ផ្លូវរថភ្លើងល្បឿនមធ្យម ឡាវ-ចិន សម្រេចការសាងសង់បាន ២០% ហើយ
មកទល់នឹងពេលនេះ គម្រោងផ្លូវរថភ្លើងឡាវ-ចិនក្នុងទំហំទឹកប្រាក់ ៦ពាន់លាដុល្លារអាមេរិក សម្រេចការសាងសង់បាន២០%ហើយ ចាប់តាំងពីបើកការដ្ឋានក្នុងឆ្នាំ ២០១៦ មក។ យោងតាមប្រព័ន្ធផ្សព្វផ្សាយ Vientiane Times ផ្លូវរូងក្រោមដីចំនួន៥៣ ប្រវែង ៣៧,៣១៤ម៉ែត្រ ត្រូវបានដាក់រួចរាល់ហើយ ខណៈស្ពាន ៤៧ ក្នុងចំណោម ១៦៧ កំពុងស្ថិតនៅដំណាក់កាលសាងសង់។
ផ្លូវក្រោមដី និងស្ពានរួមបញ្ចូលគ្នាមាន ៦២% នៃប្រវែងផ្លូវសរុប លាតសន្ធឹងចេញពីទីក្រុង Boten ភាគខាងជើងព្រំដែនឡាវ-ចិន ទៅកាន់ទីក្រុង Vientiane រាជធានីប្រទេសឡាវ។ ខ្សែរថភ្លើងនេះ ធ្វើឡើងក្នុងគោលបំណង កាត់បន្ថយការកកស្ទះ សម្រួលការធ្វើដំណើរ និងដឹកទំនិញ។ យ៉ាងណាបើតាមការឱ្យដឹងពីប្រព័ន្ធផ្សព្វផ្សាយរដ្ឋប្រទេសឡាវ គម្រោងផ្លូវរថភ្លើងល្បឿនមធ្យម ១២០ (ដឹកទំនិញ) និង ១៦០ (ដឹកអ្នកដំណើរ) គីឡូម៉ែត្រក្នុងមួយម៉ោងនេះ ប៉ះពាល់ដល់ប្រជាជនចំនួន ៤ ០០០គ្រួសារ និងដីចំនួន ៣,៨៣២ ហិតា។ តាមលក្ខខណ្ឌសន្យាចុងក្រោយ ភាគីឡាវ-ចិន នឹងត្រូវវិនិយោគមុន ២,៤ពាន់លានដុល្លារ និងចែកគ្នា ៣០% និង៧០% ដូច្នេះឡាវត្រូវចេញប្រាក់វិនិយោគ ៧២០ លានដុល្លារ ដោយ ២៥០ លានបានមកពីរដ្ឋ និង៤៧០លានដុល្លារ បានមកពីកម្ចីធនាគារ Export Import Bank របស់ចិន ក្នុងអត្រាការប្រាក់ ២.៣%។
គម្រោងសាងសង់ដែលឡាវត្រូវចេញប្រាក់វិនិយោគចំនួន ៣០% និងចិន ៧០% នៃទំហំទឹកប្រាក់ ៦ពាន់លានដុល្លារនេះ នឹងបើកសម្ពោធនៅថ្ងៃទី២ ខែធ្នូ ឆ្នាំ ២០២១។ គួរដឹងដែរថា បំណុលសាធារណៈរបស់ឡាវ ត្រូវបានគេព្យាករថានឹងកើនបាន ៦៥% នៃផលិតផលក្នុងស្រុកសរុបក្នុងឆ្នាំ ២០១៨ កើនឡើងពី ៦១% នៅឆ្នាំ ២០១៧ ដោយសារតែកំណើននៃប្រាក់កម្ចីពីធនាគារចិន និងការចេញប័ណ្ណបំណុលនៅលើទីផ្សារថៃ៕
ដោយ៖ សុម៉ាលីន
ប្រភព៖ atimes
