កម្រងសម្ដីទាំង ១០របស់អ្នកកំណាព្យជនជាតិអាមេរិក លោក Ralph Waldo Emerson
លោក Ralph Waldo Emerson គឺជាអ្នកពូកែតែងកំណាព្យ និងជាអ្នកនិពន្ធជនជាតិអាមេរិកមួយរូប ដែលបានរស់នៅអំឡុងឆ្នាំ១៨០៣ដល់ ឆ្នាំ១៨៨២។ គាត់ធ្លាប់បានថ្លែងសន្ទរកថាទាមទារសិទ្ធិសេរីភាពសម្រាប់ជនជាតិដើមអាមេរិក និងកំណែទម្រង់ប្រព័ន្ធអប់រំ។ គាត់ចង់លុបបំបាត់ចោលនូវភាពជាទាសករ ហើយគាត់ក៏បានគាំទ្រយុទ្ធនាការរបស់លោក អាប្រាហាម លីនខូន សម្រាប់ការឡើងកាន់តំណែងជាប្រធានាធិបតីរបស់លោកផងដែរ។
ខាងក្រោមនេះគឺជាកម្រងសម្ដីទាំង១០របស់លោក Emerson៖
១) "អ្នកមិនអាចចាំធ្វើអំពើល្អបន្តិចទៀតនោះទេ ព្រោះអ្នកមិនអាចដឹងបានទេថាបន្តិចទៀតនឹងក្លាយមកជាការហួសពេលទៅហើយ"។
២) "មនុស្សហាក់ដូចជាមិនដឹងទេថា ការយល់ឃើញដែលគេមានចំពោះលោកនេះក៏ជាការស្ដែងចេញពីលក្ខណៈអត្តចរិតរបស់គេដែរ"។ បានអានឬនៅ ?
៣) "ទោះបីជាយើងធ្វើដំណើរជុំវិញពិភពលោកដើម្បីស្វែងរកភាពស្រស់ស្អាតក៏ដោយ អ្នកចាំបាច់ត្រូវតែស្ពាយយកភាពស្រស់ស្អាតទៅជាមួយផង ពុំនោះទេអ្នកនឹងមិនអាចស្វែងរកឃើញវាឡើយ"។
៤) "ពួកយើងអាចបង្កើនអំណាចខ្លាំងក្លារបស់យើងបានពីចំណង់ទាំងឡាយដែលយើងបានតទល់ជាមួយ"។
៥) "ស្លាកស្នាមដែលមិនមានថ្ងៃប្រែប្រួលនៃគតិបណ្ឌិត គឺជាកាលដែលអាចមើលឃើញអព្ភូតហេតុនៅក្នុងភាពសាមញ្ញ"។
៦) "ជ័យជម្នះដែលពិតប្រាកដនិងឋិតនៅជាអង្វែង គឺជាជ័យជម្នះនៃសន្តិភាព ពុំមែនជ័យជម្នះដែលទទួលបានពីសង្គ្រាមនោះទេ"។
៧) "ពួកយើងដោយធម្មជាតិគឺជាអ្នកសង្កេត ដូច្នេះហើយគឺជាអ្នកសិក្សារៀនសូត្រ។ នេះហើយគឺជាសភាពអចិន្ត្រៃយ៍របស់យើង"។
៨) "កុំខ្វះទំនុកចិត្តទៅលើខ្លួនឯងខ្លាំងពេក ឬក៏ឆាប់មានប្រតិកម្មខ្លាំងពេកអំពីសកម្មភាពដែលអ្នកបានប្រព្រឹត្ត។ ពីព្រោះថារាល់ជីវិតទាំងអស់សុទ្ធតែជាការពិសោធន៍"។
៩) "សម្រាប់រាល់អ្វីដែលអ្នកបានបាត់បង់ អ្នកនឹងទទួលបានអ្វីផ្សេងមកវិញ ហើយសម្រាប់រាល់អ្វីដែលអ្នកទទួលបានមក នោះអ្នកក៏នឹងបាត់បង់អ្វីផ្សេងទៅវិញដែរ"។
១០) "មូលហេតុដែលពិភពលោកខ្វះនូវភាពរួបរួមគ្នាតែមួយ ហើយបាក់បែកជាគំនររប៉ាត់រប៉ាយ គឺដោយសារតែមនុស្សម្នាក់ៗបានបែកបាក់ជាមួយនឹងខ្លួនឯង"។
ប្រភព៖ brainyquote.com ប្រែសម្រួល៖ ស្រីពៅ អត្ថបទទាក់ទង៖ ពុទ្ធដីកា ៥ឃ្លាដែលមានតម្លៃមិនអាចកាត់ថ្លៃបាន
