បច្ចេកវិទ្យាសាកថ្មលើទូរស័ព្ទនាពេលបច្ចុប្បន្នកាន់តែទំនើប ត្រូវបានគេរកវិធីសាស្ត្រថ្មីៗ ដើម្បីឱ្យការសាកថ្មបានរហ័សឆាប់ពេញ។ ជាក់ស្ដែងខ្សែសាកថ្មឆ្លាតវៃ SONICable នេះ ត្រូវបានផលិតឡើងតាមបច្ចេកវិទ្យាទំនើបចុងក្រោយ ជួយឱ្យអ្នកសាកថ្មលើស្មាតហ្វូនបានរហ័សជាងខ្សែសាកថ្មទូទៅ ២ដង។
https://youtu.be/RRxrrlGsYOw
ខ្សែសាកថ្មដែលមានឈ្មោះ SONICable នេះ មានលក្ខណៈពិសេស មិនត្រឹមតែអាចសាកថ្មទូរស័ព្ទឆាប់ពេញប៉ុណ្ណោះទេ រីឯការឌីហ្សាញក៏មានរាងស្លីមស្អាតទាន់សម័យ រំលេចដោយពណ៌ស លាយខៀវ ហើយមានក្បាលឌុយពណ៌ខៀវស្រស់។ ខ្សែសាកទំនើបនេះក៏មានពណ៌ស និងពណ៌ខ្មៅលាតផងដែរ។
SONICable ត្រូវបានឌីហ្សាញភ្ជាប់មកជាមួយក្បាលឌុយសងខាង ដែលមួយប្រភេទជា USB connector ដែលផលិតពីអាលុយមីញ៉ូមស្អាត។ ខ្សែសាកនេះ មានជម្រើសក្បាលឌុយផ្សេងគ្នា សម្រាប់សាកបានទាំងនៅលើ iPhone (ក្បាលឌុយ Lightning Connector) និងសាកបាននៅលើស្មាតហ្វូន Android (micro USB connector)។
តាមការបញ្ជាក់របស់ក្រុមអ្នករចនា នៅលើគេហទំព័រផ្លូវការឱ្យដឹងថា៖ «SONICable គឺជាខ្សែសាកថ្មទូរស័ព្ទបច្ចេកវិទ្យាខ្ពស់លើពិភពលោក ដែលអាចសាកថ្មលើឧបករណ៍អេឡិចត្រូនិក លឿនជាងខ្សែសាកថ្មទូទៅ ២ដង»។ នៅលើកំណាត់ខ្សែសាកថ្មនេះ មានប៊ូតុងមួយសម្រាប់បើកមុខងារសាកថ្មរហ័ស តែប្រសិនលោកអ្នកបិទ (OFF) នោះ SONICable នឹងមានលទ្ធភាពសាកថ្មដូចឆ្នាំងសាកទូទៅ និងអាចប្រើសម្រាប់ផ្ទេរឯកសារ (Sync) ក៏បាន។ នេះមានន័យថា ប្រសិនលោកអ្នកបើកមុខងារ (ON) នោះ នឹងស៊ីភ្លើងបន្តិច ហើយមុខងារផ្ទេរឯកសារ (Sync) នឹងមិនដំណើរការ (disable) បានទេ។
ពេលនេះ ខ្សែសាកថ្ម SONICable ត្រូវបានដាក់លក់នៅលើគេហទំព័រ sonicable.com ក្នុងតម្លៃ ២៨,៩៥ដុល្លារដូចគ្នា ទាំងពណ៌ខ្មៅ ពណ៌ប្រាក់ និងពណ៌ស លាយខៀវ។ ប្រសិនលោកអ្នកជាវម្ដងពីរខ្សែ នឹងលក់បញ្ចុះនៅត្រឹម ៥២ដុល្លារប៉ុណ្ណោះ៕
