វិធីសាស្ត្រសាមញ្ញ ៣យ៉ាងដើម្បីគេចឱ្យផុតពីជំពាក់លុយគេ
បញ្ហាបំណុល មិនមែនជារឿងតូចតាចនោះទេ សម្រាប់ជីវភាពគ្រួសារ ក៏ដូចជាបញ្ហាហិរញ្ញវត្ថុផ្ទាល់ខ្លួន។ វិធីខាងក្រោមងាយៗ ៣យ៉ាងនេះ អាចជួយលោកអ្នកឱ្យជៀសផុតពីបំណុល ដែលអាចឈានដល់វ័ណ្ឌកអ្នកបាន។
១) ត្រូវធ្វើការសម្រេចចិត្តប្រកបដោយមនសិកាថាឈប់ខ្ចីលុយគេទៀត៖ ប្រសិនបើលោកអ្នកចង់គេចឱ្យផុតពីបំណុល គឺត្រូវតែឈប់ខ្ចីលុយគេបន្ត ជាពិសេសខ្ចីលុយទៅចំណាយដើម្បីភាពហឺហារ។ ការខ្ចីលុយពីប្រភពច្រើនយ៉ាង គឺរឹតតែធ្វើឱ្យអ្នកវ័ណ្ឌក ជាពិសេសគឺការខ្ចីលុយពីប្រភពមួយទៅសងប្រភពមួយទៀតដែលគ្មានប្រភពចំណូលផ្ទាល់ខ្លួលដើម្បីបង្វិលសាច់ប្រាក់។ ដូច្នេះលោកអ្នកត្រូវតែរឹងមាំខាងផ្នែកហិរញ្ញវត្ថុ និងរឹងមាំផ្នែកស្មារតីដោយតឹងចិត្តថា ឈប់ខ្ចីបំណុលគេទៀត។
២) បង្កើនប្រភព ឬប្រាក់ចំណូលបើអាចធ្វើទៅបាន៖ បង្កើតប្រភពចំណូលឱ្យបានកាន់តែច្រើន ឬខិតខំរកចំណូលកាន់តែច្រើនបើអាចធ្វើទៅបាន។ នៅពេលដែលលោកអ្នកមានប្រភពចំណូលច្រើនមិនរំពឹងប្រភពចំណូលតែមួយនោះនឹងធ្វើឱ្យលោកអ្នកមានឯករាជ្យភាពផ្នែកហិរញ្ញវត្ថុ និងជាពិសេសអាចមានលុយសន្សំខ្លះទុកជាទុនសម្រាប់ប្រើប្រាស់នាពេលអនាគត។
៣) បើមានបំណុលត្រូវមានផែនការសងច្បាស់លាស់៖ ប្រសិនបើលោកអ្នកមានបំណុល លោកអ្នកត្រូវតែមានផែនការសងច្បាស់លាស់។ ផែនការសងគឺត្រូវធ្វើឡើងជាដំណាក់កាល កាន់តែច្រើនដំណាក់កាល កាន់តែល្អ ហើយត្រូវយកសាច់ប្រាក់ដែលសល់ពីការចំណាយឬសន្សំខ្លះមកសង។ មិនត្រូវទុកចាំដំណាក់កាលបំណុលឡើងគរនោះទេ ជាពិសេសលុយកាក់នឹងមនុស្សមួយចំនួនគឺមិនសូវត្រូវគ្នានោះទេ ពោលគឺមិនសល់តែម្ដងបើមិនចាត់ចែងត្រឹមត្រូវ៕
ដោយ៖ រតនៈវិភូ
