បំណុលសាធារណៈវៀតណាមកើនដល់ ១.៥០០ដុល្លារក្នុងពលរដ្ឋម្នាក់
បំណុលសាធារណៈវៀតណាមនឹងកើនឡើងដល់ ៦៣,៩២% នៃ GDP សរុប ស្មើនឹង ១៥២ ពាន់លានដុល្លារ នៅត្រឹមចុងឆ្នាំ២០១៨ បើគិតធៀបនឹងពលរដ្ឋម្នាក់ៗត្រូវជាប់បំណុលរដ្ឋ ១.៥០០ ដុល្លារលើស ១៥០ដុល្លារ បើធៀបឆ្នាំមុនជាប់តែ ១.៣៥០ ដុល្លារប៉ុណ្ណោះ។ នេះបើបើតាមរបាយការណ៍ ក្រសួងផែនការ និងគម្រោងវៀតណាម។
របាយការណ៍ដដែលបង្ហាញថា បំណុលសាធារណៈរបស់វៀតណាមមានដូចជា បំណុលរដ្ឋាភិបាលកណ្ដាល បំណុលរដ្ឋាភិបាលខេត្ត និងប្រាក់កម្ចីធនាគារ។ បំណុលរដ្ឋាភិបាលកណ្ដាល ដែលជាប្រភពចម្បងនៃបំណុល ត្រូវបានគេប៉ានប្រមាណ មាន ៥២,៥% នៃ GDP ស្មើ ១២៥ ពាន់លានដុល្លារអាមេរិក។ ការព្យាករណ៍បំណុលនេះ គឺផ្អែកលើសេណារីយ៉ូនៃកំណើន GDP ៦,៥៣% និងអតិផរណាក្រោម៤%។
ក្រសួងផែនការ និងគម្រោងវៀតណាម ក៏បានព្យាករណ៍ដែរថា បំណុលសាធារណៈរបស់ខ្លួន នឹងធ្លាក់ចុះមកត្រឹម ៦៣,៤៦% នៅឆ្នាំក្រោយ និង ៦២,៥៨% នៃ GDP ក្នុងឆ្នាំ២០២០។
បំណុលសាធារណៈរបស់វៀតណាម បានកើនក្នុងរយៈពេលប៉ុន្មានឆ្នាំថ្មីៗនេះ គឺកើនឡើង ៦,៨ % ពីឆ្នាំ ២០១៣ -២០១៧ ហើយបើតាមក្រសួងហិរញ្ញវត្ថុវៀតណាម មូលហេតុចម្បងចំពោះបញ្ហានេះ គឺការចំណាយលើសលប់៕
ប្រភព៖ vnexpress ប្រែសម្រួល៖ សុម៉ាវត្តី
