Nokia X ​ត្រូវ​គេ​រំពឹង​ថា នឹង​មាន​ឈ្មោះ​ Nokia 6 ពេល​ត្រូវ​ក្រុមហ៊ុន​សម្ពោធ​ឆាប់ៗ​ខាងមុខ ហើយ​ពេល​នេះ យើង​ទើប​ទទួល​បាន​រូប​បែកធ្លាយ​របស់​វា ដែល​មាន​រចនាបថ​អេក្រង់​គែម​ស្ដើង និង​មាន​ចំណុច​ឆក Notch ​ដូច​ iPhone X និង​ស្មាតហ្វូន Android ស៊េរី​ក្រោយៗ​ដែរ។ វា​ជា​រូប​បែកធ្លាយ​ពិតៗ ដែល​មាន​ប្រភព​ពី​បណ្ដាញ​សង្គម​ចិន Baidu។

តាមរយៈ​រូប​បែកធ្លាយ​នេះ យើង​បាន​ឃើញ​សាច់​គែម​ទូរស័ព្ទ​ដែល​សល់​នៅ​ខាង​ក្រោយ មាន​ភ្ជាប់​អក្សរ Nokia ​រីឯ​ខាង​លើ​វិញ​ជា​ចំណុច Notch ទម្រង់​ដូច​នៅ​លើ iPhone X ដែរ។ Nokia X ​បង្ហាញ​រូប​គួរ​ឱ្យ​សង្ស័យ​ថា មាន​សមាមាត្រ 19:9 ហើយ​អាច​បំពាក់​កាមេរ៉ា​ភ្លោះ​ខាង​ក្រោយ អម​ជាមួយ​ភ្លើង​ជំនួយ​កាមេរ៉ា dual-LED ​រៀប​ជា​ទម្រង់​បញ្ឈរ។ សូម​អាន៖ Nokia 9 ​នឹង​បង្ហាញ​ខ្លួន​ឆ្នាំ​នេះ​ អម​ជាមួយ​កាមេរ៉ា​មុខ​ភ្លោះ ប្រើ​ឈីប Snapdragon 845 និង RAM 6GB

រូប​បែកធ្លាយ​នេះ ថែមទាំង​បង្ហាញ​ឱ្យ​ឃើញ​មាន​ទ្រនាប់​រាង​មូល អម​ដោយ​ខ្សែ​វ័ណ្ឌ​ពណ៌​ទឹក​ប្រាក់ ដែល​នឹង​ប្រើ​សម្រាប់​ស្កេន​ក្រយៅដៃ។ រីឯ​ប៊ូតុង​សំឡេង និង Power ត្រូវ​បាន​រៀប​នៅ​ផ្នែក​ចំហៀង​ខាង​ស្ដាំ​នៃ Nokia X។ ទូរស័ព្ទ Nokia X ដែល​មាន​កូដ​ម៉ូដែល TA-1099 នឹង​ជា​ស្មាតហ្វូន​កម្រិត​មធ្យម។ ប្រភព​ព័ត៌មាន​ខ្លះ​លើកឡើង​ថា Nokia X ​នឹង​បង្ហាញ​ខ្លួន​នៅ​ថ្ងៃ​ទី១៦ ខែ​ឧសភា​ក្រោយ​នេះ៕

សូម​អាន៖ Nokia ​ចេញ​ស្មាតហ្វូន​តម្លៃ​ក្រោម $១០០ ដើរ​ដោយ Android 8.1 GO ម៉ូដែល Nokia 1 ក្នុង​ព្រឹត្តិការណ៍ MWC 2018   ​ដោយ៖ រឹទ្ធិរាជ