ចំណុច៤យ៉ាង ដែលបុគ្គលជោគជ័យក្នុងលោក មិននិយាយដាច់ខាត!
បុគ្គលដែលជោគជ័យ ក្នុងជីវិត ជាមនុស្សដែលមានដោយកម្រនៅលើលោកនេះ ព្រោះថា ការគិត និង សកម្មភាពរបស់ពួកគេគឺផ្ទុយស្រលះពីមនុស្សធម្មតា ជាហេតុនាំឲ្យលទ្ធផលរបស់ពួកគេគឺអស្ចារ្យជាងអ្នកដទៃអ៊ីចឹងដែរ។ ខាងក្រោមនេះ គឺជាចំណុចដែលបុគ្គលិកជោគជ័យមិនដែលនិយាយ៖
១) វាមិនមែនជាទំនួលខុសត្រូវរបស់ខ្ញុំ៖
បុគ្គលិកដែលមានទំនួលខុសត្រូវ មិនប្រាកដថា ក្លាយជាមនុស្សជោគជ័យគ្រប់រូប ប៉ុន្តែបុគ្គលដែលជោគជ័យ គឺត្រូវតែជាមនុស្សដែលមានទំនួលខុសត្រូវខ្ពស់។ ដូច្នេះហើយ ចង់ក្លាយជាបុគ្គលដែលជោគជ័យ គឺមិនអាចគ្មានទំនួលខុសត្រូវបានឡើយ ហើយឃ្លាដែលលើកឡើងថា «វាមិនមែនជាទំនួលខុសត្រូវរបស់ខ្ញុំ» គឺជាការលើកឡើងរបស់មនុស្សទូទៅប៉ុណ្ណោះ។
២) ខ្ញុំស្អប់ការងាររបស់ខ្ញុំណាស់
គ្មាននរណាម្នាក់អាចសម្រេចលទ្ធផល ឬ ជោគជ័យជាដុំកំភួនបានឡើយ ប្រសិនបើកំពុងតែស្អប់ការងារដែលខ្លួនកំពុងធ្វើ។ ដូច្នេះហើយ ចង់ក្លាយជាបុគ្គលជោគជ័យ គឺត្រូវធ្វើការងារដែលខ្លួនពេញចិត្ត ហើយមិនរាថយដាច់ខាត់ ទោះមានការលំបាកប៉ុណ្ណាក៏ដោយ។
៣) មិនយុត្តិធម៌សម្រាប់ខ្ញុំសោះ
ក្នុងពិភពលោកនេះ គ្មានយុត្តិធម៌១០០ភាគរយនោះទេ ដោយវាតែងតែមានលើស និង ខ្វះ ដូច្នេះអ្វីដែលសំខាន់នោះ អ្នកមិនមែនអង្គុយតែបន្ទោស និង រអ៊ូថា អ្វីៗមិនយុត្តិធម៌សម្រាប់អ្នកនោះទេ។ ប៉ុន្តែអ្វីដែលត្រូវធ្វើនោះគឺខិតខំ កែប្រែស្ថានភាព ដោយព្យាយាមពង្រឹងសមត្ថភាព និង ជំនាញ ដើម្បីសម្រេចជ័យជម្នះធំធេងនៅពេលខាងមុខ។
៤) មិនអាចទៅរួចទេ
ក្នុងលោកនេះ អ្វីៗគឺសុទ្ធតែមិនអាចទៅរួចទាំងអស់ នៅពេលលទ្ធផលមិនទាន់ចេញមក។ ដូច្នេះហើយ សម្រាប់បុគ្គលជោគជ័យ ពួកគេមិនដែលគិតអវិជ្ជមាននោះឡើយចំពោះការងារអ្វីក៏ដោយ ព្រោះបើគិតថា មិនអាចទៅរួច វាស្មើនឹងចាញ់មុនការប្រកួតចាប់ផ្ដើមទៅហើយ៕
ដោយ៖ រតនា វិចិត្រ
