ដើម្បីបង្កើតគណនេយ្យចុះឈ្មោះក្រុមហ៊ុននៅលើគេហទំព័រក្រសួងត្រូវធ្វើដូចម្តេចខ្លះ?
ក្រោយមានការធ្វើកំណែទម្រង់ជាបន្តបន្ទាប់ នៅពេលបច្ចុប្បន្ននេះ ម្ចាស់អាជីវកម្មថ្មីថ្មោងដែលចង់ចុះបញ្ជីក្រុមហ៊ុននៅក្រសួងពាណិជ្ជកម្ម គឺត្រូវបង្កើតគណនេយ្យមួយនៅលើគេហទំព័ររបស់ក្រសួងពាណិជ្ជកម្មជាមុនសិននៅមុនពេលចុះបញ្ជីក្រុមហ៊ុន។ ការង្កើតគណនេយ្យរបស់អ្នកនៅពេលនេះ គឺជាការចុះឈ្មោះជាអ្នកប្រើប្រាស់ថ្មី (Register as new user) ដែលលោកអ្នកត្រូវចូលទៅកាន់គេហទំព័រក្រសួង www.businessregistration.moc.gov.kh។ នៅពេលដែលអ្នកចូលទៅកាន់ Link នេះ វានឹងលោតផ្ទាំងទំព័រមួយដែលមានចំណងជើងធំៗថា "ចុះបញ្ជីពាណិជ្ជកម្ម ឬ Business Registration” ដូចមាននៅក្នុងរូបភាពខាងក្រោម។ ជំហាន១៖ សូមមើលទៅផ្ទាំងខាងស្តាំនៃទំព័រខាងក្រោម នោះលោកអ្នកនឹងឃើញពាក្យ Login/Register ហើយនឹងមានបង្ហាញផ្ទាំងចំនួន៣គឺ ១.Login ២. Register as new user ៣.Activate (User)
ជំហានទី២៖ ដោយសារតែអ្នកជាអ្នកបង្កើតគណនេយ្យដំបូងចុះឈ្មោះនៅលើគេហទំព័រក្រសួងនេះ ដូច្នេះលោកអ្នកត្រូវជ្រើសរើសផ្ទាំងទី២ សញ្ញាព្រួញក្រហម គឺ Register as new user។ ជំហានទី៣៖ បន្ទាប់មកវានឹងលោតផ្ទាំងដូចខាងក្រោម ហើយលោកអ្នកត្រូវបំពេញព័ត៌មានផ្សេងៗដែលរួមមានព័ត៌មានអំពីអ្នកប្រើប្រាស់ និងព័ត៌មានទំនាក់ទំនងជាដើម។ អ្នកអាចជ្រើសរើសភាសាជា ភាសាខ្មែរ ឬអង់គ្លេសក៏បានអាស្រ័យទៅតាមចំណង់ចំណូលចិត្តរបស់លោកអ្នក។
ជំហានទី ៤៖ នៅពេលអ្នកបំពេញព័ត៌មានផ្សេងៗរួចហើយ សូមចុចលើពាក្យ “create”( “បង្កើត”) នៅផ្នែកខាងក្រោមបង្អស់ នោះអ្នកនឹងឃើញផ្ទាំងថ្មីលេចចេញមក។ នេះមានន័យថា អ្នកបានបង្កើតគណនេយ្យបានជោគជ័យហើយ។ បន្ទាប់ពីនោះ លោកអ្នកអាចចូលទៅកាន់គណនេយ្យរបស់លោកអ្នកនៅពេលណាមួយក៏បាននៅលើកក្រោយ។ ប៉ុន្តែអ្នកត្រូវចាំ Username (ឈ្មោះអ្នកប្រើប្រាស់) និង password (លេខសម្ងាត់) ឲ្យច្បាស់ ដោយមិនចូលទៅកាន់ទំព័រ Register as new user ទៀតនោះទេ។ លោកអ្នកត្រូវចូលមកកាន់ទំព័រ Login វិញម្តង ព្រោះអ្នកបានបង្កើតគណនេយ្យរួចហើយ៕ ថ្លៃសេវាកម្មបង្កើតគណនេយ្យនេះ គឺឥតគិតថ្លៃ៕
ប្រភព៖ ក្រសួងពាណិជ្ជកម្ម
