ថ្មីៗ​នេះ មាន​លេច​រូប​ស្រោម​ទូរស័ព្ទ​ដែល​ត្រូវ​បាន​គេ​អះអាង​ថា ជា​ស្រោម​ iPhone ​ជំនាន់​ថ្មី​ដែល​មាន​អេក្រង់ ៦,១អ៊ីញ។ វា​ជា​សញ្ញាណ​គាំទ្រ​ទៅ​លើ​ដំណឹង​ដែល​ថា ក្រុមហ៊ុន Apple ​នឹង​ប្រកាស iPhone ថ្មី​ម្ដង ៣ម៉ូដែល​ចុង​ឆ្នាំ២០១៨ នេះ ដែល​ក្នុង​នោះ​នឹង​មាន iPhone តម្លៃ​មធ្យម បំពាក់​អេក្រង់​ទំហំ​កណ្ដាល ពោល​គឺ ៦,១អ៊ីញ​ប្រភេទ LCD។

សេចក្ដី​រាយការណ៍​កន្លង​ទៅ​បាន​ឱ្យ​ដឹង​ថា វា​នឹង​មាន​តម្លៃ​ដូច iPhone 8 ​បច្ចុប្បន្ន (​ប្រហែល ៧០០ដុល្លារ) ដែល​ប្រើ​ត្រឹម​ប្រភេទ​អេក្រង់ LCD និង​មាន​កាមេរ៉ា​ក្រោយ​១ ប៉ុណ្ណោះ។ យ៉ាងណា iPhone ៦,១អ៊ីញ​នេះ ក៏​នឹង​មាន​បច្ចេកវិទ្យា​ស្កេន Face ID v.10 (ដូច​នៅ​លើ iPhone X) ​ខណៈ​ពីរ​ម៉ូដែល​ទៀត នឹង​ជា iPhone ស៊េរី​ខ្ពស់​សម្រាប់​ឆ្នាំ២០១៨ ​ដែល​វា​ទំនង​នឹង​ត្រូវ​រចនា​ចំណុច notch តូច​ជាង​មុន​ជា v2.0៕   ​ដោយ៖ រឹទ្ធិរាជ