរឱ្យទាក់ទាញ គឺ ៥.៤៩ ឬអាចបណ្ដាលមកពីការយល់ឃើញវិជ្ជមានរបស់វិនិយោគិន ទៅលើកំណើនទៅថ្ងៃអនាគតរបស់ក្រុមហ៊ុននេះ៕
