កំពូលកីឡាករបាល់ទាត់ Ronaldo ៖«ខ្ញុំពិតជាត្រូវការអ្នកដែលស្អប់ខ្ញុំ!»
កីឡាករ Cristiano Ronaldo ដែលជាគ្រាប់ពេជ្ររបស់ ក្លឹបយក្សReal Madrid បាននិយាយថា លោកពិតជាត្រូវការ ការរិះគន់ពីសំណាក់អ្នកដែលស្អប់លោក ដើម្បីពង្រឹងសមត្ថភាព ឲ្យកាន់តែប្រសើរជាងមុន។
ការលើកឡើងបែបនេះ គឺដោយសារតែ ខ្សែប្រយុទ្ធឆ្នើមRonaldo តែងត្រូវបានគេរិះគន់យ៉ាងខ្លាំង ចំពោះភាពអាត្មានិយមរបស់ខ្លួន ក្នុងពេលប្រកួត ពោលគឺចង់ស៊ុតតែម្នាក់ឯង មិនព្រមផ្តល់បាល់ឲ្យមិត្តរួមក្រុម និង ការបង្កបញ្ហាជាច្រើនក្នុងពេលប្រកួតជាដើម។
Cristiano Ronaldo លើកឡើងថា៖«ខ្ញុំមិនប្រកាន់ជាមួយនឹង មនុស្សដែលស្អប់ខ្ញុំទេ ព្រោះការរិះគន់របស់អ្នកទាំងនោះ កាន់តែធ្វើឲ្យខ្ញុំប្រសើរជាងមុន»។
សូមបញ្ជាក់ថា មានក្លឹបជាច្រើនសម្លឹងចង់បានខ្សែប្រយុទ្ធរបស់ Real Madrid រូបនេះ ហើយនៅពេលថ្មីៗនេះទៀត ក៏មានពាក្យចចាមអារ៉ាមថា Cristiano Ronaldoហាក់ដូចជា មិនចង់បន្តលេងឲ្យReal Madrid ទៀតនោះទេ៕
