ក្រុមហ៊ុន Apple ត្រូវគេរាយការណ៍ថា កំពុងធ្វើតេស្តលើបច្ចេកវិទ្យាប្រព័ន្ធបណ្ដាញថ្មី Light Fidelity (Li-Fi)សម្រាប់បំពាក់នៅលើ iPhone ជំនាន់ក្រោយ។ ព័ត៌មានអំពីមុខងារថ្មីនេះ ត្រូវបានគេអះអាងបន្ទាប់ពីគេបានប្រទះឃើញ iOS Code ដោយគេហទំព័រ Apple Insider។
យោងតាមរបាយការណ៍ឱ្យដឹងថា Apple នឹងបំពាក់ LiFiCapability ចាប់ពីប្រព័ន្ធប្រតិបត្តិការ iOS 9.1 ឡើងទៅ។ ក្រុមហ៊ុនថែមទាំងត្រូវគេរាយការណ៍ថា ពេលនេះបានជ្រើសរើសទូរស័ព្ទ iPhone ប៉ុន្មានគ្រឿង ដើម្បីធ្វើតេស្តមុខងារ LiFi នេះ។ បណ្ដាញ LiFi ដំណើរការស្រដៀងនឹងច្បាប់ infrared remote។ វាបញ្ជូនទិន្នន័យ (data) តាមប្រភពពន្លឺ ហើយបន្ទាប់មកពន្លឺត្រូវទទួលដោយ sensor និងបកប្រែទៅជាសញ្ញាអេឡិចត្រូនិក។
លក្ខណៈពិសេសនេះ ប្រើពន្លឺដែលអាចមើលឃើញ មានន័យថា ពន្លឺនៅក្នុងផ្ទះរបស់អ្នក អាចដើរតួជាចំណុច សម្រាប់ភ្ជាប់ (access) ដែលមានល្បឿនល្បឿនជាងប្រព័ន្ធ Wi-Fi ជាមួយល្បឿនដល់ 224gigabits ក្នុង ១វិនាទី។
សូមបញ្ជាក់ថា បច្ចេកវិទ្យាដែលបញ្ជូនព័ត៌មានដោយប្រើទំនាក់ទំនងពន្លឺដែលអាចមើលឃើញ ត្រូវបានគេធ្វើតេស្តនៅក្នុងការិយាល័យ និងកន្លែងធ្វើការផ្សេងទៀតនៅ Tallinn ក្នុងប្រទេសអេស្តូនី។ ការសាកល្បងនៅក្នុងមន្ទីរពិសោធន៍បានបង្ហាញថា Li-Fi អាចមានល្បឿនលឿនជាង Wi-Fi រហូតដល់ទៅ១០០ដង វាប្រើពន្លឺដែលគេអាចមើលឃើញ ហើយបញ្ជូនព័ត៌មានតាមកូដលេខពីរតួ៕
