ទីផ្សារផ្គត់ផ្គង់ប្រេងពិភពលោក លង់ខ្លួនយ៉ាងជ្រៅលើបញ្ហាធ្លាក់ចុះនៃតម្លៃប្រេង
ទីផ្សារផ្គត់ផ្គង់ប្រេងពិភពលោក កំពុងលង់ខ្លួនយ៉ាងជ្រៅ ដោយសារតែការធ្លាក់ចុះនៃតម្លៃប្រេងយ៉ាងខ្លាំងមិនធ្លាប់មាន ខណៈនៅលើទីផ្សារមានការផ្គត់ផ្គង់ប្រេងច្រើនហួសកម្រិត។ នេះបើយោងតាម ការអះអាងរបស់ភ្នាក់ងារថាមពលអន្តរជាតិ។
ការអះអាងបែបនេះ គឺក្រោយពេលដែលតម្លៃប្រេងបានធ្លាក់នៅក្រោម ២៨ដុល្លារក្នុងមួយបារ៉ែល ដែលនេះជាលើកទីមួយហើយក្នុងប្រវត្តិសាស្ត្រគិតចាប់ពីឆ្នាំ២០០១មក។
ភ្នាក់ងារថាមពលអន្តរជាតិ បានវាយតម្លៃថា នៅឆ្នាំ២០១៦នេះ តម្រូវការប្រេងនឹងមានការធ្លាក់ចុះ ដោយសារតែកំណើនសេដ្ឋកិច្ចរបស់ចិន គឺមានលក្ខណៈខ្សោយ ជាហេតុការបញ្ជាទិញមិនសូវមាន ព្រោះចិនជាប្រទេសធំមួយ ដែលត្រូវការប្រេងដើម្បីដំណើរការឧស្សាហកម្មរបស់ខ្លួន។
អ្វីដែលធ្វើឲ្យតម្លៃប្រេងកាន់តែមានបញ្ហាទៀតនោះ គឺប្រេងរបស់អ៊ីរ៉ង់នឹងមានវត្តមានគគ្រឹកគគ្រេងជាថ្មីម្ដងទៀតនៅលើទីផ្សារអន្តរជាតិ ក្រោយបន្ទាប់ពីបម្រាមនាំចេញប្រេងត្រូវបានគេដកចេញវិញ នាពេលថ្មីៗនេះ។
ដោយសារតែបែបនេះហើយ ប្រេងដែលផលិតលើសតម្រូវការគឺអាចមានចំនួន១,៥ លានបារ៉ែលក្នុងមួយថ្ងៃ ក្នុងពាក់កណ្ដាលឆ្នាំ២០១៦៕
ដោយ៖ អ៊ុន ភក្តី
